ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

        ໂດຍຕອບສະໜອງຕາມຄໍາເຊີນຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ, ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ປະທານສະພາແຫ່ງຊາດ ແຫ່ງຣາຊະອານາຈັກກໍາປູເຈຍ ພ້ອມດ້ວຍຄະນະ ເລີ່ມຕົ້ນຢ້ຽມຢາມ ສປປລາວ ຢ່າງເປັນທາງການ ໃນລະຫວ່າງວັນທີ 14-16 ກັນຍານີ້ ເພື່ອເປັນການຮັດແໜ້ນສາຍພົວພັນຮ່ວມມື ລະຫວ່າງ ສອງສະພາແຫ່ງຊາດລາວ ແລະ ກໍາປູເຈຍ ກໍຄືປະຊາຊົນສອງປະເທດ ໃຫ້ນັບມື້ເລິກເຊິ່ງກວ້າງຂວາງຂຶ້ນກວ່າເກົ່າ.

ນັບແຕ່ ສປປລາວ ແລະ ຣາຊະອານາຈັກກຳປູ ເຈຍ ໄດ້ຕົກລົງຍົກລະດັບການພົວພັນຂອງທັງສອງປະ ເທດ ຂຶ້ນເປັນ “ການພົວພັນແບບຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ” ໃນປີ 2019, ການພົວພັນຮ່ວມມືລະຫວ່າງສອງປະເທດ ໄດ້ມີຄວາມຄືບໜ້າຂຶ້ນເລື້ອຍໆ.

ລາວ ແລະ ກຳປູເຈຍ ໄດ້ມີສາຍພົວພັນມິດຕະພາບ ທີ່ເປັນມູນເຊື້ອອັນດີງາມ ຖານບ້ານໃກ້ເຮືອນຄຽງ, ບ້ານແກ່ວເມືອງດອງທີ່ດີມາແຕ່ດົນນານ, ປະຊາຊົນໄປມາຫາສູ່ກັນ, ມີຮີດຄອງປະເພນີວັດທະນະທຳຄ້າຍຄືກັນ ແລະ ມີຄວາມເຂົ້າອົກເຂົ້າໃຈກັນເປັນຢ່າງດີ, ເຄີຍໄດ້ຄຽງບ່າຄຽງໄຫຼ່ກັນຕໍ່ສູ້ຕ້ານພວກຈັກກະພັດລ່າເມືອງຂຶ້ນຜູ້ຮຸກຮານ ຈົນສາມາດປົດປ່ອຍປະເທດຊາດຢ່າງສົມບູນ ໃນປີ 1975 ແລະ ພ້ອມກັນສືບຕໍ່ພັດທະນາປະເທດຊາດຂອງຕົນ. ນັບແຕ່ສອງປະເທດ ໄດ້ສ້າງຕັ້ງສາຍພົວພັນທາງການທູດນຳກັນ ໃນວັນທີ 15 ມິຖຸນາ 1956 ເປັນຕົ້ນມາ, ການນໍາທຸກຂັ້ນ ນັບແຕ່ສູນກາງ ຈົນຮອດທ້ອງຖິ່ນ ແລະ ປະຊາຊົນ ຂອງສອງປະເທດ ລາວ-ກຳປູເຈຍ ໄດ້ມີການແລກປ່ຽນການຢ້ຽມຢາມກັນຢ່າງເປັນປົກກະຕິ. ມາຮອດຊຸມປີມໍ່ໆມານີ້ ໄດ້ມີການຈັດຕັ້ງກອງປະຊຸມຄະນະກຳມະການຮ່ວມ ວ່າດ້ວຍການຮ່ວມມືສອງຝ່າຍລາວ-ກຳປູເຈຍ (JC ລາວ-ກຳ ປູເຈຍ); ນາຍົກລັດຖະມົນຕີ ສປປລາວ ໄດ້ມີການພົບປະບັນດາການນໍາຂອງແຂວງຊາຍແດນຂອງສອງປະເທດ ໃນເດືອນພຶດສະພາປີ 2022 ນີ້ ອັນເປັນການສ້າງພື້ນຖານສໍາຄັນໃຫ້ແກ່ບັນດາທ້ອງຖິ່ນ ໃນການເສີມຂະຫຍາຍການພົວພັນຮ່ວມມື ແລະ ການຊ່ວຍເຫຼືອ ເຊິ່ງກັນ ແລະ ກັນຫຼາຍດ້ານ ນອກນັ້ນ ສານປະຊາຊົນສູງສຸດ ຂອງສາມປະ ເທດ ກຳປູເຈຍ, ລາວ ແລະ ຫວຽດນາມ ໄດ້ຈັດການພົບ ປະສາມຝ່າຍ ທີ່ນະຄອນຫຼວງວຽງຈັນ ດ້ວຍຜົນສຳເລັດອັນຈົບງາມ.
ສະພາແຫ່ງຊາດ ແຫ່ງ ສປປລາວ ແລະ ສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ໄດ້ມີການພົວພັນ ຮ່ວມມືອັນດີນຳກັນຢ່າງເປັນປົກກະຕິມາໂດຍຕະຫຼອດ, ມີການແລກປ່ຽນຄະນະຜູ້ແທນຂັ້ນຕ່າງໆຂອງສະພາແຫ່ງຊາດ ຂອງສອງປະເທດ, ມີການປະສານສົມທົບ, ສະໜັບສະ ໜູນກັນໃນເວທີຫຼາຍຝ່າຍ, ໃນເວທີລັດຖະສະພາພາກພື້ນ ແລະ ສາກົນ; ນອກນັ້ນ ຍັງຮ່ວມກັນຊຸກຍູ້ ແລະ ຕິດຕາມກວດກາການຈັດຕັ້ງປະຕິບັດບັນດາສັນຍາ ແລະ ສົນທິສັນ ຍາ ທີ່ລັດຖະບານ ແລະ ບັນດາຂະແໜງການໄດ້ລົງນາມຮ່ວມກັນ, ອັນໄດ້ເຮັດໃຫ້ການພົວພັນລະຫວ່າງສອງຝ່າຍນັບມື້ນັບມີປະສິດທິຜົນ. ການມາຢ້ຽມຢາມ ສປປລາວ ຄັ້ງນີ້ ຂອງປະທານສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ ເປັນການປະກອບສ່ວນສໍາຄັນໃນການເພີ່ມພູນຄູນສ້າງສາຍພົວພັນທີ່ມີມູນເຊື້ອດີງາມ ໃຫ້ງອກງາມຍິ່ງໆຂຶ້ນ.

ທຸກຂະແໜງການຂອງສອງປະເທດ ນັບແຕ່ສູນກາງ ແລະ ທ້ອງຖິ່ນ ໄດ້ຮ່ວມກັນລົງນາມ ໃນບັນດາສົນທິສັນ ຍາ, ສັນຍາ, ບົດບັນທຶກ ແລະ ນິຕິກຳອື່ນໆ ຈຳນວນ 40 ກວ່າສະບັບ ທີ່ພົວພັນເຖິງການຮ່ວມມື ດ້ານການເມືອງ- ການຕ່າງປະເທດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນ, ການຄົມມະ ນາຄົມ-ຂົນສົ່ງ, ການສຶກສາ-ກິລາ, ການທ່ອງທ່ຽວ ແລະ ອື່ນໆ. ການຮ່ວມມືດ້ານການຄ້າ ແລະ ການລົງທຶນ ມີທ່າອ່ຽງເຕີບໃຫຍ່ຂະຫຍາຍຕົວ ເຊິ່ງມູນຄ່າການຄ້າສາມາດບັນລຸໄດ້ຫຼາຍກວ່າ 160 ລ້ານໂດລາ; ບັນດານັກທຸລະກິດ ກຳປູເຈຍ ເຂົ້າມາລົງທຶນຢູ່ລາວໃຫ້ຫຼາຍຂຶ້ນກວ່າເກົ່າ. ສອງຝ່າຍໄດ້ຖືສໍາຄັນວຽກງານຊາຍແດນ ເພື່ອສ້າງໃຫ້ເສັ້ນຊາຍແດນ ເປັນຊາຍແດນແຫ່ງສັນຕິພາບ ມິດຕະພາບ ແລະ ການຮ່ວມມື ເຊິ່ງມາເຖິງປັດຈຸບັນນີ້, ສອງຝ່າຍໄດ້ຕົກລົງກັນໄດ້ 86% ຂອງເສັ້ນຊາຍແດນທັງໝົດ ເຊິ່ງເປັນການເຮັດໃຫ້ການພົວພັນຮ່ວມມື ລະຫວ່າງປະຊາຊົນຢູ່ເຂດຊາຍແດນຂອງ ສອງປະເທດ ມີຄວາມສະຫງົບ, ເປັນລະບຽບຮຽບຮ້ອຍດີ.
ອວຍພອນໃຫ້ການມາຢ້ຽມຢາມ ສປປລາວ ຂອງ ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ປະ ທານສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ ໃນຄັ້ງນີ້ ບັນລຸຕາມຈຸດປະສົງທຸກປະການ.