(ສປນວ) ໃນໄລຍະແຕ່ວັນທີ 02-24 ກຸມພາ 2023, ຄະນະປະຈຳ ສະພາປະຊາຊົນ ນະຄອນຫຼວງວຽງຈັນ ລົງຕິດ ຕາມ ແລະ ຊຸກຍູ້ກອງປະຊຸມ ປະຈຳປີ 2022 ຂອງຄະນະສະມາຊິກ ສະພາປະຊາຊົນ ນະຄອນຫຼວງ ປະຈໍາເຂດເລືອກຕັ້ງເມືອງ 09 ເມືອງ ທົ່ວນະຄອນຫຼວງວຽງຈັນ, ມີບັນດາທ່ານຮອງປະທານ ຄະນະກຳມະການ, ຄະນະເລຂາທິການ ແລະ ມີວິຊາການ ຈຳນວນໜຶ່ງ ໃຫ້ການເຂົ້າຮ່ວມໃນການຕິດຕາມ ແລະ ຊຸກຍູ້ກອງປະຊຸມຢູ່ແຕ່ລະເມືອງ, ເຊິ່ງນັບແຕ່ວັນທີ 02 ກຸມພາ 2023 ເຖີງປັດຈຸບັນ ແມ່ນໄດ້ສໍາເລັດແລ້ວ 06 ເມືອງ ແລະ ຈະສືບຕໍ່ລົງຕິດຕາມອີກ 03 ເມືອງ ຄື: ເມືອງນາຊາຍທອງ, ເມືອງສີສັດຕະນາກ ແລະ ເມືອງສີໂຄດຕະບອງ.

          ກອງປະຊຸມດັ່ງກ່າວ ໄດ້ຮັບຟັງການລາຍງານສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນ ການ ປະຈຳປີ 2023 ຂອງຄະນະສະມາຊິກສະພາປະຊາຊົນ ນະຄອນຫຼວງວຽງຈັນ ເພື່ອສະຫຼຸບຕີລາຄາການເຄື່ອນໄຫວວຽກງານໄລຍະຜ່ານມາ ແລະ ວາງທິດທາງແຜນການໃນຕໍ່ໜ້າ. ນອກຈາກນັ້ນ, ຍັງໄດ້ຮັບຟັງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ, ບັນຫາພົ້ນເດັ່ນທີ່ເປັນຫາງສຽງທາງສັງຄົມ ທີ່ຢູ່ໃນຂົງເຂດຮັບຜິດຊອບຂອງບັນດາຫ້ອງການເມືອງ ແລະ ປຶກສາຫາລື, ແນະນຳກ່ຽວກັບວິທີການ, ມາດຕະການແກ້ໄຂ.

ຕອນທ້າຍຂອງກອງປະຊຸມ, ຄະນະປະຈຳ ສະພາປະຊາຊົນ ໄດ້ໃຫ້ການໂອ້ລົມຕໍ່ກອງປະຊຸມ ໂດຍເນັ້ນໜັກໃສ່ການປະຕິບັດພາລະບົດບາດຂອງຄະນະສະມາຊິກ ສະພາປະຊາ ຊົນ ນະຄອນຫຼວງ ປະຈຳເຂດເລືອກຕັ້ງເມືອງ ໃຫ້ມີຄວາມເຂັ້ມ ແຂງຫຼາຍຂຶ້ນ ເພື່ອເຮັດໃຫ້ອົງການປົກຄອງເມືອງ, ບ້ານ ແລະ ພາກສ່ວນກ່ຽວຂ້ອງຮັບຮູ້ ແລະ ເຂົ້າໃຈເລິກເຊິ່ງຂຶ້ນກວ່າເກົ່າ. ( ນາງ ໂຮງທ່າວ ຊົງເຢີ )