ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

              (ສພຊ) ໃນວັນທີ 8 ມິຖຸນາຜ່ານມາ, ທີ່ໂຮງແຮມເມືອງແທ່ງ ນະຄອນຫຼວງວຽງຈັນ ທ່ານ ພົນຕີ ວັນທອງ ກອງມະນີ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ລາຍງານຄວາມຄືບໜ້າຜົນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021-2023) ຕໍ່ກອງປະຊຸມຍົກສູງຄຸນນະພາບທາງດ້ານເນື້ອໃນໃຫ້ແກ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ວ່າ: ກຳລັງປ້ອງກັນຄວາມສະຫງົບຂັ້ນສູນກາງ ແລະ ທ້ອງຖິ່ນ ໄດ້ຍົກສູງຄວາມຮັບຜິດຊອບຂອງຕົນ ເຂົ້າໃນການເຄື່ອນໄຫວ ຕາມຫຼັກການ ແລະ ວິທີການວິຊາສະເພາະ, ນັບແຕ່ເດືອນກໍລະກົດ 2021 ຮອດວັນທີ 24 ພຶດສະພາ 2022 ສາມາດແກ້ໄຂມ້າງລາຍຄະດີຢາເສບຕິດໃນຂອບເຂດທົ່ວປະເທດໄດ້ 4.094 ເລື່ອງ, ຈັບຜູ້ຖືກຫາໄດ້ 5.818 ຄົນ ຍິງ 618 ຄົນ, ໃນນີ້, ມີຄົນຕ່າງປະເທດ 125 ຄົນ ຍິງ 8 ຄົນ, ຍຶດເຄື່ອງຂອງກາງຄະດີໄດ້ ຄື: ຢາບ້າ 177.752.115 ເມັດ, ນ້ຳໜັກລວມ 17.887,29 ກິໂລກຣາມ, ຢາໄອສ 3.710,84 ກິໂລກຣາມ; ເຮໂຣອິນ 170,85 ກິໂລກຣາມ; ໂຄເຄນ 1,20 ກຣາມ; ຢາຝິ່ນ 11,88 ກຣາມ; ກັນຊາ 6.539,46 ກິໂລກຣາມ; ຢາອີ 2.109 ເມັດ; ແປ້ງຝຸ່ນປະສົມຢາເສບຕິດ 13.345,36 ກິໂລກຣາມ; ເຄຕາມິນ 3,02 ກິໂລກຣາມ; ຄາເຟອິນ 168 ກຣາມ; ຢາເຄມີ 10 ລິດ; ຍຶດລົດໃຫຍ່ 141 ຄັນ, ລົດຈັກ 746 ຄັນ; ມີສິ່ງປຸກສ້າງ ແລະ ທີ່ດິນ ທີ່ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ໄດ້ອາຍັດ ເຊິ່ງກ່ຽວພັນກັບຄະດີຢາເສບຕິດ ຈຳນວນ 29 ເລື່ອງ, ມີດິນທັງໝົດ 326 ຕອນ; ສິ່ງປຸກສ້າງຈຳນວນ 166 ຫຼັງ, ມີດິນເປົ່າຫວ່າງ, ດິນນາ, ດິນສວນ ລວມມີ 112 ຕອນ, ໂຮງເເຮມ 4 ແຫ່ງ, ເຮືອນພັກ 2 ແຫ່ງ; ຕະຫຼາດ 2 ແຫ່ງ; ສວນຢາງພາລາ 70 ຕອນ, ສວນປາມ 1 ຕອນ, ຟາມງົວ 1 ຕອນ ແລະ ວັດຖຸເຄື່ອງຂອງກາງອື່ນໆອີກຫຼາຍລາຍການ.
               ໄດ້ຂຶ້ນບັນຊີເປົ້າໝາຍຂົນສົ່ງ-ຄ້າຂາຍຢາເສບຕິດທົ່ວປະເທດ ມີ 1.969 ຄົນ ຍິງ 176 ຄົນ, ບັນຊີເປົ້າໝາຍຢາເສບຕິດທີ່ໂຕນໜີຈາກຄ້າຍຄຸມຂັງ ມີ 7 ຄົນ ຍິງ 0 ຄົນ, ບັນຊີເປົ້າໝາຍຢາເສບຕິດທີ່ພົ້ນໂທດອອກໄປແລ້ວ ຍັງມີການເຄື່ອນໄຫວ 196 ຄົນ ຍິງ 13 ຄົນ, ບັນຊີເປົ້າໝາຍຢາເສບຕິດ ທີ່ມີຄຳສັ່ງຈັບຕົວຈາກອົງການໄອຍະການປະຊາຊົນ ມີ 100 ຄົນ ຍິງ 30 ຄົນ.
               ໄດ້ສົມທົບກັບພາກສ່ວນກ່ຽວຂ້ອງ, ອົງການປົກຄອງທ້ອງຖິ່ນ ສຳຫຼວດ ແລະ ທໍາລາຍສວນຝິ່ນ 569 ເຮັກຕາ, ທຳລາຍສວນກັນຊາ 4,2 ເຮັກຕາ ແລະ ສ້າງບົດບັນທຶກຢຸດເຊົາການປູກຝິ່ນກັບ 12.859 ຄອບຄົວ. ນອກຈາກນັ້ນ, ຍັງໄດ້ອອກໃບຢັ້ງຢືນໃຫ້ແກ່ບັນດາບໍລິສັດ ທີ່ເຂົ້າຮ່ວມປະຕິບັດໂຄງການປູກພືດທົດແທນການປູກຝິ່ນຢູ່ ສປປລາວ ຈໍານວນ 50 ບໍລິສັດ, ບໍລິສັດເຫຼົ່ານີ້ໄດ້ສຸມໃສ່ຊຸກຍູ້ສົ່ງເສີມດ້ານສີມືແຮງງານ ແລະ ຈັດສັນອາຊີບໃຫ້ປະຊາຊົນໄດ້ 981 ບ້ານ, ປະຊາຊົນໄດ້ຮັບຜົນປະໂຫຍດຫຼາຍກວ່າ 44.043 ຄອບຄົວ; ໂຄງການພັດທະນາທາງເລືອກທົດເເທນການປູກພືດທີ່ມີສານເສບຕິດ ທີ່ໄດ້ຮັບການສະໜັບສະໜູນຈາກສາກົນ ເຊິ່ງໄດ້ເຊັນສັນຍາກັບບໍລິສັດຂອງເອກະຊົນ ໃນການຊື້ຂາຍ, ສົ່ງອອກກາເຟ (ໃນປີ 2021) ໄດ້ສົ່ງອອກກາເຟແລ້ວຈຳນວນ 20 ໂຕນ.