ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນເຊົ້າຂອງວັນທີ 17 ມີນາ 2022 ນີ້; ຢູ່ທີ່ຫ້ອງປະຊຸມ VIP ຊັ້ນສອງຂອງສະໂມສອນແຂວງສາລະວັນ ທ່ານ ນາງ ປິ່ງຄຳ ລາຊະສິມມາ ກຳມະການສູນກາງພັກ, ກຳມະການຄະນະປະຈໍາ ສະພາແຫ່ງຊາດ (ສພຊ) ເລຂາທິການ ສພຊ ພ້ອມດ້ວຍຄະນະທີມງານຈາກ ສພຊ ໄດ້ເຄື່ອນໄຫວຕິດຕາມຊຸກຍູ້ ແລະ ເກັບກຳຂໍ້ມູນ ການເຄື່ອນໄຫວວຽກງານຂອງຄະນະເລຂາທິການ (ຄລສຂ) ສະພາປະຊາຊົນຂັ້ນແຂວງ (ສພຂ); ໂດຍຕ້ອນຮັບ ແລະ ເຂົ້າຮ່ວມເຮັດວຽກໃນຄັ້ງນີ້ຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ; ມີຄະນະປະທານ ສພຂ, ຄະນະປະຈໍາ, ຄະນະກຳມະການ, ຄະນະເລຂາທິການ ຕະຫຼອດຮອດພະນັກງານ-ລັດຖະກອນ ພາຍໃນ ສພຂ ເຂົ້າຮ່ວມໃນຄັ້ງນີ້.

ໃນທີ່ປະຊຸມ ທ່ານ ສົມພອນ ແສງສຸລິຈັນ ຄະນະປະຈໍາ ສພຂ, ເລຂາທິການ ສພຂ ໄດ້ຂຶ້ນລາຍງານ ໂດຍຫຍໍ້ ກ່ຽວກັບສະພາບລວມຂອງການຈັດຕັ້ງປະຕິບັດວຽກງານໃນໄລຍະຜ່ານມາ ກໍ່ຄືການປະຕິບັດພາລະບົດບາດ, ສິດ ແລະ ໜ້າທີ່ ໃນການເປັນເສນາທິການຮອບດ້ານໃຫ້ແກ່ ສພຂ, ຄະນະປະຈໍາ ສພຂ ແລະ ບັນດາຄະນະກໍາມະການ  ກໍ່ຄືບັນດາທ່ານສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ (ສສຂ) ແລະ ວຽກງານອື່ນໆ, ເຊິ່ງສາມາດເຫັນໄດ້ຜົນສໍາເລັດໃນຫຼາຍດ້ານເປັນສ່ວນໃຫຍ່ ແລະ ມີບາງບັນຫາຂໍ້ຫຍຸ້ງຍາກບາງດ້ານ ທີ່ ຄລສຂ, ທີ່ຈະຕ້ອງໄດ້ເພີ່ມທະວີຄວາມສາມາດໃນການຈັດຕັ້ງປະຕິບັດວຽກງານໃຫ້ມີຜົນສໍາເລັດຕາມແຜນວຽກທີ່ຈະສືບຕໍ່ໃນຕໍ່ໜ້າ.

ຈາກນັ້ນ, ກອງປະຊຸມໄດ້ມີການສົນທະນາລຽກປ່ຽນບົດຮຽນແບບເຊິ່ງໜ້າ ລົງເລິກເຂົ້າໃສ່ຂອດກົນໄກການປະສານງານລະຫວ່າງ ຄລສ ສພຊ ກັບ ຄລສຂ ຂັ້ນທ້ອງຖິ່ນ ເປັນຕົ້ນ: ວຽກງານປັບປຸງກົງຈັກການຈັດຕັ້ງ ກໍານົດພະນັກງານນໍາພາຄຸ້ມຄອງ, ວຽກງານຍົກສູງຂີດຄວາມສາມາດ ແລະ ວຽກງານໂຄງການແຜນກໍ່ສ້າງຕຶກອາຄານຫຼັງໃໝ່ ແລະ ວຽກງານປິ່ນອ້ອມຈຳນວນໜຶ່ງ, ທັງໝົດແນໃສ່ເພື່ອປັບປຸງ ແລະ ຊຸກຍູ້ແກ້ໄຂບາງຂໍ້ຄົງຄ້າງ ບາງວຽກງານໃຫ້ມີຄວາມສອດຄ່ອງກົມກຽວກັນຍິ່ງຂື້ນ.

ທ່ານ ນາງ ປິ່ງຄຳ ລາຊະສິມມາ ໄດ້ເນັ້ນໃນຕອນທ້າຍທີ່ປະຊຸມວ່າ: ເພື່ອເຮັດໃຫ້ວຽກງານເປັນເສນາທິການ ໃຫ້ແກ່ ສພຂ, ຄະນະປະຈໍາ ສພຂ ແລະ ບັນດາຄະນະກໍາມະການ, ສສຊ, ສສຂ ຕ້ອງເພີ່ມທະວີ ຊີ້ນຳໆພາຈັດຕັ້ງປະຕິບັດໜ້າທີ່ຂອງຕົນ ຕາມພາລະບົດບາດ, ສິດ ແລະ ໜ້າທີ ທີ່ກຳນົດໄວ້ໃນກົດໝາຍ ໃຫ້ມີຜົນສຳເລັດ; ພ້ອມທັງສ້າງຄວາມເຂັ້ມແຂວງພາຍໃນ ຄລສຂ ແລະ ຂະແໜງທີ່ຂຶ້ນກັບ ຄລສຂ ຮອງຮັບໃຫ້ແກ່ບັນດາວຽກງານໃນຕໍ່ໜ້າ.

ໃນຕອນວັນດຽວກັນ ຄະນະທີມງານຈາກ ສພຊ ກໍ່ໄດ້ເຂົ້າພົບທ່ານ ໂພໄຊ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆສາລະວັນ, ເພື່ອລາຍງານຈຸດປະສົງຂອງການມາເຄື່ອນໄຫວເຮັດວຽກຢູ່ທີ່ແຂວງສາລະວັນ ແລະ ພ້ອມທັງປຶກສາຫາລືແລກປ່ຽນບາງວຽກງານທີ່ຕິດພັນກັບວຽກງານ ສພຊ ແລະ ສພຂ.

ພາບ ແລະ ຂ່າວ: ດີລຳພົນ ພົມມະຈັນ