ວັນທີ 30 ກັນຍາ 2022 ນີ້ ຢູ່ທີ່ສະໂມສອນ ແຂວງຄຳມ່ວນ ໄດ້ຈັດພິທີເຜີຍແຜ່ ເຊື່ອມຊຶມ ເອກະສານຜົນສໍາເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໃຫ້ແກ່ພະນັກງານການນໍາຫລັກແຫລງ ແລະ ພະນັກງານ – ລັດຖະ ກອນໃນຂົງເຂດເສດຖະກິດ ອ້ອມຂ້າງ ແຂວງຄໍາມ່ວນ, ໂດຍການໃຫ້ກຽດເປັນປະທານຂອງ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ ພ້ອມດ້ວຍສະມາຊິກສະພາແຫ່ງຊາດປະຈໍາເຂດເລືອກຕັ້ງ 12 ແຂວງຄຳມ່ວນ ແລະ ສະມາຊິກສະພາປະຊາຊົນຂັ້ນແຂວງ.
ເປັນກຽດເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX, ໂດຍ ທ່ານ ສະເຫລີມສັກ ແກ້ວຈັນທະລາ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 12 ແຂວງຄໍາມ່ວນ, ເຊິ່ງໄດ້ຍົກໃຫ້ເຫັນກ່ຽວກັບບັນຫາສໍາຄັນຂອງຊາດ ເປັນຕົ້ນວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ, ການປັບປຸງ ແລະ ຮັບຮອງເອົາກົດໝາຍ, ຮັບຮອງເອົາບົດລາຍງານການຕິດຕາມຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ແລະ ທິດທາງແຜນການຕິດຕາມກວດກາໃນຕໍ່ໜ້າ ແລະ ວຽກງານດ້ານບຸກຄະລາກອນ ທີ່ໄດ້ຮັບຮອງເອົາການຍົກຍ້າຍແຕ່ງຕັ້ງ ບ່ອນປະຈໍາການຂອງການນໍາໃນຄະນະລັດຖະບານ.
ໂອກາດດຽວກັນນັ້ນ ທ່ານ ນາງ ທິບສະຫວັນ ອານຸວົງ ສະມາຊິກສະພາປະຊາຊົນແຂວງຄໍາມ່ວນ ຊຸດທີ II ໄດ້ຂື້ນເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄໍາມ່ວນ, ທີ່ໄດ້ຍົກໃຫ້ເຫັນໃນການພິຈາລະນາ ແລະ ຮັບຮອງເອົາບັນຫາເນື້ອໃນສໍາຄັນຕົ້ນຕໍຂອງແຂວງ, ໂດຍສະເພາະວຽກງານອົງການປົກຄອງແຂວງ, ວຽກງານສະພາປະຊາຊົນແຂວງ, ຮັບຮອງເອົາບົດລາຍງານການຕິດຕາມຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ແລະ ທິດທາງແຜນການໃນຕໍ່ໜ້າ ແລະ ຮັບຮອງເອົາການຍົກຍ້າຍແຕ່ງຕັ້ງ ບ່ອນປະຈໍາການຂອງຄະນະບໍລິຫານງານພັກແຂວງ ໃນບາງຂະແໜງການ.
ພ້ອມນີ້ ທ່ານ ນາງ ສາທິດ ຈັນສີ ສະມາຊິກສະພາປະຊາຊົນແຂວງ, ຍັງໄດ້ນໍາສະເໜີ ກົດໝາຍ ແລະ ນິຕິກໍາໃຕ້ກົດໝາຍອີກຈໍານວນໜຶ່ງ ທີ່ພົວພັນກັບວຽກງານສະພາ ໂດຍສະເພາະແມ່ນໄດ້ຊີ້ແຈງໃຫ້ເຫັນຄວາມໝາຍຄວາມສໍາຄັນ ກ່ຽວກັບພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາແຫ່ງຊາດ – ສະພາປະຊາຊົນແຂວງ ແລະ ວຽກງານສະພາ, ທັງນີ້ກໍ່ເພື່ອແນໃສ່ສ້າງຄວາມຮັບຮູ້ ແລະ ຄວາມເຂົ້າໃຈ ໃຫ້ແກ່ບັນດາພາກສ່ວນທີເຂົ້າຮ່ວມ ສາມາດກໍາໄດ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃນແຕ່ລະໄລຍະຢ່າງຖືກຕ້ອງ ແລະ ພ້ອມກັນນໍາເອົາເນື້ອໃນຈິດໃຈ ການເຜີຍແຜ່ຜົນສໍາເລັດກອງປະຊຸມຄັ້ງນີ້ ໄປຜັນຂະຫຍາຍໃນຂົງເຂດຄວາມຮັບຜິດຊອບຂອງຕົນ ໃຫ້ມີປະສິດທິພາບ ແລະ ປະສິດທິຜົນຢ່າງແທ້ຈິງ.
#https://khammouanenews.com/ #ແຂວງຄຳມ່ວນ