ເພື່ອເປັນການກະກຽມທາງດ້ານເນື້ອໃນໃຫ້ແກ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 27 ຕຸລາ 2023 ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງໄຊຍະບູລີ ໄດ້ເປີດກອງປະຊຸມຮ່ວມກັບບັນດາພະແນກການ, ອົງການ, ກົມກອງ ໃນຂົງເຂດວັດທະນະທໍາ-ສັງຄົມ ແລະ ບັນດາເຜົ່າ; ຂົງເຂດຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ໃຫ້ກຽດເປັນປະທານຂອງທ່ານ ເພັງນິລັນ ຄຳພັນເພັງ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7 ແຂວງໄຊຍະບູລີ, ໃຫ້ກຽດເຂົ້າຮ່ວມມີບັນດາ ຮອງປະທານສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າພະແນກການ, ອົງການ ກົມກອງ, ຫົວໜ້າ-ຮອງຫົວໜ້າຂະແໜງການ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການລາຍງານສະພາບພົ້ນເດັ່ນໂດຍຫຍໍ້ ໃນການຈັດຕັ້ງປະຕິບັດວຽກງານ 9 ເດືອນ ແລະ ທິດທາງແຜນການ 3 ເດືອນທ້າຍປີ 2023. ພ້ອມດຽວກັນນີ້, ກໍເພື່ອເປັນການເກັບກໍາສັງລວມຂໍ້ມູນພື້ນຖານເພື່ອກະກຽມເຂົ້າຮ່ວມກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX. ຜ່ານມາ ເຫັນວ່າມີຜົນສຳເລັດເປັນຢ່າງດີ, ສັງຄົມມີຄວາມສະຫງົບ, ພື້ນຖານໂຄງລ່າງໄດ້ຮັບການພັດທະນາ, ການຫັນລົງກໍ່ສ້າງການເມືອງພັດທະນາຊົນນະບົດ ແລະ ລົບລ້າງຄວາມທຸກຍາກໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ໃນການຈັດຕັ້ງປະຕິບັດກົດໝາຍ, ນິຕິກໍາຕ່າງໆແມ່ນໄດ້ຮັບການປັບປຸງແກ້ໄຂ, ເປົ້າໝາຍການພັດທະນາເເບບຢືນຍົງເຫັນວ່າໄດ້ບັນລຸເປັນສ່ວນຫຼາຍຊີວິດການເປັນຢູ່ຂອງປະຊາຊົນດີຂື້ນເທຶ່ອລະກ້າວ.

ຫຼັງຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ກໍໄດ້ພ້ອມກັນປະກອບຄຳຄິດຄຳເຫັນເພຶ່ອຕິລາຄາການຈັດຕັ້ງປະຕິບັດວຽກງານໃນໄລຍະ 9 ເດືອນ, ຜ່ານມາໂດຍສະເພາະແມ່ນຂໍ້ສະດວກ ແລະ ຂໍ້ຫຍຸ້ງຍາກຄືແນວໃດ ແລະ ບາງດ້ານທີ່ຍັງຄົງຄ້າງ ແລະ ຊອກວິທີແກ້ໄຂໃນຕໍ່ໜ້າເຮັດໃຫ້ການຈັດຕັ້ງປະຕິບັດມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນແຂວງ ໄດ້ຮັບການຈັດຕັ້ງປະຕິບັດໃຫ້ມີຜົນສຳເລັດຕາມລະດັບຄາດໝາຍທິ່ໄດ້ວາງໄວ້.

ໂດຍ: ອິນທີ ຂຽວສີຟ້າ