(ສພຊ) ໃນລະຫວ່າງວັນທີ 24-27 ເມສາ 2023 ຄະນະຈັດທຳລາຍການກົດໝາຍເພື່ອປະຊາຊົນ ສະພາແຫ່ງຊາດ ໄດ້ສຳເລັດການລົງສຳພາດ 3 ແຂວງພາກໃຕ້ ຄື: ຈຳປາສັກ, ສາລະວັນ ແລະ ອັດຕະປື ໂດຍແມ່ນທ່ານ ສີປະເສີດ ແສນສະຫວັດ ອະດີດຮອງຫົວໜ້າຄະນະໂຄສະນາອົບຮົມສູນກາງພັກ, ອະດີດສະມາຊິກສະພາແຫ່ງຊາດ ທັງເປັນຄະນະຊ່ຽວຊານທີ່ປຶກສາຂອງກົມສື່ມວນຊົນ ຄະນະເລຂາທິການສະພາແຫ່ງຊາດ ແລະ ທ່ານ ຂັນທະວີ ວົງພະຈັນ ຮອງຫົວໜ້າກົມສື່ມວນຊົນ; ມີບັນດາທ່ານເລຂາທິການ-ຮອງເລຂາທິການຈາກສະພາປະຊາຊົນແຂວງຂອງທັງ 3 ແຂວງ ພ້ອມດ້ວຍພະນັກງານ-ວິຊາການຂອງຄະນະຈັດທຳລາຍການກົດໝາຍເພື່ອປະຊາຊົນ ສະພາແຫ່ງຊາດ ເຂົ້າຮ່ວມ.
ຈຸດປະສົງໃນການລົງສຳພາດຄັ້ງນີ້ ແມ່ນເພື່ອເປັນການໂຄສະນາເຜີຍແຜ່ການເຄື່ອນໄຫວຂອງອົງການນິຕິບັນຍັດ ໂດຍສະເພາະສະພາປະຊາຊົນຂັ້ນແຂວງ; ເພື່ອຍົກໃຫ້ເຫັນການຄຸ້ມຄອງລັດ, ຄຸ້ມສັງຄົມດ້ວຍກົດໝາຍຢູ່ຂັ້ນແຂວງ; ເພື່ອໃຫ້ຂະແໜງ ຫຼື ອົງການທີ່ກ່ຽວຂ້ອງ ຍົກໃຫ້ເຫັນຮູບການ, ວິທີການ ແລະ ຂັ້ນຕອນ ໃນການໂຄສະນາເຜີຍແຜ່ກົດໝາຍ ພາຍຫຼັງສະພາແຫ່ງຊາດ ໄດ້ຕົກລົງຮັບຮອງເອົາບັນດາກົດໝາຍໃນກອງປະຊຸມສະໄໝສາມັນແຕ່ລະຄັ້ງ.
ສຳລັບເນື້ອໃນ ແລະ ເປົ້າໝາຍຂອງການສຳພາດ ແມ່ນສຳພາດໃນຮູບແບບການສົນທະນາ ແລະ ສຳພາດຖາມ-ຕອບ ເພື່ອໃຫ້ລາຍການອອກມາໃນຮູບແບບໃໝ່ ໂດຍໃຫ້ມີສາລະປະໂຫຍດແກ່ປະຊາຊົນຜູ້ຮັບຊົມລາຍການ ແລະ ມີສີສັນຂຶ້ນຕື່ມ ສ່ວນເປົ້າໝາຍຜູ້ສຳພາດ ແມ່ນປະກອບມີ: ປະທານ-ຮອງປະທານສະພາປະຊາຊົນຂັ້ນແຂວງ, ປະທານ-ຮອງປະທານຄະນະກຳມະການຍຸຕິທຳ ແລະ ປ້ອງກັນຊາດປ້ອງກັນຄວາມສະຫງົບແຂວງ, ຫົວໜ້າ-ຮອງຫົວໜ້າພະແນກຍຸຕິທຳແຂວງ ແລະ ຄອບຄົວຕົວແບບຈຳນວນໜຶ່ງຂອງແຂວງ.