ຄະນະບໍລິຫານງານຊາວໜຸ່ມສະພາແຫ່ງຊາດ ຈັດພິທີປາຖະກະຖາວັນສ້າງຕັ້ງຊາວໜຸ່ມປະຊາຊົນປະຕິວັດລາວ

(ສພຊ) ເພື່ອຫວນຄືນມູນເຊື້ອແຫ່ງການກໍາເນີດ, ເຕີບໃຫຍ່ຂະຫຍາຍຕົວຂອງຄະນະຊາວໜຸ່ມປະຊາຊົນປະຕິວັດລາວ ໃນໄລຍະພາລະກິດປະຕິວັດ ໃນໄລຍະຕໍ່ສູ້ປົດປ່ອຍຊາດ ແລະ ໄລຍະພາລະກິດປົກປັກຮັກສາ ແລະ ສ້າງສາພັດທະນາປະເທດ ພາຍໃຕ້ການນໍາພາໂດຍກົງຮອບດ້ານຂອງພັກປະຊາຊົນປະຕິວັດລາວ ທີ່ເຕັມໄປດ້ວຍຄວາມອົງອາດກ້າຫານ, ເສຍສະຫຼະຢ່າງພິລະອາດຫານ, ຫ້າວຫັນປະຈັນບານເຂົ້າໃນທຸກວຽກງານຢ່າງສົມກຽດ ແນໃສ່ສ້າງຄວາມຮັບຮູ້, ເຂົ້າໃຈ, ເຊື່ອມຊຶມ, ກໍາແໜ້ນມູນເຊື້ອ, ຄວາມໝາຍ, ຄວາມສໍາຄັນ, ທີ່ຕັ້ງ, ບົດບາດ, ໜ້າທີ່ຂອງການຈັດຕັ້ງຊາວໜຸ່ມ, ຊາວໜຸ່ມລາວບັນດາເຜົ່າ ແລະ ຜັນຂະຫຍາຍເປັນກິດຈະກໍາຕົວຈິງ ເຂົ້າໃນພາລະກິດການເມືອງໃນໄລຍະໃໝ່ຂອງຕົນ; ເຕົ້າໂຮມ ແລະ ປຸກລະດົມກໍາລັງແຮງສັງລວມຂອງທົ່ວສັງຄົມ ແລະ ຊາວໜຸ່ມລາວເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ໃນໄລຍະໃໝ່ ໂດຍສະເພາະການປະຈັນບານເຂົ້າໃນການສະກັດກັ້ນ ແກ້ໄຂບັນຫາປາກົດການຫຍໍ້ທໍ້ທີ່ມີໃນສັງຄົມ ແລະ ການຊຸກຍູ້ການແກ້ໄຂບັນຫາວຽກເຮັດງານທໍາໃຫ້ຊາວໜຸ່ມລາວບັນດາເຜົ່າ ແລະ ເພື່ອເປັນການເຝິກຝົນຫຼໍ່ຫຼອມຄວາມຮູ້ຄວາມສາມາດ ແລະ ຄຸນທາດການເມືອງໃຫ້ຊາວໜຸ່ມ ແນໃສ່ກາຍເປັນຜູ້ສືບທອດພາລະກິດຂອງພັກທີ່ມີຄຸນນະພາບ ໃນວັນທີ 27 ເມສາ 2023 ທີ່ສະພາແຫ່ງຊາດ ຄະນະບໍລິຫານງານຊາວໜຸ່ມສະພາແຫ່ງຊາດ ໄດ້ຈັດພິທີ ປາຖະກະຖາວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 68 ປີ (14 ເມສາ 1955-14 ເມສາ 2023) ໂດຍການເປັນປະທານຂອງສະຫາຍ ພອນແກ້ວ ຕົ້ນວໍລະຈິດ ກໍາມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມສະພາແຫ່ງຊາດ, ມີບັນດາທ່ານຕາງໜ້າຄະນະບໍລິຫານງານພັກສະພາແຫ່ງຊາດ, ຮອງເລຂາ ແລະ ຄະນະປະຈໍາ ຄະນະບໍລິຫານງານຊາວໜຸ່ມສະພາແຫ່ງຊາດ ສະໄໝທີ IV, ກໍາມະການຄະນະບໍລິຫານງານຊາວໜຸ່ມສະພາແຫ່ງຊາດ ສະໄໝທີ IV, ຕາງໜ້າຄະນະສະຫະພັນກໍາມະບານ, ສະຫະພັນແມ່ຍິງ ແລະ ສະມາຊິກຊາວໜຸ່ມພາຍໃນສະພາແຫ່ງຊາດເຂົ້າຮ່ວມ.
ໃນພິທີຄັ້ງນີ້ ຜູ້ເຂົ້າຮ່ວມໄດ້ຮັບຟັງການປາຖະກະຖາວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຈາກສະຫາຍ ບຸນຕາ ເທບພະວົງ ກໍາມະການສໍາຮອງສູນກາງພັກ, ຄະນະພັກສະພາແຫ່ງຊາດ, ຮອງປະທານກໍາມາທິການ ແຜນການ, ການເງິນ ແລະ ການກວດສອບ.
(ພາບ ແລະ ຂ່າວ: ສອນສັກ ວັນວິໄຊ)