ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າວັນທີ 7 ຕຸລາ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ກໍາມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ (ກຜງສ ສພຊ) ໄດ້ປະຊຸມຮ່ວມກັບສະພາປະຊາຊົນແຂວງ ແລະ ພະແນກການທີ່ກ່ຽວຂ້ອງ ໂດຍການເປັນປະທານ ຂອງທ່ານ ລີເບີ ລີບົວປາວ ກໍາມະການຄະນະປະຈໍາ ສພຊ, ປະທານ ກຜງສ ສພຊ, ມີ ທ່ານ ທອງສີ ເສົາສຸລິພົມ ປະທານ ສພຂ, ບັນດາທ່ານຄະນະປະຈໍາສະພາປະຊາຊົນແຂວງ, ຕາງໜ້າປະທານອົງການກວດກາລັດແຂວງ, ຮອງປະທານຄະນະກໍາມະການ ສພຂ, ຮອງເລຂາທິການ ສພຂ ແລະ ຫົວໜ້າພະແນກ ຈາກ 9 ຂະແໜງການຂົງເຂດເສດຖະກິດເຂົ້າຮ່ວມ.

ທີ່ປະຊຸມໄດ້ຮັບຟັງ ທ່ານ ທອງສີ ເສົາສຸລິພົມ ຂຶ້ນ​ລາຍ​ງານການ​ຕິດ​ຕາມກວດ​ກາ 6 ເດືອນ​ຕົ້ນ​ປີ ແລະ ທິດ​ທາງ 6 ເດືອນ​ທ້າຍ​ປີ 2022 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 2 ແຂວງຜົ້ງສາລີ; ຮັບຟັງທ່ານ ທອງສຸກ ເປົາສຸລີ ຫົວໜ້າພະແນກແຜນການ ແລະ ການລົງທຶນແຂວງ ຂຶ້ນລາຍງານການຈັດຕັ້ງປະຕິບັດບັນດາຄາດໝາຍ, ແຜນວຽກຈຸດສຸມ ແລະ ມາດຕະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2022 ຂອງແຂວງ, ໂດຍສະເພາະລົງເລິກໂຄງການລົງທຶນທີ່ເປັນບູລິມະສິດຂອງ ລັດ, ໜີ້ສິນໂຄງການລົງທຶນຂອງລັດ ແລະ ການສ້າງແຜນພັດທະນາເສດຖະກິດ-ສັງຄົມ ປີ 2023; ຮັບຟັງທ່ານ ປອ ວັນໄຊ ສຸກສັນ ຫົວໜ້າພະແນການການເງິນແຂວງ ຂຶ້ນ ລາຍງານການຈັດຕັ້ງປະຕິບັດຄາດໝາຍ, ວຽກຈຸດສຸມ ແລະ ມາດຕະການຈັດຕັ້ງປະຕິບັດວາລະແຫ່ງຊາດ ຢູ່ຂັ້ນແຂວງ ໂດຍສະເພາະສຸມໃສ່ແຜນວຽກຈຸດສຸມທີ 2 ກ່ຽວກັບການສ້າງຄວາມເຂັ້ມແຂງຖານລາຍຮັບ, ການຫັນເປັນທັນສະໄໝ, ການເກັບລາຍຮັບ; ແຜນວຽກຈຸດສຸມທີ 3 ກ່ຽວກັບປະສິດທິຜົນການຄຸ້ມຄອງລາຍຈ່າຍງົບປະມານ ແລະ ການແກ້ໄຂໜີ້ສິນສາທາລະນະ ແລະ ແຜນວຽກຈຸດສຸມທີ 4 ກ່ຽວກັບຮັກສາສະຖຽນລະພາບທາງດ້ານເສດຖະກິດມະຫາພາກ ໂດຍສະເພາະສຸມໃສ່ຕິດຕາມກວດກາ ສະພາບການ ເຄື່ອນເໜັງຂອງອັດຕາແລກປ່ຽນ; ລາຍງານການຈັດຕັ້ງປະຕິບັດບັນດາຄາດໝາຍ, ແຜນວຽກຈຸດສຸມ ແລະ ມາດຕະການຈັດຕັ້ງປະຕິບັດແຜນງົບປະມານແຫ່ງລັດປີ 2022; ຮັບຟັງທ່ານ ທະນູຄໍາ ປິດຈະວົງ ຫົວໜ້າພະແນກອຸດສາຫະກຳ ແລະ ການຄ້າແຂວງ ຂຶ້ນລາຍງານການຈັດຕັ້ງປະຕິບັດຄາດໝາຍ, ວຽກຈຸດສຸມ ແລະ ມາດຕະການຈັດຕັ້ງປະຕິບັດວາລະແຫ່ງຊາດ ຢູ່ຂັ້ນແຂວງ ໂດຍສະເພາະສຸມໃສ່ແຜນວຽກຈຸດສຸມທີ 4 ກ່ຽວກັບຮັກສາສະຖຽນລະພາບທາງດ້ານເສດຖະກິດມະຫາພາກ ໂດຍສະເພາະສຸມໃສ່ຕິດຕາມກວດກາ ສະພາບການເພີ່ມຂຶ້ນຂອງລາຄາສິນຄ້າ; ຮັບຟັງ ຕາງໜ້າຈາກ ປະທານອົງການກວດກາລັດແຂວງ ລາຍງານ ການຕິດຕາມ, ກວດກາຕາມຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2020; ຮັບຟັງ ທ່ານ ບຸນພານິດ ແກ້ວຮຸ່ງ ຫົວ​ໜ້າພະ​ແນກ​ໂຍ​ທາ​ທິ​ການ ແລະ ຂົນ​ສົ່ງ​ແຂວງ ຂຶ້ນລາຍງານຄວາມຄືບໜ້າການຈັດຕັ້ງປະຕິບັດໂຄງການກໍ່ສ້າງຂົວຂ້າມນ້ຳອູ, ເມືອງສຳພັນ ແຂວງຜົ້ງສາລີ ຕາມມະຕິຂອງຄະນະປະຈຳສະພາແຫ່ງຊາດ ວ່າດ້ວຍການອະນຸມັດໃຫ້ດັດແກ້ເພີ່ມມູນຄ່າ ໂຄງການກໍ່ສ້າງຂົວຂ້າມນ້ຳອູ, ເມືອງສຳພັນ ແຂວງຜົ້ງສາລີ ສະບັບເລກທີ 16/ຄປຈ, ລົງວັນທີ 5 /1/2021. ຈາກນັ້ນ, ຜູ້ເຂົ້າຮ່ວມກອງປະຊຸມແລກປ່ຽນຄວາມຄິດຄວາມເຫັນ ທັງນີ້ກໍເພື່ອເປັນຂໍ້ມູນໃຫ້ການຕິດຕາມກວດກາຂອງຄະນະທີມງານ ກຜງສ ສພຊ ມີຂໍ້ມູນທີ່ຮັດກຸມ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ.