ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 06 ມິຖຸນາ 2022, ທ່ານ ສົມບັດ ຈັນທະມາດ ຄະນະປະຈຳ, ປະທານຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ສືບຕໍ່ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 06 ເດືອນ ຕົ້ນປີ ແລະ ທິດທາງແຜນການ 06 ເດືອນ ທ້າຍປີ 2022 ຢູ່ພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ໂດຍການຕ້ອນຮັບຂອງທ່ານ ປອ. ເສີມຄຳ ທຸມມະວົງສາ ຫົວໜ້າພະແນກພະລັງງານ ແລະ ບໍ່ແຮ່ ນວ.

ທ່ານ ປອ. ເສີມຄຳ ທຸມມະວົງສາ ຫົວໜ້າພະແນກພະລັງງານ ແລະ ບໍ່ແຮ່ ນວ ໄດ້ລາຍງານໃຫ້ຮູ້ວ່າ: ໄລຍະ 06 ເດືອນ ຕົ້ນປີທີ່ຜ່ານມາ, ພະແນກພະລັງງານ ແລະ ບໍ່ແຮ່ ນວ ໄດ້ນຳໃຊ້ງົບປະມານຂອງລັດ ເຂົ້າໃນການກໍ່ສ້າງ, ຕິດຕັ້ງການສຳຫຼວດ ແລະ ພັດທະນາວຽກງານໃນຂົງເຂດທີ່ຕົນຮັບຜິດຊອບ ຢ່າງມີປະສິດທິຜົນ ເຊິ່ງໄດ້ຈັດຕັ້ງປະຕິບັດບັນດາໂຄງການລົງທຶນຂອງລັດ ທັງໝົດ 08 ໂຄງການ, ປະກອບເອກະສານຂຶ້ນແຜນຊຳລະແລ້ວ 05 ໂຄງການ ແລະ ໄດ້ສຳເລັດໃນການຊຳລະແລ້ວ 01 ໂຄງການ ເທົ່າກັບ 4,54% ຂອງແຜນການ. ສາມາດຈັດເກັບລາຍຮັບຄ່າທຳນຽມເຂົ້າງົບປະມານໄດ້ 31,14% ແລະ ຄ່າບໍລິການວິຊາການໄດ້ 60,6% ທຽບໃສ່ແຜນການປີ 2022; ຊຸກຍູ້ບັນດາບໍລິສັດທີ່ດໍາເນີນກິດຈະການບໍລິການກໍ່ສ້າງ ແລະ ຕິດຕັ້ງໄຟຟ້າ ໃຫ້ເອົາໃຈໃສ່ປະຕິບັດລະບຽບກົດໝາຍທີ່ວາງອອກຢ່າງຄົບຖ້ວນ ແລະ ປະກອບສ່ວນເຂົ້າໃນການພັດທະນາພື້ນຖານໂຄງລ່າງຂອງນະຄອນຫຼວງ; ສຶກສາຄວາມເປັນໄປໄດ້ໃນການຕິດຕັ້ງສະຖານີສາກພາຫະນະ ທີ່ຂັບເຄື່ອນດ້ວຍພະລັງງານໄຟຟ້າ ລວມທັງເກັບກຳຂໍ້ມູນລົດໄຟຟ້າ ແລະ ການເຊື່ອມຕໍ່ເຂົ້າລະບົບຕາຂ່າຍໄຟຟ້າໃນນະຄອນຫຼວງ.​

 

 

 

 

ນອກຈາກນີ້, ກໍໄດ້ສໍາເລັດການລົງເກັບກໍາຂໍ້ມູນລົດໄຟຟ້າ ຈໍານວນ 05 ບໍລິສັດ ທີ່ມີການຈໍາໜ່າຍໃນຂອບເຂດນະຄອນຫຼວງວຽງຈັນ; ເກັບກຳຂໍ້ມູນລະບົບໄຟເຍືອງທາງ, ໄຟອໍານາດ ໂດຍກໍານົດເອົາ 21 ເສັ້ນທາງຫຼັກ; ສຳເລັດການກໍ່ສ້າງ ແລະ ຕິດຕັ້ງໄຟຟ້າພະລັງງານແສງຕາເວັນ ເຊິ່ງມີກຳລັງຕິດຕັ້ງ 4 MW ຂອງບໍລິສັດອີດີແອວເຈນ ໂຊລ້າ ຢູ່ 02 ຈຸດ ຄື: ບ້ານນາປໍ ເມືອງສັງທອງ ແລະ ບ້ານຫາດກ້ຽງ ເມືອງໄຊທານີ ນວ ສຳເລັດ 60% ແລະ ຊຸກຍູ້ບັນດາໂຄງການສາຍສົ່ງໄຟຟ້າແຮງສູງຕ່າງໆ ທີ່ຜ່ານນະຄອນຫຼວງ ໃຫ້ສາມາດຈັດຕັ້ງປະຕິບັດຕາມແຜນການທີ່ວາງໄວ້. ພ້ອມດຽວກັນນີ້, ກໍໄດ້ລົງຕິດຕາມກວດກາການລັກລອບຂຸດຄົ້ນແຮ່ທາດແບບຊະຊາຍ (ບໍ່ມີໃບອະນຸຍາດ) ໂດຍສະເພາະແມ່ນການລັກລອບຂຸດຄົ້ນດິນແດງຢູ່ໃນ 07 ເມືອງ ນວເຊິ່ງໄດ້ປະສານສົມທົບກັບພາກສ່ວນກ່ຽວຂ້ອງ ເພື່ອແກ້ໄຂບັນຫາດັ່ງກ່າວ; ຊຸກຍູ້ສົ່ງເສີມການຂຸດຄົ້ນ ແລະ ປຸງແຕ່ງແຮ່ທາດໃຫ້ຫຼາຍຂຶ້ນ ພ້ອມທັງຫຼຸດຜ່ອນການສົ່ງອອກແຮ່ທາດທີ່ຍັງບໍ່ທັນໄດ້ປຸງແຕ່ງ; ເອົາໃຈໃສ່ຄຸ້ມຄອງ, ກວດກາ, ສົ່ງເສີມການຜະລິດ-ຈຳໜ່າຍ ແລະ ການມອບພັນທະເຂົ້າງົບປະມານ ຂອງບັນດາຫົວໜ່ວຍທີ່ດໍາເນີນການດ້ານບໍ່ແຮ່ ເປັນຕົ້ນແມ່ນການຜະລິດ-ຈຳໜ່າຍ ແຮ່ຄຳ, ແຮ່ເງິນ, ຫີນກໍ່ສ້າງ (ຫີນພູ-ຫີນດານ), ຖ່ານຫີນ, ເກືອກິນ ແລະ ດິນ ປະເພດຕ່າງໆ ໃນນະຄອນຫຼວງວຽງຈັນ.

ໃນຕອນບ່າຍຂອງວັນດຽວກັນ, ຄະນະດັ່ງກ່າວ ກໍໄດ້ລົງເຄື່ອນໄຫວວຽກງານຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2022 ຢູ່ທີ່ພະແນກແຜນການ ແລະ ການລົງທຶນ ນວ ຕື່ມອີກ ໂດຍການຕ້ອນຮັບຂອງທ່ານ ປອ. ນາງ ບົວວອນ ສຸກລາແສງ ຫົວໜ້າພະແນກແຜນການ ແລະ ການລົງທຶນ ນວ.

(ນາງ ພອນທິບ ອິນທິລາດ)