ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 2 ມິຖຸນາ 2022 ນີ້ ຄະນະກໍາມະການເສດຖະກິດແຜນການ ແລະການເງິນ ສະພາປະຊາຊົນແຂວງສາລະວັນ ໄດ້ເປີດກອງປະຊຸມສະຫຼຸບຕີລາຄາວຽກງານ 6 ເດືອນຕົ້ນປີ ທີ່ຫ້ອງປະຊຸມສະພາປະຊາຊົນແຂວງ ໃຫ້ກຽດເຂົ້າຮ່ວມ ຂອງ ທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານ ສພຂພາຍໃຕ້ການເປັນປະທານ ຂອງ ທ່ານ ນາງ ອາລຸນນີ ອາດວິໄລ ຮອງປະທານຄະນະກໍາມະການເສດຖະກິດ ແຜນການ ແລະການເງິນ ຜູ້ປະຈໍາການ, ມີທ່ານຮອງປະທານຄະນະກໍາມະການ ແລະ  ສສຂ ສັງກັດຄະນະກໍາມະການ, ຫົວໜ້າ-ຮອງຫົວໜ້າພະແນກໃນຂົງເຂດເສດຖະກິດ, ພະນັກງານວິຊາການເຂົ້າຮ່ວມ.

ກອງປະຊຸມຄັ້ງນີ້ໄດ້ຜ່ານຮ່າງບົດສະຫລຸບ ຕີລາຄາການເຄື່ອນໄຫວວຽກງານ ປະຈໍາ 6 ເດືອນຕົ້ນ ແລະທິດທາງແຜນການເຄື່ອນໄຫວວຽກງານ 6 ເດືອນທ້າຍປີ 2022 ຊຶ່ງໃນໄລຍະຜ່ານມາໄດ້ປະຕິບັດພາລະບົດບາດດ້ານິຕິກໍາ ໄດ້ເຂົ້າຮ່ວມກອງປະຊຸມທາບທາມປະກອບຄຳເຫັນຮ່າງກົດໝາຍ ສ້າງໃໝ່-ປັບປຸງ ແລະ ນິຕິກໍາໃຕ້ກົດໝາຍ ລວມທັງໝົດ ຈຳນວນ 07 ສະບັບ; ດ້ານການຕົກລົງບັນຫາສໍາຄັນຂອງທ້ອງຖິ່ນ ໄດ້ຄົ້ນຄວ້າແຜນພັດທະນາເສດຖະກິດ-ສັງຄົມ ຂອງແຂວງ, ແຜນງົບປະມານແຫ່ງລັດຢູ່ຂັ້ນຂອງແຂວງ, ບັນດາໂຄງການລົງທຶນຂອງລັດ-ເອກະຊົນ, ການດັດແກ້ໂຄງການລົງທຶນຂອງລັດ, ຄົ້ນຄວ້າ ແລະປະກອບຄໍາຄິດຄໍາເຫັນໃສ່ການເຄື່ອນໄຫວຂອງວຽກງານກວດສອບ, ວຽກງານກວດກາ ແລະ ໄດ້ມີມະຕິຮັບຮອງໃນກອງປະຊຸມສະໄໝສາມັນ ເທື່ອທີ 02 ແລະ ກອງປະຊຸມຄະນະປະຈໍາຂອງສະພາປະຊາຊົນແຂວງ ຊຸດທີ II ຈໍານວນ 06 ສະບັບ ແລະ ໄດ້ອອກຄໍາແນະນໍາຂອງຄະນະປະຈໍາສະພາປະຊາຊົນແຂວງ 01 ສະບັບ; ໄດ້ຮ່າງຄໍາແນະນໍາ,ຮ່າງ​ຂໍ້​ຕົກລົງ,ຂອງ​ຄະນະ​ປະຈຳ​ສະພາ​ປະຊາຊົນ​ແຂວງ,ກ່ຽວກັບການປະເມີນການຈັດຕັ້ງປະຕິບັດກົດໝາຍ 04 ສະບັບ ແລະ ນິຕິກໍາຕ່າງໆ ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ຢູ່​ຂັ້ນ​​ແຂວງ; ດ້ານການຕິດຕາມກວດກາ ໄດ້ລົງຕິດຕາມກວດກາຄໍາສະເໜີຂອງປະຊາຊົນຕໍ່ກັບບັນຫາການຊົດເຊີຍທີ່ດິນໂຄງການເຊົ່າສໍາປະທານທີ່ດິນປູກກ້ວຍທີ່ບ້ານຫາງພູເມືອງສາລະວັນ; ໄດ້ຄົ້ນຄວ້າກວດກາຄຳສະເໜີ ຂອງປະທານສະພາການຄ້າ ແລະ ອຸດສາຫະກຳ ແຂວງສາລະວັນ ກ່ຽວກັບຂໍ້ສະດວກແລະ ຂໍ້ຫຍຸ້ງຍາກການຊື້-ຂາຍສິນຄ້າກະສິກໍາ (ປະເພດມັນຕົ້ນ) ພາຍໃນແຂວງສາລະວັນ; ໄດ້ຈັດກອງປະຊຸມຕິດຕາມກວດກາ ແລະ ຮັບຟັງການລາຍງານການຈັດຕັ້ງປະຕິບັດວາລະແຫ່ງຊາດ ຂອງພະແນກການຂົງເຂດເສດຖະກິດ; ໄດ້ລົງເຄື່ອນໄຫວຊຸກຍູ້ຕິດຕາມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2022  ແລະ ຕິດພັນກັບສອງວາລະແຫ່ງຊາດ ຢູ່ 8 ເມືອງ; ພ້ອມນັ້ນໄດ້ລາຍງານການຈັດຕັ້ງປະຕິບັດວຽກງານປະຈຳ 06 ເດືອນຕົ້ນ ຂອງພະແນກການ, ຕິດພັນກັບການຈັດຕັ້ງປະຕິບັດ ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຈາກ 6 ພາກສ່ວນໃນຂົງເຂດເສດຖະ ກິດ; ຜ່ານຮ່າງກົນໄກການປະສານງານ ຂອງຄະນະກໍາມະການເສດຖະກິດ, ແຜນການ ແລະ ການເງິນ ກັບ ພະແນກ ການທີ່ກ່ຽວຂ້ອງ. ຫຼັງຈາກນັ້ນ, ໄດ້ພ້ອມກັນປະກອບຄໍາຄິດຄໍາເຫັນ ແລະ ຄົ້ນຄວ້າປຶກສາຫາລືດ້ວຍຄວາມເປັນເອກະພາບ ໂດຍສະເພາະການຈັດຕັ້ງປະຕິບັດ 2 ວາລະແຫ່ງຊາດໃນແຕ່ລະໄລຍະ, ບາງບັນຫາທີ່ເຫັນວ່າມີຜົນກະທົບຕໍ່ກັບການພັດທະນາເສດຖະກິດ-ສັງຄົມຂອງແຂວງ; ທັງນີ້ກໍເພື່ອເປັນຂໍ້ມູນທີ່ສໍາຄັນໃຫ້ ສສຊ ເຂດ 14 ໃນການກະກຽມເຂົ້າຮ່ວມກອງປະຊຸມສະໄໝສາມັນ 3 ຂອງສພຊ ຊຸດທີ IX ທີ່ຈະໄຂຂຶ້ນລະຫວ່າງກາງເດືອນມິຖຸນາທີ່ຈະມາເຖິງ.

(ຂ່າວ: ນາງ ຄັດສອນ ຮຸ່ງສະຫວ່າງ; ພາບ:ດີລໍາພົນ ພົມມະຈັນ)