ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າ ວັນທີ 01 ມີນາ 2022 ທີ່ສະໂມສອນເມືອງຍອດອູ ໄດ້ຈັດພິທິປະກາດກົງຈັກການຈັດຕັ້ງ ແລະ ແຕ່ງຕັ້ງບຸກຄະລາກອນ ຂອງຄະນະສະມາຊິກສະພາປະຊາຊົນແຂວງ ຊຸດທີ II ປະຈໍາ ເມືອງຍອດອູ ແຂວງຜົ້ງສາລີ ໂດຍການເປັນປະທານຂອງ ທ່ານ ຫຸມເພັງ ຈອມວິສານ ກໍາມະການພັກແຂວງ, ຮອງປະທານສະພາປະຊາຊົນແຂວງ,ເຂົ້າຮ່ວມພິທີໃນຄັ້ງນີ້ ປະກອບມີ ທ່ານ ສົມຫວັງ ສຸມວີໄລ ກໍາມະການພັກແຂວງ, ເລຂາພັກເມືອງ ເຈົ້າເມືອງ-ເມືອງຍອດອູ, ຄະນະສະມາຊິກສະພາປະຊາຊົນແຂວງ ຊຸດທີ II (ສສຂ), ຄະນະປະຈໍາພັກເມືອງ, ບັນດາທ່ານຫົວໜ້າຫ້ອງການ-ອົງການລັດທຽບເທົ່າຂັ້ນເມືອງ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ກອງບັນຊາການທະຫານ ແລະ ຕໍາຫຼວດເມືອງ.
ໃນພິທີໄດ້ຮັບຟັງທ່ານ ມືເກັງ ລາວທາງ ຮອງເລຂາພັກເມືອງ ຜູ້ຊີ້ນໍາວຽກພັກ-ພະນັກງານ ຂຶ້ນຜ່ານມະຕິວ່າດ້ວຍການແຕ່ງຕັ້ງ ຄະນະສະມາຊິກສະພາປະຊາຊົນຂັ້ນແຂວງ ຊຸດທີ II ປະຈໍາເມືອງ ສະບັບເລກທີ 62 ຄປຈຂ, ລົງວັນທີ 14 ກຸມພາ 2022 “ຄະນະປະຈໍາສະພາປະຊາຊົນແຂວງ ຕົກລົງ ແຕ່ງຕັ້ງ ທ່ານ ທອງສີອິນຈັກ ສສຂ ເປັນຫົວໜ້າ; ທ່ານ ນາງ ສີວັນ ລາວເຊິງ ເປັນຮອງ, ທ່ານ ບຸນພະນິດ ແກ້ວຮຸ່ງ ແລະ ທ່ານ ນາງ ຈັນມະນີ ດວງພາສຸກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ” ເປັນຄະນະ; ຜ່ານມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ຄະນະສະມາຊິກສະພາປະຊາຊົນຂັ້ນແຂວງ ປະຈໍາເມືອງ; ຮັບຟັງທ່ານ ທອງສີ ອິນຈັກສະມາຊິກສະພາປະຊາຊົນແຂວງ, ຫົວໜ້າຄະນະ ສສຂ ປະຈໍາເມືອງ ຜ່ານ​ມະ​ຕິ ວ່າ​ດ້ວຍ​ການ​ແຕ່ງ​ຕັ້ງ​ຄະ​ນະ​ປະ​ຈຳສະ​ພາ​ປະ​ຊາ​ຊົນ​ແຂວງ ຊີ້​ນຳ​ເມືອງ, ສະ​ບັບ​ເລກ​ທີ 16/ຄ​ປ​ຈ​ຂ, ວັນ​ທີ 17 ມັງ​ກອນ 2021.


ໃນໂອກາດດຽດກັນນີ້ ທ່ານ ຫຸມເພັງ ຈອມວິສານ ຍັງໄດ້ໃຫ້ກຽດໂອລົມຕໍ່ພິທີດັ່ງກ່າວ. ຊຶ່ງກ່ອນອື່ນທ່ານກໍໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ຄະນະພັກ, ອົງການປົກຄອງທ້ອງຖິ່ນ, ການຈັດຕັ້ງທຸກພາກສ່ວນ ແລະ ປະຊາຊົນບັນດາເຜົ່າ ຊາວເມືອງຍອດອູ ທີ່ໄດ້ ປະກອບສ່ວນຊຸກຍູ້ການເລືອກຕັ້ງ ທີ່ຜ່ານມາ ທີ່ໄດ້ເລືອກຕັ້ງເອົາຕົວແທນຂອງຕົນ ໄປປະຕິບັດໜ້າທີ່ຢູ່ໃນສະພາແຫ່ງຊາດ ແລະ ສະພາປະຊາຊົນແຂວງ ຕາມທີ່ກົດໝາຍກໍານົດໄວ້ ແລະ ທັງເອື້ອອໍານວຍຄວາມສະດວກຮອບດ້ານໃຫ້ແກ່ເຄື່ອນໄຫວຂອງ ສສຊ ແລະ ສສຂ ຢູ່ທ້ອງຖິ່ນຕົນ. ພ້ອມກັນນັ້ນ, ທ່ານຍັງໄດ້ເໜັ້ນບາງບັນຫາຕໍ່ຄະນະ ສສຂ ປະຈໍາເມືອງ ເປັນຕົ້ນ: ການປະສານສົມທົບອໍານາດການປົກຄອງທອງຖິ່ນ ສືບຕໍ່ປັບປຸງກົງຈັກການຈັດຕັ້ງ ແລະ ການເຄື່ອນໄຫວວຽກງານຢູ່ພາຍໃນ ໃຫ້ສອດຄ່ອງກັບທີ່ຕັ້ງ ແລະ ຈຸດພິເສດຂອງທ້ອງຖິ່ນ, ມີການແບ່ງງານ, ແບ່ງຄວາມຮັບຜິດຊອບໃນຄະນະ ຕາມຂົງເຂດວຽກງານທີ່ໄດ້ກໍານົດໄວ້ ໃນກົດໝາຍວ່າດ້ວຍສະພາສະພາປະຊາຊົນແຂວງ; ປັບປຸງກົງຈັກໜ່ວຍງານເສນາທິການຊ່ວຍວຽກ ຄະນະສະມາຊິກສະພາປະຊາຊົນແຂວງ ປະຈໍາເມືອງ ເພື່ອຮັບປະກັນເປັນເສນາທິການທີ່ເຂັ້ມແຂງຮອບດ້ານ ໃຫ້ແກ່ຄະນະສະມາຊິກສະພາປະຊາຊົນແຂວງ ປະຈໍາ ເມືອງຍອດອູ; ສືບຕໍ່ປັບປຸງແບບວິທີເຮັດວຽກ, ການຂໍທິດຊີ້ນໍາ-ນໍາພາ ຂອງຄະນະພັກອໍານາດການປົກຄອງເມືອງ, ການພົວພັນປະສານສົມທົບກັບບັນດາຫ້ອງການອ້ອມຂ້າງເມືອງ ເພື່ອຮັບປະກັນການປະຕິບັດໜ້າທີ່ວຽກງານ ການພັດທະນາສ້າງຄວາມເຂັ້ມແຂງໃຫ້ແກ່ຄະນະສະມາຊິກສະພາປະຊາຊົນແຂວງ ປະຈໍາເມືອງ ກໍ່ຄືອໍານາດການປົກຄອງທ້ອງຖິ່ນ ແລະ ເພີ່ມທະວີການນໍາພາ-ຊີ້ນໍາ ຂອງຄະນະພັກ, ອໍານາດການປົກຄອງເມືອງ ຕໍ່ກັບການຈັດຕັ້ງການເຄື່ອນໄຫວວຽກງານ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງຍອດອູ.

ພຸດສະດີ ແສງຈອມຄຸນ