ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

        ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຫຼວງນໍ້າທາ ຊຸດທີ II ໄດ້ສໍາເລັດລົງຢ່າງເປັນທາງການ ໃນຕອນແລງຂອງວັນທີ 4 ສິງຫາ 2022 ໂດຍພາຍໃຕ້ການເປັນປະທານຂອງທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງທ່ານ ຄຳໄຫລ ສີປະເສີດ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງໆ ຫຼວງນໍ້າທາ, ທ່ານ ພົນຕີ ປະລິນຍາເອກ ວົງສັກ ພັນທະວົງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ3, ຕາງໜ້າຄະນະປະຈໍາສະພາແຫ່ງຊາດ, ປະທານກໍາມາທິການ ປກຊ-ປກສ ສະພາແຫ່ງຊາດ ແລະ ທ່ານ ພົນຈັດຕະວາ ປະລິນຍາເອກ ວັນທອນ ສຸລິສັກ ຮອງຫົວໜ້າກົມໃຫຍ່ສັນຕິບານກະຊວງປ້ອງກັນຄວາມສະຫງົບ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ3, ອົງການແນວລາວສ້າງຊາດແຂວງ, ບັນດາທ່ານການນໍາພັກ-ລັດ, ອາດີດການນໍາຂອງແຂວງ, ອາດີດສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ບັນດາທ່ານນັກປະຕິວັດອາວຸໂສ, ຜູ້ຊົງຄຸນວຸດທິ, ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, 2ກອງບັນຊາການຂອງແຂວງ, ພະແນກການອົງການທຽບເທົ່າ ແລະ ບັນດາທ່ານແຂກຖຶກເຊີນເຂົ້າຮ່ວມ 150 ກວ່າ ທ່ານ.                 ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງຊຸດທີ II ໄດ້ດໍາເນີນມາເປັນເວລາ 3 ວັນເຕັມ ເຊິ່ງສະມາຊິກສະພາປະຊາຊົນແຂວງ ໄດ້ຍົກສູງຄວາມຮັບຜິດຊອບຂອງຕົນ ເຂົ້າໃນການຄົ້ນຄວ້າ, ພິຈາລະນາ,ຮັບຮອງເອົາບັນຫາສໍາຄັນຕ່າງໆຄື: ໄດ້ພິຈາລະນາ ແລະ ຮັບຮອງເອົາການສະເໜີແຕ່ງຕັ້ງ, ບັນດາຫົວໜ້າພະແນກຂັ້ນແຂວງ ຈໍານວນ 6 ທ່ານ ຕາມການສະເໜີຂອງທ່ານເຈົ້າແຂວງໆຫລວງນໍ້າທາ ແລະ ໄດ້ພິຈາລະນາຮັບຮອງເອົາການສະເໜີແຕ່ງຕັ້ງຫົວໜ້າອົງການໄອຍະການປະຊາຊົນແຂວງ ຕາມການສະເໜີຂອງຄະນະປະຈຳສະພາປະຊາຊົນແຂວງ; ໄດ້ພິຈາລະນາ ແລະ ຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາຫົກເດືອນຕົ້ນປີ ແລະ ແຜນການປະຈໍາຫົກເດືອນທ້າຍປີ 2022; ໄດ້ພິຈາລະນາ ແລະ ຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຄຸ້ມຄອງ ລາຄາສິນຄ້າ ແລະ ການຄຸ້ມຄອງບັນດາປ້ຳນ້ຳມັນ ຢູ່ພາຍໃນແຂວງຫຼວງນໍ້າທາ; ໄດ້ຮັບຟັງການລາຍງານຂອງຄະນະສະເພາະກິດຂັ້ນແຂວງ ກ່ຽວກັບສະພາບການຕ້ານ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຕິດພັນກັບການຄຸ້ມຄອງ ແລະ ການນໍາສົ່ງຄົນຕ່າງປະເທດທີ່ເຂົ້າມາແຂວງຫລວງນໍ້າທາເຂົ້າສູນເພື່ອລໍຖ້າກັບຄືນປະເທດ; ໄດ້ພິຈາລະນາ ແລະ ຮັບຮອງເອົາ ບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II; ຮັບຟັງຮ່າງຂໍ້ຕົກລົງເຈົ້າແຂວງກ່ຽວກັບຫົວໜ່ວຍຊົດເຊີຍໂຄງການກໍສ້າງຕົວເມືອງທັນສະໄໝ ແລະ ເປັນມິດຕໍ່ສິງແວດລ້ອມ; ພິຈາລະນາ ແລະ ຮັບຮອງເອົານິຕິກໍາໃຕ້ກົດໝາຍຂອງແຂວງ ສ້າງໃໝ່ຈໍານວນ 2 ສະບັບຄື: ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມຄອງນໍ້າ, ຊັບພະຍາກອນນໍ້າ ແລະ ດີນບໍລິເວນແຄມນໍ້າ; ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມຄອງສິ່ງເສດເຫຼືອ .                 ນອກນັ້ນ ກອງປະຊຸມຍັງໄດ້ຮັບຟັງການຊີ້ແຈງຕໍ່ຄຳເຫັນ, ຄຳຊັກຖາມ ຂອງບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ຜູ້ແທນກອງປະຊຸມ ກໍຄືຄຳຄິດເຫັນທີ່ພົບຄວາມຫຍຸ້ງຍາກ, ຄວາມສົນໃຈ ຂອງພໍ່ແມ່ປະຊາຊົນບັນດາເຜົ່າໃນທົ່ວແຂວງ ເພື່ອໃຫ້ພາກສ່ວນທີ່ກ່ຽວຂ້ອງຄົ້ນຄວ້າ, ແກ້ໄຂໃຫ້ດີກວ່າເກົ່າ.

ໂອກາດດຳເນີນກອງປະຊຸມ ບໍລິສັດອຳມະຕະຊີຕີລາວຈຳກັດຂາອອກ-ຂາເຂົ້າ ແລະ ຂົນສົ່ງທາງບົກຈຳກັດຜູ້ດຽວ ໄດ້ສະໜັບສະໜູນເປັນເງິນມູນຄ່າ 50,000,000 ກີບ ແລະ ບໍລິສັດຮຸ່ງອາລຸນການຄ້າຂາອອກ-ຂາຂົ້າ ແລະ ຂົນສົ່ງທາງບົກຈຳກັດຜູ້ດຽວ ໄດ້ສະໜັບສະໜູນເປັນເງິນມູນຄ່າ 6,000,000 ກີບ ເພື່ອໜູນໃຊ້ເຂົ້າໃນວຽກງານຂອງສະພາປະຊາຊົນແຂວງ; ພ້ອມນັ້ນ ສະພາປະຊາຊົນແຂວງ ຍັງໄດ້ມອບໃບຊົມເຊີຍຂອງປະທານສະພາປະຊາຊົນແຂວງ ໃຫ້ທັງສອງບໍລິສັດ.