ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 15 ກຸມພາ 2022 ຄະນະບໍລິຫານງານຊາວໜຸ່ມສະພາແຫ່ງຊາດ ໄດ້ຈັດກອງປະຊຸມສະຫລຸບການເຄື່ອນໄຫວວຽກງານ ປະຈຳປີ 2021 ແລະ ພິທີມອບໃບຢັ້ງຢືນ 4 ບຸກ ໃຫ້ແກ່ໜ່ວຍຊາວໜຸ່ມຮາກຖານ ພາຍໃນສະພາແຫ່ງຊາດ (ສພຊ) ທີ່ໄດ້ຜ່ານການປະເມີນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ຂອງຄະນະບໍລິຫານງານຊາວໜຸ່ມ ສພຊ ປະຈຳປີ 2021 ໂດຍການເຂົ້າຮ່ວມຂອງສະຫາຍ ຄຳໃບ ດຳລັດ ຮອງປະທານສະພາແຫ່ງຊາດ ແລະ ເປັນປະທານກອງປະຊຸມອງສະຫາຍ ພອນແກ້ວ ຕົ້ນວໍລະຈິດ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ທັງເປັນເລຂາຄະນະບໍລິຫານງານຊາວໜຸ່ມ ສພຊ; ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ສພຊ; ເລຂາ-ຮອງເລຂາໜ່ວຍຊາວໜຸ່ມຮາກຖານແລະ ສະມາຊິກຊາວໜຸ່ມພາຍໃນ ສພຊ ເຂົ້າຮ່ວມ.

ກອງປະຊຸມ, ໄດ້ຮັບຟັງບົດສະຫຼຸບການເຄື່ອນໄຫວວຽກງານປະຈຳປີ 2021 ແລະ ທິດທາງແຜນການເຄື່ອນ ໄຫວ ປະຈຳປີ 2022, ບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ປະຈຳປີ 2021 ແລະ ຂໍ້ຕົກລົງວ່າດ້ວຍການມອບໃບຢັ້ງຢືນໜ່ວຍຊາວໜຸ່ມ 4 ບຸກ ປະຈຳປີ 2021 ໃຫ້ໜ່ວຍຊາວໜຸ່ມຮາກຖານ ພາຍໃນ ສພຊ; ຈາກນັ້ນ, ໄດ້ມີພິທີມອບ-ຮັບໃບຢັ້ງຢືນ 4 ບຸກ ໃຫ້ແກ່ໜ່ວຍຊາວໜຸ່ມຮາກຖານ ສພຊ ຈຳນວນ 15 ໜ່ວຍ ເຊິ່ງມອບໂດຍສະຫາຍ ພອນແກ້ວ ຕົ້ນວໍລະຈິດ.

ໃນໂອກາດນີ້, ສະຫາຍ ຄຳໃບ ດຳລັດ ໄດ້ມີຄຳເຫັນໂອ້ລົມຕໍ່ກອງປະຊຸມເຊິ່ງໄດ້ເນັ້ນໃຫ້ຄະນະບໍລິຫານງານຊາວໜຸ່ມ ສພຊ ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມ ໂດຍຈັດຕັ້ງການເຊື່ອມຊຶມນິຕິກຳ ຂອງພັກ-ລັດ ແລະ ວຽກງານຊາວໜຸ່ມ ໃຫ້ເປັນປົກກະຕິ ມີເນື້ອໃນເລິກເຊິ່ງຕິດແທດກັບຕົວຈິງ; ໃຫ້ບັນດາສະຫາຍສະມາຊິກຊາວໜຸ່ມ ສພຊ ເປັນເຈົ້າການຈັດຕັ້ງຜັນຂະຫຍາຍບັນດາມະຕິ, ຄຳສັ່ງ, ນິຕິກຳທີ່ກ່ຽວຂ້ອງ ເປັນແຜນການ, ແຜນງານ, ໂຄງການ ພ້ອມທັງຕິດຕາມ, ກວດກາ, ກະຕຸກຊຸກຍູ້ ແລະ ປະເມີນຜົນການຈັດຕັ້ງປະຕິບັດ ແລະ ຂໍທິດຊີ້ນຳຈາກຄະນະພັກ, ຄະນະນຳຂັ້ນເທິງ, ຄະນະບໍລິຫານງານຊາວໜຸ່ມ ສພຊ ໃຫ້ເປັນປົກກະຕິ; ສ້າງຂະບວນການແຂ່ງຂັນ ປະຕິບັດວຽກງານວິຊາສະເພາະ ຕິດພັນກັບຂໍ້ແຂ່ງຂັນຮັກຊາດ ພັດທະນາ ແລະ ຂໍ້ແຂ່ງຂັນ 4 ບຸກ ພ້ອມທັງສະຫຼຸບຖອດຖອນບົດຮຽນເປັນປະຈໍາ; ຝຶກຝົນຫຼໍ່ຫຼອມຕົນເອງ ດ້ວຍການຄົ້ນຄວ້າເຊື່ອມຊຶມ ແລະ ຮໍ່າຮຽນເອົາຄຸນສົມບັດ, ສິນທຳປະຕິວັດ, ຄວາມເປັນແບບຢ່າງຂອງການນຳຊາວໜຸ່ມຮຸ່ນກ່ອນ ພ້ອມທັງຝິກຝົນຈາກພຶດຕິກຳຕົວຈິງ ຮຽນກັບທີ່, ລົງຮາກຖານ ໃຫ້ເປັນຂະບວນຟົດຟື້ນ ແລະ ເພີ່ມທະວີການຕິດຕາມກວດກາເປັນປົກກະຕິ, ເອົາໃຈໃສ່ຫາງສຽງປາກົດການຫຍໍ້ທໍ້ທີ່ເກີດຂຶ້ນໃນຖັນແຖວຊາວໜຸ່ມ ເພື່ອແກ້ໄຂໃຫ້ທັນເວລາ ລວມທັງການປະຕິບັດນະໂຍບາຍດ້ານຕ່າງໆ ແລະ ປົກປ້ອງຜົນປະໂຫຍດອັນຊອບທຳຂອງສະມາຊິກຊາວໜຸ່ມ.

(ພາບ ແລະ ຂ່າວ: ອານຸສອນ ພູມມີທອນ)