ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ເພື່ອເປັນການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຕາມມະຕິທີ່ສະພາປະຊາຊົນ ນະຄອນຫຼວງວຽງຈັນ ໄດ້ຮັບຮອງເອົາໃນກອງປະຊຸມ ແລະ ຕິດຕາມກວດກາການຈັດຕັ້ງປະຕິບັດແຜນການ 06 ເດືອນ ຕົ້ນປີ ແລະ ແຜນວຽກຈຸດສຸມ 06 ເດືອນ ທ້າຍປີ 2022.  ໃນຕອນບ່າຍຂອງວັນທີ 07ມິຖຸນາ 2022, ທ່ານ ນາງ ພິດສະໄໝ ຕົ້ນສະຫວັນຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ຢູ່ພະແນກໂຍທາທິການ ແລະ ຂົນສົ່ງ (ຍທຂ) ນະຄອນຫຼວງວຽງຈັນໂດຍການຕ້ອນຮັບຂອງທ່ານ ສຸລິວັນ ພົມມະຫາໄຊ ຫົວໜ້າພະແນກໂຍທາທິການ ແລະ ຂົນສົ່ງ ນວ.

ຄະນະລົງເຮັດວຽກ ໄດ້ຮັບຟັງການລາຍງານຈາກທ່ານ ໄຊຍາ ໄຊມຸງຄຸນ ຫົວໜ້າຂະແໜງຈັດຕັ້ງ, ບໍລິຫານ ແລະ ການເງິນ ພະແນກ ຍທຂ ນວ ໂດຍທ່ານໄດ້ໃຫ້ຮູ້ວ່າ: ໃນ 06 ເດືອນຕົ້ນປີ 2022 ທີ່ຜ່ານມາ, ພະແນກ ຍທຂ ນວ ໄດ້ເອົາໃຈໃສ່ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນລົງທຶນຂອງລັດ ດ້ວຍການຄຸ້ມຄອງການກໍ່ສ້າງພື້ນຖານໂຄງລ່າງ, ຖະໜົນຫົນທາງ, ສ້ອມແປງບັນດາເສັ້ນທາງທີ່ເປ່ເພ ດ້ວຍການຖົມຂຸມນ້ອຍ, ຂຸມໃຫຍ່ ແລະ ຕາບຂຸມດ້ວຍຢາງຂົ້ວ,​ປ່ຽນຝາປິດຂຸມພັກນໍ້າ, ອະນາໄມຮ່ອງລະບາຍນໍ້າຕາມແຄມເສັ້ນທາງພາຍໃນຕົວເມືອງ, ຄຸ້ມຄອງວຽກງານທາງນ້ຳ,​ກໍ່ສ້າງຕາຝັ່ງເຈື່ອນ, ຄຸ້ມຄອງການປຸກສ້າງເຄຫາ-ຜັງເມືອງ ໃຫ້ຖືກຕ້ອງຕາມກົດໝາຍຜັງເມືອງ ແລະ ລະບຽບການ, ຄຸ້ມຄອງການຂົນສົ່ງທາງບົກ, ສຸມໃສ່ແກ້ໄຂການສັນຈອນແອອັດ ແລະ ຈັດສັນຄວາມເປັນລະບຽບຮຽບຮ້ອຍຕາມຕົວເມືອງ ດ້ວຍການລົງກວດກາການປຸກສ້າງທີ່ເຮັດຜິດລະບຽບ ແລະ ແກ້ໄຂບັນຫາການຮ້ອງຟ້ອງຜົນກະທົບຈາກການກໍ່ສ້າງ, ກວດກາຄວາມຄືບໜ້າຂອງການປຸກສ້າງ ເພື່ອໃຫ້ເປັນໄປຕາມແບບທີ່ໄດ້ຮັບອະນຸຍາດໃນເບື້ອງຕົ້ນ. ພ້ອມດຽວກັນນີ້, ກໍໄດ້ເອົາໃຈໃສ່ຄຸ້ມຄອງ ແລະ ພັດທະນາກໍ່ສ້າງເສັ້ນທາງເຊື່ອມຕໍ່ບັນດາເສັ້ນທາງຕ່າງໆພາຍໃນເມືອງ ແລະ ກຸ່ມບ້ານ ເພື່ອແນໃສ່ຮອງຮັບການສັນຈອນ ໃຫ້ສາມາດເຊື່ອມຕໍ່ ແລະ ມີຄວາມຄ່ອງຕົວດີຂຶ້ນ ດ້ວຍການກໍ່ສ້າງເສັ້ນທາງເບຕົງ, ອັດສະຟານ ຕາມມາດຖານເຕັກນິກ ແລະ ລະບຽບການທີ່ກຳນົດໄວ້.

ຄຽງຄູ່ກັນນັ້ນ, ໄດ້ສຸມໃສ່ປົກປັກຮັກສາ, ປະສານສົມທົບກັບບັນຫາຫ້ອງການ ຍທຂ ເມືອງ 09 ເມືອງ ນວ ເພື່ອເກັບກຳຂໍ້ມູນ, ຄິດໄລ່ແຜນໃນການກໍ່ສ້າງ ແລະ ສ້ອມແປງບັນດາເສັ້ນທາງໃນຕົວເມືອງ ນະຄອນຫຼວງ ຢ່າງເປັນປົກກະຕິ ເພື່ອຮັບປະກັນໃຫ້ແກ່ການສັນຈອນໄປມາ ມີຄວາມສະດວກດີຕະຫຼອດປີ ເຊັ່ນ: ໄດ້ສຳເລັດໂຄງການສ້ອມແປງເສັ້ນທາງຫຼວງແຫ່ງຊາດ ຂອບເຂດນະຄອນຫຼວງ ຈຳນວນ 04 ເສັ້ນທາງ ຄື: ທາງເລກທີ 13 ເໜືອ, 13 ໃຕ້, ທາງເລກ 10 ແລະ ເລກ 11 ເໜືອ; ສ້ອມແປງເສັ້ນທາງທີ່ເປ່ເພໃນນະຄອນຫຼວງ; ສໍາເລັດໂຄງການກໍ່ສ້າງເສັ້ນທາງເຊື່ອມຕໍ່ແຕ່ສາມແຍກທາງໝາຍເລກ 0120 (ນານົກຂຸ້ມ-ນາໄຊ-ທ່າກົກໄຮ), ໂຄງການສ້ອມແປງ ແລະ ຟື້ນຟູໄພພິບັດ, ໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ໂຄງການກໍ່ສ້າງທາງດ່ວນວຽງຈັນ-ວັງວຽງ. ນອກຈາກນີ້, ກໍໄດ້ລົງເຄື່ອນໄຫວກວດກາລົດບັນທຸກໜັກຕາມເສັ້ນທາງ ແລະ ດ່ານກວດກາຊັ່ງນ້ຳໜັກຂອງແຕ່ລະຈຸດ, ເຊິ່ງໄລຍະ 06 ເດືອນ ຕົ້ນປີ ສາມາດກວດກາລົດບັນທຸກໜັກໄດ້ທັງໝົດ 15.831 ຄັນ ແລະ ໄດ້ປັບໃໝລົດບັນທຸກທີ່ບໍ່ປະຕິບັດຕາມລະບຽບການຂົນສົ່ງທາງບົກ 744 ຄັນ.

(ນາງ ພອນທິບ ອິນທິລາດ)