ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 17 ພຶດສະພາ 2022 ຄະນະກໍາມະການວັດທະນາທໍາ-ສັງຄົມ ແລະ ບັນດາເຜົ່າ ຂອງສະພາປະຊາຊົນແຂວງຫລວງນ້ຳທາ ນຳໂດຍທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ຜູ້ຊີ້ນຳວຽກງານວັດທະນາທຳ-ສັງຄົມ ແລະ ບັນດາເຜົ່າ ຂອງສະພາປະຊາຊົນແຂວງ ແລະ ທ່ານ ນາງ ເກສອນ ແສງຍະວົງ ຄະນະປະຈຳສະພາປະຊາຊົນແຂວງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ, ເກັບກຳສະພາບ ແລະ ຂໍ້ມູນຕົວຈິງກ່ຽວກັບວຽກງານເຜົ່າ ແລະ ສາສະໜາ ຢູ່ທີ່ຫ້ອງປະຊຸມຂອງຫ້ອງການປົກຄອງເມືອງລອງ ມີສະມາຊິກສະພາປະຊາຊົນປະຈຳເມືອງ,ກຳມະການພັກເມືອງ, ຫົວຫນ້າ,ຮອງຫົວຫນ້າຫ້ອງການທີ່ກ່ຽວພາຍໃນເມືອງເຂົ້າຮ່ວມຢ່າງພ້ອມພຽງ.

ຈຸດປະສົງລົງເຄື່ອນໄຫວ ເພື່ອລົງຕິດຕາມກວດກາ ແລະ ຊູກຍູ້ການຈັດຕັ້ງປະຕິບັດຕາມມະຕິຂອງສະພາແຫ່ງຊາດ ແລະ ສະພາປະຊາຊົນແຂວງ ໃຫ້ສອດຄ່ອງກັບແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ດຳລັດ 315/ລບ, ລົງວັນທີ 16 ສິງຫາ 2016 ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢູ່ ສປປ ລາວ ໃນຂົງເຂດບັນດາເຜົ່າ.

ໃນນັ້ນ ໄດ້ຮັບຟັງການລາຍງານຂອງບັນດາຫ້ອງການທີ່ກ່ຽວຂ້ອງຂອງເມືອງ ກ່ຽວກັບສະພາບການເຄື່ອນໄຫວໃນການຈັດຕັ້ງປະຕິບັດວຽກງານສາສະໜາຕົວຈິງໃນໄລຍະຜ່ານມາຂອງເມືອງ, ດ້ານດີ, ຂໍ້ຫຍຸ້ງຍາກ ແລະ ວິທີການແກ້ໄຂ ໃນການຈັດຕັ້ງປະຕິບັດວຽກງານສາສະໜາ ພ້ອມນັ້ນ ໄດ້ຮັບຟັງການປະກອບຄຳຄິດເຫັນຂອງບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງຢ່າງມີຈຸດສຸມ ຕໍ່ວຽກງານສາສະໜາ ພາຍໃນເມືອງກໍຄືໃນ ສປປ ລາວ ເປັນຕົ້ນ: ໃຫ້ຮູ້ເຖິງວຽກງານເຜົ່າ, ສາສະໜາຢ່າງແກ່ນແທ້ ແລະ ໃຫ້ປະຕິບັດຕາມ ແນວທາງນະໂບບາຍຂອງພັກ,  ລັດຖະທຳມະນູນ,​ ລະບຽບກົດໝາຍຂອງລັດ ແລະ ດຳລັດອື່ນໆ ທີ່ກ່ຽວຂ້ອງກັບວຽກງານສາສະໜາ ເພື່ອເຮັດໃຫ້ການຈັດຕັ້ງປະຕິບັດວຽກງານພາຍໃນເມືອງ ເວົ້າລວມເວົ້າສະເພາະ ພາຍໃນແຂວງໃຫ້ໄປແນວທາງດຽວກັນ, ພ້ອມກັນຈັດຕັ້ງປະຕິບັດໃຫ້ປະຊາຊົນຮັບຮູ້ເຊື່ອຊຶມ, ເຂົ້າໃຈເລິກເຊີ່ງ ແລະ ປະຕິບັດໃຫ້ຖຶກຕ້ອງສອດຄ່ອງຕາມລະບຽບຫລັກການຂອງພັກ, ລັດ ວາງອອກຢ່າງເຂັ້ມງວດ.

ໂດຍ ວັນນີ ແຝງບົວວັນ