ດັ້ນກີບເມກ

ຄົນດຽວນີ້ຈໍານວນໜຶ່ງເຮັດຫຍັງລົງໄປບໍ່ມີຄວາມລະອາຍແກ່ໃຈ ແລະ ບໍ່ຢ້ານບາບ, ພະພຸດທະເຈົ້າ ສາສະດາຂອງສາສະໜາພຸດ ສອນຫຼັກທໍາມະ 2 ປະການ ເພື່ອເປັນບ່ອນອີງໃນການຄຸ້ມຄອງສັງຄົມໂລກໃຫ້ຢູ່ກັນຢ່າງສະງົບສຸກ-ໄວ້ໃຈກັນເຊື່ອຖື ແລະ ເຄົາລົບກັນຄື: ຫິຣິ ແລະ ໂອດຕັບປະ.

1. ຫິຣິ ແປວ່າ: ຄວາມລະອາຍແກ່ໃຈ, ຄວາມລະອາຍຕໍ່ບາບ ເຊິ່ງມີຄວາມໝາຍເລິກວ່າ: ຄົນຕ້ອງລະອາຍຕໍ່ບາບທີ່ຕົນເຮັດ, ປະພຶດຜິດລະບຽບ, ສຸດຈະລິດຫຼອກລວງທັງຄໍາເວົ້າ ແລະ ການກະທໍາຫຼັກທໍາມະຄື ຫິຣິນີ້ ເປັນຄຸນນະທໍາປ້ອງກັນບໍ່ໃຫ້ຄົນປະພຶດຊົ່ວເພາະສອນໃຫ້ມີຈິດໃຈຮູ້ສຶກລະອາຍຕໍ່ບາບ-ຕໍ່ການກະທໍາສໍ້ໂກງເວົ້າຕົວະຫຼອກລວງມັນຈຶ່ງເປັນຫຼັກຄຸນນະທໍາໃຫ້ຄົນເຮົາຢູ່ຮ່ວມກັນຢ່າງສະຫງົບສຸກ.

2. ໂອດຕັບປະ ແປວ່າ: ຄວາມຢ້ານກົວຕໍ່ຜົນຂອງຄວາມຊົ່ວ (ບາບ) ທີ່ຕົນໄດ້ເຮັດແລ້ວ ຖ້າວ່າຄົນໃດມີຈິດໃຈຮູ້ສຶກລະອາຍຢ້ານຕໍ່ຜົນຂອງບາບກໍາທີ່ຕົນປະພຶດ ຫຼື ຈະເຮັດຜິດແລ້ວ ຍັງຮູ້ຜົນບາບຂອງບາບກໍາທີ່ຈະຕາມມາ ເຮັດໃຫ້ເດືອດຮ້ອນ, ຖືກສັງຄົມຕໍານິຕິຕຽນ, ໂອດຕັບປະ ເປັນອາການຂອງຈິດໃຈທີ່ເປັນຄຸນນະທໍາ ເຊິ່ງທຸກຄົນຄວນລະນຶກມີໄວ້ໃນແນວຄິດຈິດໃຈ ບໍ່ດັ່ງນັ້ນກໍຈະບໍ່ຢ້ານບາບກໍາ-ໃຊ້ຄໍາເວົ້າຕົວະລວງຄົນອື່ນ ເຮັດແນວນີ້ ຈຶ່ງເປັນສິ່ງທີ່ລະອາຍແກ່ໃຈຕໍ່ບາບກໍາ ຫຼັກທໍາມະ 2 ຂໍ້ນີ້ ເຖິງແມ່ນວ່າມັນສັ້ນແຕ່ກໍມີຄວາມໝາຍກວ້າງຂວາງເລິກເຊິ່ງ ສອນໃຫ້ຄົນເຮົາມີສະຕິລະນຶກໄດ້ ຮູ້ຈັກບາບ-ບຸນ ເພາະຄໍາວ່າ ຫິຣິ ໝາຍເຖິງຄວາມລະອາຍໃຈຕໍ່ການເຮັດບາບ ແລະ ໂອດຕັບປະຄື: ຢ້ານກົວຕໍ່ຜົນຂອງການປະພຶດຊົ່ວຈະຕາມມາ ຖ້າວ່າຄົນໃດຫາກຢ້ານ-ຮູ້ສຶກລະອາຍແກ່ໃຈ ກໍສະແດງວ່າຜູ້ນັ້ນມີຄຸນນະທໍາ 2 ປະການນີ້, ສັງຄົມຈະສະຫງົບສຸກ ແລະ ປາສະຈາກການນິນທາຕໍານິຕິຕຽນໄດ້ຖ້າວ່າຮູ້ຈັກທໍາມະ 2 ຂໍ້ນີ້.