ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 61 ປີ (5 ເມສາ 1961 – 5 ເມສາ 2022) ທີ່ໝູນວຽນມາບັນຈົບຄົບຮອບອີກວາລະໜຶ່ງ ໃນຕອນບ່າຍວັນທີ 5 ເມສາ  2022 ນີ້ ຄະນະນໍາສະພາປະຊາຊົນແຂວງໆສະຫວັນນະເຂດ ນໍາໂດຍ ສະຫາຍ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມຄະນະໄດ້ເຂົ້າອວຍພອນ ແລະ  ມອບກະຕ່າຂອງຂວັນ ໃຫ້ກອງບັນຊາການ ປກສ ແຂວງ ໂດຍໃຫ້ການຕ້ອນຮັບຢ່າງອົບອຸ່ນຂອງສະຫາຍ ພັອ. ສົມໝາຍ ພົມມະຈັກ ຄະນະປະຈໍາພັກແຂວງ ຫົວໜ້າກອງບັນຊາການ ປກສ ແຂວງໆສະຫວັນນະເຂດ ພ້ອມຄະນະ.

ນະໂອກາດອັນສະຫງ່າລາສີນີ້ ສະຫາຍ ກົງແກ້ວ ມີວໍລະຈັກ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ກໍາລັງປ້ອງກັນຄວາມສະຫງົບປະຊາຊົນລາວ ກໍຄືກອງບັນຊາການ ປກສ ແຂວງ ທີ່ໄດ້ປະກອບສ່ວນ ທາງດ້ານເຫື່ອແຮງ ແລະ ສະຕິປັນຍາ ເຮັດໃຫ້ປະເທດຊາດ ກໍຄືແຂວງສະຫວັນນະເຂດ ມີຄວາມສະຫງົບສຸກໂດຍພື້ນຖານ ແລະ ອວຍພອນໄຊອັນປະເສີດ ໃຫ້ແກ່ຄະນະພັກ-ຄະນະນໍາ ກອງບັນຊາການ ປກສ ແຂວງ ສະຫວັນນະເຂດ ຈົ່ງມີສຸຂະພາບແຂງແຮງ, ມີຄວາມຈະເລີນຮຸ່ງເຮືອງ, ມີພະລານາໄມທີ່ສົມບູນ ປະສົບຜົນສໍາເລັດໃນໜ້າທີ່ວຽກງານທີ່ຕົນຮັບຜິດຊອບ ພ້ອມທັງໄດ້ມອບກະຕ່າຂອງຂວັນ ໃຫ້ສະຫາຍ ພັອ. ສົມໝາຍ ພົມມະຈັກ  ຊຶ່ງສະຫາຍກໍໄດ້ສະແດງຄວາມຂອບໃຈຢ່າງສູງຕໍ່ຄະນະພັກ-ຄະນະນໍາຂອງ ສພຂ ແຂວງສະຫວັນນະເຂດ ທີ່ເຫັນໄດ້ຄວາມໝາຍຄວາມສໍາຄັນຂອງກໍາລັງ ປກສ ແຂວງ ຢູ່ສະເໝີ ແລະ ຈະສືບຕໍ່ເອົາໃຈໃສ່ຊີ້ນໍາ-ນໍາພາວຽກງານປ້ອງກັນຄວາມສະຫງົບພາຍໃນແຂວງສະຫວັນນະເຂດ ໃຫ້ມີຄວາມເຂັ້ມແຂງ ແລະ ຮັບປະກັນໄດ້ຄວາມສະຫງົບສຸກໂດຍພື້ນຖານ.