ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອເປັນການຈັດຕັ້ງປະຕິບັດຕາມ ກົດໝາຍ ວ່າດ້ວຍສະພາປະຊາຊົນຂັ້ນແຂວງ ສະບັບເລກທີ 65/ສພຊ ລົງວັນທີ 10 ທັນວາ 2015 ໃນໝວດທີ 4 ມາດຕາ 78 ກ່ຽວກັບກອງປະຊຸມວຽກງານຄະນະເລຂາທິການ ສະພາປະຊາຊົນຂັ້ນແຂວງ (ສພຂ); ສະນັ້ນ,ມາໃນຕອນເຊົ້າຂອງວັນທີ 19 ກໍລະກົດ 2022 ນີ້, ຢູ່ທີ່ຫ້ອງປະຊຸມ ສພຂ ຄະນະເລຂາທິການ ສພຂ ສາລະວັນ ໄດ້ເປີດກອງປະຊຸມ ສະຫຼຸບວຽກງານການເຄື່ອນໄຫວ ປະຈໍາ 6 ເດືືອນຕົ້ນ ແລະ ວາງທິດທາງແຜນການ ປະຈໍາ 6 ເດືອນທ້າຍປີ 2022 ຂອງຕົນຂຶ້ນຢ່າງເປັນທາງການ, ໂດຍການເປັນປະທານກອງປະຊຸມຂອງ ທ່ານ ສົມພອນ ແສງສຸລິຈັນ ເລຂາທິການ ສພຂ, ໃຫ້ກຽດເຂົ້າຮ່ວມຂອງ ທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານ ສພຂ, ເຂົ້າຮ່ວມມີຮອງປະທານ ສພຂ, ປະທານ-ຮອງປະທານຄະນະກຳມະການ, ຄະນະເລຂາທິການ, ພ້ອມດ້ວຍ ຫົວໜ້າຄະນະສະມາຊິກສະພາປະຊາຊົນແຂວງ (ສສຂ) ປະຈໍາເຂດເລືອກຕັ້ງ 8 ຕົວເມືອງ ແລະ ສສຂ ອ້ອມຂ້າງແຂວງ (ເຂົ້າຮ່ວມແບບວີດີໂອທາງໄກ), ຕະຫຼອດຮອດພະນັກງານ-ລັດຖະກອນ ພາຍໃນ ສພຂ ເຂົ້າຮ່ວມໃນຄັ້ງນີ້.

ໃນທີ່ປະຊຸມ ທ່ານ ສະນັ່ນ ພິມພິສານ ຮອງເລຂາການ ສພຂ ໄດ້ຜ່ານຮ່າງບົດສະຫຼຸບວຽກງານການເຄື່ອນໄຫວ ປະຈໍາ 6 ເດືືອນຕົ້ນ ແລະ ວາງທິດທາງແຜນການ ປະຈໍາ 6 ເດືອນທ້າຍປີ 2022 ລວມມີດ້ານດີ, ແລະ ຜົນສຳເລັດ, ໂດຍຕະຫຼອດໄລຍະ 6 ເດືອນຜ່ານມາ ຄະນະເລຂາທິການໄດ້ເອົາໃຈໃສ່ສຶກສາອົບຮົມດ້ານການເມືອງ-ແນວຄິດ ໃຫ້ສະມາຊິກພັກ ພະນັກງານ-ລັດຖະກອນ ຂອງຕົນດ້ວຍຫຼາຍຮູບການ ເປັນຕົ້ນ: ຊຸກຍູ້ພະນັກງານ-ລັດຖະກອນ ເຂົ້າຮ່ວມເຊື່ອມຊຶມແນວທາງນະໂຍບາຍ, ມະຕິ, ຄຳສັ່ງ, ກົດໝາຍ, ຮັບຟັງການເລົ່າມູນເຊື້ອວັນສຳຄັນຕ່າງໆ ຂອງຊາດ-ຂອງພັກ ເຫັນວ່າພະນັກງານ-ລັດຖະກອນ ມີຄວາມເຂົ້າໃຈຢ່າງເລິກເຊິ່ງ ແລະ ເຊື່ອໝັ້ນຕໍ່ການນຳພາຂອງພັກ, ມີທັດສະນະຫຼັກໝັ້ນການເມືອງໜັກແໜ້ນ ມີຄວາມອຸ່ນອ່ຽງ, ທຸ່ນທ່ຽງ ເອົາໃຈໃສ່ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ແລະ ເຮັດໃຫ້ວຽກງານມີປະສິດທິຜົນ ແລະ ປະສິດທິພາບສູງ; ຄະນະເລຂາທິການ ສພຂ ໄດ້ຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ ຕາມທີ່ໄດ້ກຳນົດໄວ້ໃນກົດໝາຍ ໃນນັ້ນ,ໄດ້ເປັນເສນາທິການດ້ານເນື້ອໃນໃຫ້ແກ່ ສພຂ, ຄະນະປະຈໍາ ສພຂ, ຄະນະ ສສຊ ປະຈໍາເຂດເລືອກຕັ້ງທີ 14 ອັນທີ່ພົ້ນເດັ່ນ: ແມ່ນໄດ້ສັງລວມເນື້ອໃນຮັບຮອງເອົານິຕິກຳໃຕ້ກົດໝາຍ ຈຳນວນ 4 ສະບັບ, ອອກຄຳແນະນຳ ກ່ຽວກັບການຜັນຂະຫຍາຍ ການຈັດຕັ້ງປະຕິບັດ 2 ວາລະແຫ່ງຊາດ ຈຳນວນ 2 ສະບັບ, ໄດ້ສັງລວມເອົາບັນຫາສຳຄັນຂອງແຂວງ ອອກເປັນມະຕິຂອງຄະນະປະຈໍາ ສພຂ ໃນເວລາກອງປະຊຸມສະໄໝສາມັນ ບໍ່ໄດ້ເປີດ ໄດ້ຈຳນວນ 5 ສະບັບ ພ້ອມນັ້ນ, ກໍ່ຍັງມີວຽກງານການຄຸ້ມຄອງວຽກງານບໍລິຫານ, ແຜນການ ແລະ ການເງິນ, ຄຸ້ມຄອງວຽກງານການຈັດຕັ້ງ-ພະນັກງານ  ແນ່ໃສ່ສ້າງສິ່ງອຳນວຍຄວາມສະດວກ ໃຫ້ແກ່ການເຄື່ອນໄຫວວຽກງານຂອງ ສພຂ;

ໂອກາດກຽວກັນ ບັນດາທ່ານທີ່ເຂົ້າຮ່ວມກອງປະຊຸມ ແບບເຊິ່ງໜ້າ ແລະ ແບບວີດີໂອທາງໄກ ໄດ້ສຸ່ມໃສ່ ປະກອບຄຳຄິດຄຳເຫັນ ຢ່າງເປັນເຈົ້າການ ໂດຍຕິດພັນກັບໜ້າທີ່ການເມືອງທີ່ຕົນຮັບຜິດຊອບ ເຂົ້າໃສ່ຮ່າງບົດສະຫຼຸບວຽກງານການເຄື່ອນໄຫວ ປະຈໍາ 6 ເດືືອນຕົ້ນ ແລະ ວາງທິດທາງແຜນການ ປະຈໍາ 6 ເດືອນທ້າຍປີ 2022 ເພື່ອແນໃສ່ໃຫ້ຮ່າງບົດສະຫຼຸບມີເນື້ອໃນຄົບຖ້ວນ, ສົມບູນ ແລະ ເທດເໝາະກັບຕົວຈິງ ທີ່ຈະເປັນບ່ອນອີງໃສ່ແກ່ການຈັດຕັ້ງປະຕິບັດວຽກງານຂອງຄະນະເລຂາທິການ ສພຂ ໃນຕໍ່ໜ້າໃຫ້ມີຜົນສຳເລັດຕາມແຜນການທີ່ວາງໄວ້.

ຕອນທ້າຍ ທ່ານ ຂັນໄຊ ລັດຖະເຮົ້າ ໄດ້ໃຫ້ກຽດໂອລົມ ແລະ ເນັ້ນໃຫ້ຄະນະເລຂາທິການ ສພຂ ສືບຕໍ່ຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ເຊັ່ນ: ສືບຕໍ່ເອົາໃຈໃສ່ຊີ້້ນໍາ-ນໍາພາ ວຽກງານການສຶກສາອົບຮົມການເມືອງແນວຄິດ ຢ່າງເປັນປົກກະຕິ; ປັບປຸງກົງຈັກການຈັດຕັ້ງຕ້ອງບົນພື້ນຖານກະທັດລັດ ໂດຍຖືປະສິດທິຜົນໃນການປະຕິບັດໜ້າທີ່ຂອງພະນັກງານ-ລັດຖະກອນ ຜູ້ໜຶ່ງເຮັດວຽກໄດ້ຫຼາຍຢ່າງ; ສືບຕໍ່ເປັນເຈົ້າປະຕິບັດວຽກງານວິຊາສະເພາະ ໃນການເປັນເສນາທິການໃຫ້ແກ່ ສພຂ, ຄະນະປະຈໍາ ສພຂ ແລະ ຄະນະ ສສຊ ປະຈໍາເຂດເລືອກຕັ້ງຢ່າງຕໍ່ເນື່ອງ; ສືບຕໍ່ກະກຽມຄວາມພ້ອມຮອບດ້ານໃຫ້ແກ່ກອງປະຊຸມຮ່ວມລະຫວ່າງ ສພຂ ກັບ ອົງການປົກຄອງແຂວງ ແລະ ກອງປະຊຸມສະໄມສາມັນເທື່ອທີ 3 ຂອງ ສພຂ ສາລະວັນ ຊຸດທີ II ທີ່ຈະເປີດຂຶ້ນໃນຕົ້ນເດືອນ ສິງຫາ ທີ່ຈະມາເຖິງນີ້ ໃຫ້ມີຜົນສຳເລັດຢ່າງຈົບງາມ.