ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ເມື່ອບໍ່ດົນຜ່ານມານີ້, ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ໄດ້ລົງຕິດຕາມ, ກວດກາ ແລະ ຊຸກຍູ້ ການບໍລິ ຫານຈັດການ ຢູ່ແຫຼ່ງທ່ອງທ່ຽວ ຫໍພິພິຕະພັນແຫ່ງຊາດຫຼວງພະບາງ, ນໍ້າຕົກຕາດກວາງຊີ ແລະ ຖໍ້າຕິ່ງ ເຊິ່ງນໍາໂດຍ ທ່ານ ປອ ກໍລະກັນ ພົມມະວົງ ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ເຂົ້າຮ່ວມມີ ທ່ານ ສຸວິລັດ ພັນສຸເດດ ຮອງປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ທ່ານ ສີສະຫວາດ ຍີ່ລັດໃຈ ຮອງຫົວໜ້າພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ, ມີບັນດາຫົວໜ້າຂະແໜງ, ຮອງຫົວໜ້າຂະແໜງ, ອໍານວຍການຫໍພິພິຕະພັນແຫ່ງຊາຫຼວງພະບາງ, ຫົວໜ້າຫ້ອງການ, ຮອງຫົວໜ້າຫ້ອງການຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ເມືອງປາກອູ, ເມືອງຈອມເພັດ, ຜູ້ປະກອບການບໍລິສັດໄຟຟ້າຕາດກວາງຊີ ຕະຫຼອດຮອດພະນັກງານວິຊາການ ແລະ ພະນັກງານຮັບຜິດຊອບຢູ່ແຫຼ່ງທ່ອງທ່ຽວດັ່ງ ກ່າວເຂົ້າຮ່ວມ.

ການລົງແຕ່ລະແຫຼ່ງທ່ອງທ່ຽວ ແມ່ນໄດ້ຮັບຟັງການລາຍງານຈາກທ່ານຜູ້ຕາງໜ້າພະແນກຖະ ແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ອໍານວຍການ ຫໍພິພິຕະພັນ ແຫ່ງຊາດຫຼວງພະບາງ ແລະ ຕາງໜ້າ ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເມືອງຈອມເພັດ ແລະ ເມືອງປາກອູກ່ຽວກັບການແບ່ງຄວາມຮັບຜິດຊອບໃນການບໍລິຫານຈັດການຢູ່ແຫຼ່ງທ່ອງທ່ຽວ,ການກະກຽມຄວາມພ້ອມ ເພື່ອຮອງຮັບນັກທ່ອງທ່ຽວ ພາຍຫຼັງ ສປປລາວ ເປີດປະເທດເຕັມຮູບແບບ, ການຊ່ວຍເຫຼືອຈາກພາກລັດ ຫຼື ເອກະຊົນ ໃນການຟື້ນຟູແຫຼ່ງທ່ອງທ່ຽວ, ການເກັບຄ່າທໍານຽມເຂົ້າຊົມແຫຼ່ງທ່ອງທ່ຽວແຕ່ລະແຫ່ງ, ການຄຸ້ມຄອງ ແລະ ປົກປັກຮັກສາແຫຼ່ງທ່ອງທ່ຽວ ແລະ ບັນຫາອື່ນໆ.

ຜ່ານການຮັບຟັງການລາຍງານເຫັນວ່າ ຢູ່ແຕ່ລະແຫຼ່ງທ່ອງທ່ຽວແມ່ນມີລະບົບການຈັດຕັ້ງ ແລະ ມີການແບ່ງຄວາມຮັບຜິດຊອບໃນການຄຸ້ມຄອງ ແລະ ປົກປັກຮັກ ເປັນຕົ້ນ ວຽກງາຄຸ້ມຄອງ, ສ້ອມ ແປງ ແລະ ສິ່ງແວດລ້ອມ, ວຽກງານຮັກສາຄວາມປອດໄພ ແລະ ບໍລິຫານ, ວຽກງານຄຸ້ມຄອງພິພິທະພັນ, ວຽກງານດູແລຮັກສາຄວາມສະຫງົບ-ປອດໄພ, ວຽກງານອະນາໄມຮັກສາຄວາມສະອາດ, ເກັບມ້ຽນຂີ້ເຫຍື້ອ, ວຽກງານອະນາໄມຫ້ອງນໍ້າ, ປູກດອກໄມ, ວຽກງານຍາມປະຕູເຂົ້າຊົມຕາດ ແລະ ຈຸດອ້າບນໍ້າຕ່າງໆ; ຫໍພິພິຕພັນແຫ່ງຊາດ ຫຼວງພະບາງ ມີພະນັກງານທັງໝົດ 22 ທ່ານ, ແຫຼ່ງທ່ອງທ່ຽວນໍ້າຕົກຕາດກວາງຊີ ມີພະນັກງານ 12 ທ່ານ; ແຫຼ່ງທ່ອງທ່ຽວຖໍ້າຕິ່ງ ແມ່ນມີການແຕ່ງຕັ້ງຄະນະຮັບຜິດຊອບເວນຍາມ ແລະ ອານາໄມ ໂດຍເອົາປະຊາຊົນຢູ່ໃນ 4 ບ້ານ ໃນນັ້ນ ເມືອງປາກອູ 2 ບ້ານຄື ບ້ານປາກອູ ແລະ ບ້ານຄົກ, ເມືອງຈອມເພັດ 2 ບ້ານຄືບ້ານມ່ວງແກ້ວ ແລະ ບ້ານຫ້ວຍກໍ້ ເພື່ອພັດປ່ຽນກັນເວນຍາມ ແລະ ອະນາໄມ; ເພື່ອກະກຽມຄວາມພ້ອມ ເພື່ອຮອງຮັບນັກທ່ອງທ່ຽວ ພາຍຫຼັງ ສປປ ລາວ ເປີດປະເທດເຕັມຮູບແບບບັນດາແຫຼ່ງທ່ອງທ່ຽວ ໄດ້ມີການປັບປຸງລະບົບການບໍລິການ, ອະນາໄມຕົ້ນໄມ້ໂດກ ແລະ ປັບປຸງທີວທັດໃຫ້ມີຄວາມສະອາດສວຍງາມ, ປັບປຸງສິ່ງອໍານວຍຄວາມສະດວກ ເປັນຕົ້ນບ່ອນນັ່ງຊົມ, ສະຖານທີ່ຈອດລົດ, ຝຶກອົບຮົມການປະຖົມພະຍາບານເບື້ອງຕົ້ນໃຫ້ພະນັກງານຄຸ້ມຄອງແຫຼ່ງທ່ອງທ່ຽວ.

ຄຽງຄູ່ກັນນັ້ນ ຍັງເຫັນວ່າ ແຫຼ່ງທ່ອງທ່ຽວ ຍັງບໍ່ທັນພັດທະນາສົມຄູ່ກັບຄວາມຮຽກຮ້ອງຕ້ອງ ການ ຂອງນັກທ່ອງທ່ຽວ ຍ້ອນທຶນຮອນທີ່ຈະມານໍາໃຊ້ເຂົ້າໃນການບູລະນະ ຫຼື ປັບປຸງ ບໍ່ພຽງພໍ, ການຄຸ້ມຄອງປ່າໄມ້ ແລະ ສິ່ງແວດລ້ອມຢູ່ບໍລິເວນຖໍ້າຕິ່ງ ຍັງເຮັດບໍ່ທັນໄດ້ດີ, ຫ້ອງນໍ້າຮັບໃຊ້ນັກທ່ອງທ່ຽວຢູ່ຖໍ້າຕິ່ງຄວນໄດ້ຮັບການປັບປຸງ ແລະ ບັນຫາການປະຕິບັດນະໂຍບາຍຕໍ່ພະນັກງານທີ່ຮັບຜິດຊອບຢູ່ 3 ແຫຼ່ງທ່ອງທ່ຽວຍັງເຫັນວ່າມີລັກສະນະຈໍາກັດ.

ການລົງເຄື່ອນໄຫວຕິດຕາມກວດກາຄັ້ງນີ້ ທ່ານ ປອ ກໍລະກັນ ພົມມະວົງ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດ ຊອບແຫຼ່ງທ່ອງທ່ຽວ ແລະ ຮຽກຮ້ອງໃຫ້ຄະນະຮັບຜິດຊອບ ເອົາໃຈ ໃສ່ຍົກສູງຄວາມຮັບຜິດຊອບຂອງຕົນ ໃນການຄຸ້ມຄອງ ແລະ ປົກປັກຮັກສາແຫຼ່ງທ່ອງທ່ຽວໃຫ້ມີຄວາມຍຶນຍົງ, ມີຄວາມສວຍງາມ, ເຮັດໃຫ້ນັກທ່ອງທ່ຽວທີ່ມາທ່ຽວຊົມມີຄວາມປອດໄພ ແລະ ປະທັບໃຈ ເພື່ອເປັນການດຶງດູດນັກທ່ອງທ່ຽວເຂົ້າມາທ່ຽວຊົມໃຫ້ນັບມື້ຫຼາຍຂື້ນ.

   ​​​​​​​​  ໂດຍ: ຄໍາດີ ພັນທະລີ