ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນບ່າຍຂອງວັນທີ 25 ພຶດສະພາ 2022 ນີ້ ຄະນະປະຈໍາສະພາປະຊາຊົນແຂວງ ໄດ້ເປີດກອງປະຊຸມປະຈໍາເດືອນພຶດສະພາ 2022 ຢູ່ທີ່ຫ້ອງປະຊຸມຂອງສະພາປະຊາຊົນແຂວງ ໂດຍພາຍໃຕ້ການເປັນປະທານຂອງ ທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງ, ມີບັນດາທ່ານຮອງປະທານ ແລະ ກໍາມະການຄະນະປະຈໍາ, ຄະນະເລຂາທິການສະພາປະຊາຊົນແຂວງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມ ໄດ້ຄົ້ນຄວ້າພິຈາລະນາວຽກງານທີ່ສໍາຄັນໆ ເປັນຕົ້ນ: ການຜ່ານບົດສະຫຼຸບປະຈໍາເດືອນ ພຶດສະພາ ແລະ ແຜນການ ເດືອນມິຖຸນາ 2022 ເພື່ອຈະໄດ້ປັບປຸງເພີ່ມຕື່ມ, ກະກຽມແຕ່ຫົວທີໃນການປະສານສົມທົບກັບພາກສ່ວນກ່ຽວຂ້ອງເອກະພາບຫົວຂໍ້ທີ່ຈະນໍາເຂົ້າພິຈາລະນາໃນກອງປະຊຸມສາມັນ 3 ຂອງ ສພຂ ຊຸດທີ II ເຊັ່ນ ດ້ານນິຕິກໍາ, ດ້ານການຕົກລົງບັນຫາສໍາຄັນຂອງແຂວງ ທີ່ກ່ຽວຂ້ອງກັບອົງການປົກຄອງແຂວງກະກຽມ ແລະເນື້ອໃນທີ່ກ່ຽວພັນກັບສະພາປະຊາຊົນແຂວງ ໃຫ້ເປັນເອກະພາບກັນໃນເດືອນມິຖຸນາ;  ເອົາໃຈໃສ່ຊຸກຍູ້ຕິດຕາມ 2​ ວາລະແຫ່ງຊາດ ໃນແຕ່ລະໄລຍະ ແລະ ຊຸກຍູ້ການແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນ ທີ່ຍື່ນຕໍ່ສະພາປະຊາຊົນແຂວງ; ກະກຽມແຕ່ຫົວທີໃນການເຂົ້າຮ່ວມການສະເຫຼີມສະຫຼອງປີສາມັກຄີແບບພິເສດລາວ-ຫວຽດນາມ, ຫວຽດນາມ-ລາວ ທີ່ຈະມາເຖິງ; ການເຜີຍແຜ່ເຊື່ອມຊຶມ 4 ມະຕິຂອງຄະນະປະຈໍາສະພາປະຊາຊົນແຂວງ ໃຫ້ກວ້າງຂວາງ ແລະ ຄົ້ນຄວ້າພິຈາລະນາບັນຫາສໍາຄັນອີກຈໍານວນໜຶ່ງ ເຊິ່ງບັນດາທ່ານໃນຄະນະປະຈໍາໄດ້ປະກອບຄໍາຄິດເຫັນດ້ວຍຄວາມເປັນເອກະພາບ ແນໃສ່ເຮັດໃນບັນດາເນື້ອໃນທີ່ນໍາມາຄົ້ນຄວ້າພິຈາລະນາໄດ້ຮັບການຈັດຕັ້ງປະຕິບັດຖືກຕ້ອງ ແລະ ສອດຄ່ອງກັບກົດໝາຍກໍານົດ.

 

ໃນຕອນທ້າຍ ປະທານກອງປະຊຸມ ໄດ້ມີຄໍາເຫັນຊີ້ນໍາ ແລະ ເນັ້ນໃຫ້ຄະນະກໍາມະການ, ຄະນະເລຂາທິການ  ຈົ່ງພ້ອມກັນສືບຕໍ່ເພີ່ມທະວີຍົກສູງ ການຈັດຕັ້ງປະຕິບັດວຽກງານ ຕາມພາລະບົດບາດ, ສິດ ແລະ ໜ້າທີ່ ໃຫ້ມີປະສິດທິພາບ ແລະ ປະສິດທິຜົນ   ໃນການເປັນເສນາທິການໃຫ້ແກ່ສະພາປະຊາຊົນແຂວງ, ຄະນະປະຈຳສະພາປະຊາຊົນແຂວງ.

(ໂດຍ: ນາງ ຄັດສອນ ຮຸ່ງສະຫວ່າງ)