ວັນທີ 3-4 ພຶດສະພາ 2023 ນີ້ ສະພາປະຊາຊົນແຂວງຫລວງນໍ້າທາ ໄດ້ເປີດກອງປະຊຸມຕິດຕາມກວດກາການປະເມີນການຈັດຕັ້ງປະຕິບັດກົດຫມາຍຂົງເຂດຍຸຕິທຳ 4 ສະບັບ ແລະ ທາບທາມຄຳເຫັນໃສ່ຮ່າງກົດຫມາຍຈຳນວນ 11 ສະບັບ ຂຶ້ນທີ່ຫ້ອງປະຊຸມຂອງພະແນກການເງິນແຂວງ
ໂດຍການເປັນປະທານຂອງ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫລວງນ້ຳທາ ໃຫ້ກຽດເຂົ້່າຮ່ວມມີບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ອາດີດສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ຫົວຫນ້າ ຮອງຫົວຫນ້າພະແນກການອ້ອມຂ້າງແຂວງທີ່ກ່ຽວຂ້ອງ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມທັງຫມົດ 40 ທ່ານ ຍິງ 10 ທ່ານ
ກອງປະຊຸມຄັ້ງນີ້ເພື່ອກວດກາຜົນການປະເມີນການຈັດຕັ້ງປະຕິບັດກົດໝາຍໃນຂົງເຂດຍຸຕິທຳ 4 ສະບັບຄື ກົດໝາຍວ່າດ້ວຍສານປະຊາຊົນແຂວງ, ກົດໝາຍວ່າດ້ວຍອົງການໄອຍະການປະຊາຊົນແຂວງ, ກົດໝາຍວ່າດ້ວຍການດຳເນີນຄະດີແພ່ງ, ກົດໝາຍວ່າດ້ວຍການດຳເນີນຄະດີອາຍາ, ເຊິ່ງໄດ້ຮັບຟັງການລາຍງານກ່ຽວກັບຜົນການປະເມີນການຈັດຕັ້ງປະຕິບັດກົດຫມາຍ 4 ສະບັບຂອງສານປະຊາຊົນແຂວງ ແລະ ອົງການໄອຍະການປະຊາຊົນແຂວງ ພ້ອມນັ້ນບັນດາທ່ານທີ່ເຂົ້າຮ່ວມກອງປະຊຸມໄດ້ປະກອບຄຳເຫັນໃສ່ບັນດາກົດໝາຍດັ່ງກ່າວເພື່ອນຳໄປປັບປຸງໃນຂັ້ນຕໍ່ໄປເພື່ອໃຫ້ມີເນື້ອໃນຄົບຖ້ວນສົມບູນ ສາມາດນຳໄປຈັດຕັ້ງປະຕິບັດໄດ້ໃຫ້ໄດ້ຮັບຜົນດີ.
ແລະ ທາບທາມໃສ່ຮ່າງກົດໝາຍຈຳນວນ 11 ສະບັບຄື ຮ່າງກົດໝາຍວ່າດ້ວຍການຈັດຫາງານ, ຮ່າງກົດໝາຍວ່າດ້ວຍການຊົດເຊີຍຄ່າເສຍຫາຍຈາກລັດ, ຮ່າງກົດໝາຍວ່າດ້ວຍການປົກຄອງ, ຮ່າງກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ, ຮ່າງກົດໝາຍວ່າດ້ວຍການພີມຈຳໜ່າຍ, ຮ່າງກົດໝາຍວ່າດ້ວຍສາທາລະນະສຸກ, ຮ່າງກົດໝາຍວ່າດ້ວຍສານທະຫານ, ຮ່າງກົດໝາຍວ່າດ້ວຍສັດນ້ຳ ແລະ ການປະມົງ, ຮ່າງກົດໝາຍວ່າດ້ວຍສັດປ່າ, ຮ່າງກົດໝາຍວ່າດ້ວຍທະນາຄານທຸລະກິດ, ຮ່າງກົດໝາຍວ່າດ້ວຍອາກອນທີ່ດິນ
ພ້ອມນັ້ນບັນດາທ່ານທີ່ເຂົ້າຮ່ວມກອງປະຊຸມໄດ້ພ້ອມກັນສຸມໃສ່ປະກອບຄຳຄິດເຫັນຢ່າງມີຈຸດສຸມ ເປັນຕົ້ນແມ່ນດ້ານໂຄງສ້າງ, ດ້ານເນື້ອໃນຕ່າງໆແຕ່ລະໝວດ, ແຕ່ລະມາດຕາຂອງແຕ່ລະກົດໝາຍ ຕະຫລອດຮອດການຈັດຕັ້ງປະຕິບັດເພື່ອໃຫ້ມີເນື້ອໃນຄົບຖ້ວນສົມບູນສອດຄ່ອງກັບສະພາບເງື່ອນໄຂຕົວຈິງໃນແຕ່ລະໄລຍະ ແລະ ນຳເອົາຄຳຄິດເຫັນຂອງທຸກພາກສ່ວນເຂົ້າໃສ່ເນື້ອໃນຂອງຮ່າງກົດໝາຍໃຫ້ມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມໃນແຕ່ລະໄລຍະ ເພື່ອສາມາດນຳເອົາຮ່າງກົດໝາຍຈຳນວນ 11 ສະບັບດັ່ງກ່າວ ເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະໄຂຂຶ້ນໃນຕໍ່ໜ້ານີ້
ໂດຍ ນາງ ອຳພອນ ສີປະເສີດ