ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າຂອງວັນທີ 13 ພຶດສະພາ 2022. ທີ່ ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດພິທິເຊັນບົດບັນທຶກການປະສານງານ ລະຫວ່າງ ຄະນະກຳມະການເສດຖະກິດ,ແຜນການ ແລະການເງີນ (ຄສຜງ) ສພຂ. ກັບ ອົງການກວດກາລັດແຂວງ, ພະແນກແຜນການ ແລະ ການລົງທຶນແຂວງ ແລະ ພະແນກການເງີນແຂວງ. ໃຫ້ກຽດເຂົ້າຮ່ວມຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານ ສພຂ.  ຕາງໜ້າເຊັນບົດບັນທຶກໂດຍແມ່ນທ່ານ ສຸກສຳລານ ໄຊຍະແສງ ຮອງປະທານ ສພຂ ປະທານ ຄສຜງ ແລະ ທ່ານ ຄຳຫວັນ ຈັນທະໂຄດ ປະທານອົງການກວດກາລັດແຂວງ, ທ່ານ ສູນນະຄອນ ແກ້ວວຽງຄໍາ ຫົວໜ້າພະແນກແຜນການ ແລະ ການລົງທຶນແຂວງ ແລະ ທ່ານ ຄໍາເຜີຍ ໂສມຖາວອນ ຫົວໜ້າພະແນກການເງີນແຂວງ. ມີບັນດາທ່ານຄະນະກຳມະການ, ຄະນະເລຂາທິການ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ບົດບັນທຶກການປະສານງານ ລະຫວ່າງ ຄະນະກຳມະການເສດຖະກິດ,ແຜນການ ແລະການເງີນ ກັບ ອົງການກວດກາລັດແຂວງ, ພະແນກແຜນການ ແລະ ການລົງທຶນແຂວງ ແລະ ພະແນກການເງີນແຂວງ. ຖືວ່າເປັນບົດບັນທຶກຮ່ວມສະບັບທໍາອິດ ທີ່ຄະນະກຳມະການ ແລະ ພາກສ່ວນດັ່ງກ່າວ ໄດ້ລົງລາຍເຊັນຮ່ວມເປັນລາຍລັກອັກສອນ ເຖິງວ່າໄລຍະຜ່ານມາໄດ້ມີການພົວພັນປະສານງານ ແລະ ເຮັດວຽກຮ່ວມກັນ ຢ່າງໃກ້ຊິດມາໂດຍຕະຫລອດແຕ່ກໍຍັງບໍ່ທັນມີນິຕິກໍາໂດຍສະເພາະທີ່ເປັນບ່ອນອີງ ໃນການພົວພັນປະສານ ງານເຊິ່ງກັນ ແລະ ກັນ ບົດບັນທຶກ 3 ພາດສ່ວນ ແມ່ນໄດ້ກໍານົດຫລັກການ, ຂັ້ນຕອນ, ລະບຽບການ ແລະ ວິທີການປະສານງານ ແນ່ໃສ່ການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດໃນການແກ້ໄຂຜົນການກວດສອບໃຫ້ມີຄວາມຖືກຕ້ອງ, ເປັນທຳ ສາມາດເກັບກູ້ຜົນເສຍຫາຍທາງດ້ານຊັບສີນຂອງລັດຄືນຢ່າງຄົບຖ້ວນ, ຄົ້ນຄວ້າປືກສາຫາລື, ແລກປ່ຽນຂໍ້ມູນຂ່າວສານ ການເຄື່ອນໄຫວງົບປະມານແຫ່ງລັດ ເພື່ອຮັບປະກັນເຮັດໃຫ້ຂະບວນການສ້າງ, ສະຫລຸບ, ການຄຸ້ມຄອງ, ຕິດຕາມກວດກາ, ຊຸກຍູ້ ສົ່ງເສີມການຈັດຕັ້ງປະຕິບັດກົດໝາຍ, ການອອກນິຕິກຳລຸ່ມກົດໝາຍ, ການລາຍງານສະພາບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ, ແຜນພັດທະນາເສດຖະກິດ-ສັງຄົມ ແລະ ການສ້າງແຜນການລົງທຶນຂອງແຂວງ ລາຍງານຕໍ່ສະພາປະຊາຊົນແຂວງ ໃນແຕ່ລະໄລຍະມີຄວວາມໂປ່ງໃສ, ເນັ້ນຄຸນນະພາບ ແລະ ທັນຕາມກຳນັດເວລາ.

(ວິນັດ ສີສຸລາດ)