(ສພຊ) ລະຫວ່າງວັນທີ 23-25 ສິງຫາ 2023 ທ່ານ ຮສ. ປອ. ລິນຄໍາ ດວງສະຫວັນ ກຳມະການສຳຮອງສູນກາງພັກ, ຄະນະປະຈຳສະພາແຫ່ງຊາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ການຈັດຕັ້ງປະຕິບັດນະໂຍບາຍ, ກົດໝາຍ, ນິຕິກໍາໃຕ້ກົດໝາຍ ທີ່ຕິດພັນກັບວຽກງານການຄຸ້ມຄອງ, ຟື້ນຟູປ່າໄມ້, ປູກໄມ້ທົດແທນ, ການສ້າງສິນເຊື່ອກາກບອນ, ການຜະລິດກະສິກໍາເປັນສິນຄ້າ ແລະ ການປັບປຸງຊີວິດການເປັນຢູ່ ຂອງປະຊາຊົນທີ່ຄາດວ່າຈະໄດ້ຮັບຜົນທະທົບຈາກໂຄງການພັດທະນາ ຢູ່ແຂວງບໍ່ແກ້ວ ໂດຍມີການນໍາຈາກທ້ອງຖິ່ນຕິດຕາມຄະນະ ປະກອບມີ ປະທານສະພາປະຊາຊົນແຂວງບໍ່ແກ້ວ, ປະທານສະພາປະຊາຊົນແຂວງຫຼວງນໍ້າທາ.

ໂອກາດດັ່ງກ່າວ, ທ່ານ ຮສ. ປອ. ລິນຄໍາ ດວງສະຫວັນ ພ້ອມດ້ວຍຄະນະ ກໍໄດ້ເຂົ້າພົບທ່ານເຈົ້າແຂວງ ແຂວງບໍ່ແກ້ວ ເພື່ອລາຍງານຈຸດປະສົງໃນການເຄື່ອນໄຫວເຮັດວຽກໃນຄັ້ງນີ້. ຈາກນັ້ນ, ໄດ້ຈັັດກອງປະຊຸມເຮັດວຽກຮ່ວມກັບຂະແໜງການທີ່ກ່ຽວຂ້ອງ ຂອງແຂວງ ເພື່ອຮັບຟັງການລາຍງານ ກ່ຽວກັບການຈັດຕັ້ງປະຕິບັດນະໂຍບາຍ ແລະ ນິຕິກຳ ທີ່ຕິດພັນກັບການສົ່ງເສີມການຜະລິດຝຸ່ນ, ປຸ໋ຍ, ຫົວອາຫານສັດ ເພື່ອທົດແທນການນໍາເຂົ້າ ແລະ ການຄຸ້ມຄອງປ່າໄມ້, ການຟື້ນຟູປ່າ, ປູກປ່າທົດແທນ ສົ່ງເສີມຊີວິດການເປັນຢູ່ ແລະ ສ້າງສິນເຊື່ອກາກບອນ; ສະພາບຜົນກະທົບຕໍ່ສິ່ງແວດລ້ອມ-ສັງຄົມ ແລະ ການກໍານົດຫົວໜ່ວຍ ຊົດເຊີຍ-ທົດແທນຄ່າເສຍຫາຍ ໃຫ້ແກ່ປະຊາຊົນຜູ້ທີ່ຖືກຜົນກະທົບຈາກເຂື່ອນໄຟຟ້ານໍ້າຂອງປາກແບ່ງ ພ້ອມທັງໄດ້ຮັບຟັງການລາຍງານສະພາບຂໍ້ສະດວກ ແລະ ຫຍຸ້ງຍາກ ໃນການຈັດຕັ້ງປະຕິບັດໂຄງການກໍ່ສ້າງ ແລະ ບູລະນະສ້ອມແປງ ປ້ອງກັນຕາຝັ່ງເຈື່ອນ, ການຂຶ້ນໃບທະບຽນຕາດິນ ແລະ ການຂຸດຄົ້ນແຮ່ທາດແບບທົດລອງ ຢູ່ພາຍໃນແຂວງບໍ່ແກ້ວອີກດ້ວຍ. ຫຼັງຈາກນັ້ນ, ກອງປະຊຸມໄດ້ແລກປ່ຽນຄໍາຄິດຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ ແລະ ດ້ານຂໍ້ຄົງຄ້າງ ທີ່ຕ້ອງໄດ້ຊອກຫາວິທີແກ້ໄຂ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີຄວາມຖືກຕ້ອງ, ສອດຄ່ອງກັບກົດໝາຍ ແລະ ບັນລຸຕາມຄາດໝາຍທີ່ວາງໄວ້. ຕອນທ້າຍຂອງກອງປະຊຸມ ທ່ານ ຮສ. ປອ. ລິນຄໍາ ດວງສະຫວັນ ປະທານກອງປະຊຸມໄດ້ມີຄໍາເຫັນຊີ້ນໍາໃຫ້ແຕ່ລະຂະແໜງການ ເພີ່ມທະວີ ແລະ ເອົາໃຈໃສ່ ຈັດຕັ້ງປະຕິບັດວຽກງານຂອງຕົນ ໃຫ້ມີປະສິດທິພາບ ແລະ ປະສິດທິຜົນກວ່າເກົ່າ ເປັນຕົ້ນ:

ວຽກງານສົ່ງເສີມການຜະລິດກະສິກຳ: ຄົ້ນຄວ້າປັບປຸງນະໂຍບາຍ ແລະ ນິຕິກໍາ ກ່ຽວກັບການນໍາເຂົ້າອາຫານສັດ, ຝຸ່ນ ສໍາເລັດຮູບ ດ້ວຍການຫຼຸດຜ່ອນ ຫຼື ຈຳກັດ ການນຳເຂົ້າ ເພື່ອສົ່ງເສີມຜູ້ຜະລິດພາຍໃນ, ພ້ອມດຽວກັນນັ້ນ ກໍໃຫ້ກວດກາຄືນນະໂຍບາຍສົ່ງເສີມ ແລະ ກໍານົດແຈ້ງ ກ່ຽວກັບການຜະລິດກະສິກໍາ, ປັດໄຈການຜະລິດ ແລະ ເພີ່ມທະວີຊຸກຍູ້ ສົ່ງເສີມ ຜູ້ປະກອບການພາຍໃນ ແລະ ຕ່າງປະເທດ ທີ່ມີຄວາມສົນໃຈຢາກເຮັດແທ້ທຳຈິງ ແລະ ມີບົດຮຽນປະສົບການດ້ານການລົງທຶນການຜະລິດອາຫານສັດ ແລະ ຝຸ່ນ ຮັບປະກັນຕອບສະໜອງຕາມຄວາມຕ້ອງການພາຍໃນຫຼຸດຜ່ອນການນໍາເຂົ້າ; ເອົາໃຈໃສ່ ຊຸກຍູ້, ສົ່ງເສີມ ຜູ້ປະກອບການຄົນລາວ ໃນການດຳເນີນກິດຈະການຟາມລ້ຽງສັດ ດ້ວຍການໃຫ້ນະໂຍບາຍສະເພາະ ໃຫ້ແກ່ຊາວກະສິກອນ, ຜູ້ປະກອບການຄົນລາວ ເນື່ອງຈາກວ່າອາຊີບດັ່ງກ່າວ ມີຄວາມສໍາຄັນ, ເປັນຍຸດທະສາດ ແນໃສ່ສ້າງວຽກເຮັດງານທໍາ ແລະ ສ້າງລາຍຮັບໃຫ້ປະຊາຊົນລາວ ພ້ອມທັງຮັບປະກັນຄວາມໝັ້ນຄົງທາງດ້ານສະບຽງອາຫານ ແລະ ເປັນສິນຄ້າສົ່ງອອກ.

ວຽກງານປົກປັກຮັກສາປ່າໄມ້: ເອົາໃຈໃສ່ຄົ້ນຄວ້າ, ປັບປຸງນະໂຍບາຍ ແລະ ນິຕິກຳ ກ່ຽວກັບການສົ່ງເສີມວຽກງານການຟື້ນຟູ ແລະ ປູກໄມ້ ໂດຍການມີສ່ວນຮ່ວມ ລະຫວ່າງ ພາກລັດ, ຜູ້ປະກອບການ ແລະ ປະຊາຊົນ ໃຫ້ມີຄວາມຈະແຈ້ງ ແລະ ຮັດກຸມ ແລະ ເອົາໃຈໃສ່ ຄົ້ນຄວ້າອອກນິຕິກຳສະເພາະ ກ່ຽວກັບການຄຸ້ມຄອງປະຊາຊົນ ທີ່ດຳລົງຊີວິດຢູ່ໃນເຂດ 3 ປະເພດປ່າ ພ້ອມທັງຈັດເຝິກອົບຮົມໃຫ້ຄວາມຮູ້ດ້ານວິຊາການແກ່ເຂົາເຈົ້າ ເພື່ອເຂົ້າຮ່ວມເປັນຜູ້ຄຸ້ມຄອງ, ປົກປັກຮັກສາພັດທະນາປ່າໄມ້ ແລະ ຊີວະນາໆພັນ ແບບຍືນຍົງ ໂດຍໄດ້ຮັບຜົນຕອບແທນທີ່ເໝາະສົມ ຮັບປະກັນການຈັດສັນອາຊີບຄົງທີ່ ແລະ ການດຳລົງຊີວິດທີ່ໝັ້ນຄົງຖາວອນ. ພ້ອມທັງເອົາໃຈໃສ່ ຄົ້ນຄວ້າອອກນະໂຍບາຍ ແລະ ນິຕິກຳ ກ່ຽວກັບການຄຸ້ມຄອງປ່າໄມ້ ເພື່ອກ້າວໄປສູ່ການສ້າງສິນເຊື່ອກາກບອນ.

ວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ: ເອົາໃຈໃສ່ໃນການສຶກສາ ສໍາຫຼວດ, ເກັບກໍາຂໍ້ມູນ ແລະ ກວດກາຄືນບັນດາຂໍ້ມູນຜົນກະທົບຕໍ່ສິ່ງແວດລ້ອມ ສັງຄົມ ແລະ ທຳມະຊາດ ທີ່ອາດຈະເກີດຂຶ້ນ ຈາກການພັດທະນາໂຄງການເຂື່ອນໄຟຟ້າດັ່ງກ່າວ ເພື່ອເປັນບ່ອນອີງໃນການຊົດເຊີຍ ທົດແທນຄ່າເສຍຫາຍ ແລະ ຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດວຽກງານດັ່ງກ່າວ ແລະ ຮັບປະກັນບໍ່ໃຫ້ມີບັນຫາການຕົກຫຼົ່ນ ຫຼື ການຮ້ອງຟ້ອງ ຮ້ອງຂໍຄວາມເປັນທຳ ໃນຕໍ່ໜ້າ, ພ້ອມທັງເອົາໃຈໃສ່ຢ່າງໃກ້ສິດ ໃນການຕິດຕາມ ການຟື້ນຟູຊີວິດການເປັນຢູ່ຂອງປະຊາຊົນ ທີ່ຈະໄດ້ຮັບຜົນກະທົບຈາກໂຄງການ ເພື່ອຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂື້ນກວ່າເກົ່າ; ໃຫ້ສືບຕໍ່ເອົາໃຈໃສ່ໃນການສຳຫຼວດ, ວັດແທກ, ຂຶ້ນທະບຽນອອກໃບຕາດິນ ໃຫ້ສາມາດບັນລຸຕາມແຜນການທີ່ວາງໄວ້ ແນໃສ່ໃຫ້ປະຊາຊົນໄດ້ຮັບຜົນປະໂຫຍດສູງສຸດ ຈາກການນຳໃຊ້ທີ່ດິນ ຕາມກົດໝາຍ ແລະ ລາຍຮັບຈາກການນຳໃຊ້ທີ່ດິນ ເປັນຖານລາຍຮັບໜຶ່ງທີ່ໝັ້ນຄົງ ພ້ອມທັງໃຫ້ເປັນໃຈກາງ ໃນການປະສານສົມທົບກັບພະແນກການກ່ຽວຂ້ອງຂອງແຂວງ ຄົ້ນຄວ້າ ສ້າງແຜນຈັດສັນທີ່ດິນ ແລະ ແຜນນຳໃຊ້ທີ່ດິນຢູ່ພາຍໃນແຂວງ ໃຫ້ລະອຽດ ແລະ ຈະແຈ້ງ.

ວຽກງານພະລັງງານ ແລະ ບໍ່ແຮ່: ຮີບຮ້ອນກວດກາຄືນລະອຽດຕື່ມ ກ່ຽວກັບຂໍ້ມູນຕົວເລກ ແລະ ການກຳນົດຫົວໜ່ວຍລາຄາຊົດເຊີຍ ແລະ ທົດແທນຄ່າເສຍຫາຍ ໃຫ້ແກ່ປະຊາຊົນທີ່ຈະຖືກຜົນກະທົບ ຈາກໂຄງການດັ່ງກ່າວ ຮັບປະກັນໃຫ້ປະຊາຊົນ ໄດ້ເຂົ້າຮ່ວມ ແລະ ມີສ່ວນຮ່ວມ ໃນການຄົ້ນຄວ້າກຳນົດຫົວໜ່ວຍລາຄາຊົດເຊີຍຕ່າງໆ ແລະ ຮີບຮ້ອນປະເມີນຜົນການຈັດຕັ້ງປະຕິບັດໂຄງການຊອກຄົ້ນ, ສຳຫຼວດ, ຂຸດຄົ້ນ ແລະ ປຸງແຕ່ງແຮ່ທາດ ໂດຍສະເພາະ ໂຄງການຂຸດຄົ້ນແຮ່ທາດແບບທົດລອງ ທີ່ພວມຈັດຕັ້ງປະຕິບັດຢູ່ພາຍໃນແຂວງ ວ່າມີຜົນໄດ້ ຜົນເສຍ ຄືແນວໃດ ແລະ ມີມາດຕະການຢ່າງເຂັ້ມງວດ ຕໍ່ໂຄງການທີ່ບໍ່ມີປະສິດທິພາບ ປະສິດທິຜົນ, ໂຄງການບໍ່ທີ່ປະຕິບັດຕາມສັນຍາ ແລະ ກົດໝາຍ.

ວຽກງານໂຍທາທິການ ແລະ ຂົນສົ່ງ: ໃຫ້ຖືເອົາວຽກງານປ້ອງກັນຕາຝັ່ງເຈື່ອນ ເປັນວຽກງານບຸລິມະສິດຈໍາເປັນ ເພື່ອຈັດສັນງົບປະມານເຂົ້າໃນວຽກງານດັ່ງກ່າວໃຫ້ສໍາເລັດກ່ອນ ເພື່ອຮັກສາເຂດນໍ້າແດນດິນຂອງປະເທດໄວ້ ແລະ ຄົ້ນຄວ້າ, ເຈລະຈາເອົາການຊ່ວຍເຫຼືອ ແລະ ປະກອບສ່ວນ ຈາກນັກລົງທຶນທັງພາຍໃນ ແລະ ຕ່າງປະເທດ ເພື່ອລະດົມຂົນຂວາຍເອົາທຶນ ສຸມໃສ່ໂຄງການກໍ່ສ້າງ, ສ້ອມແປງ ປ້ອງກັນຕາຝັ່ງເຈື່ອນ ທີ່ເປັນຈຸດບຸລິມະສິດຫຼໍ່ແຫຼມທາງຍຸດທະສາດ ໃນຂອບເຂດຄວາມຮັບຜິດຊອບຂອງຕົນ.

ພ້ອມກັນນີ້, ຄະນະ ໄດ້ເດີນທາງໄປເບິ່ງເຂດພື້ນທີ່ຕົວຈິງ ເປັນຕົ້ນ ເຂດຕາຝັ່ງເຈື່ອນ ຢູ່ບ້ານດອນສະຫວັນ ຫາ ບ້ານດ່ານ ທີ່ມີການເຊາະເຈື່ອນຫຼາຍຂອງຕາຝັ່ງແມ່ນໍ້າຂອງ, ສວນປູກໝາກພຸກຂອງບໍລິສັດຊິງຕາລີ ຢູ່ບ້ານດ່ານ ເມືອງ ຫ້ວຍຊາຍ ເພື່ອຕິດຕາມສະພາບການປູກ ແລະ ການສົ່ງອອກຜົນຜະລິດຂອງບໍລິສັດ. ຈາກນັ້ນ, ໄດ້ເດີນທາງໄປເບິ່ງເຂດກະສິກໍາ, ຟາມລ້ຽງງົວ ຂອງເຂດເສດຖະກິດສາມຫຼ່ຽມຄໍາ ແລະ ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານດັ່ງກ່າວ.