(ສພຊ) ກອງປະຊຸມຄົບຄະນະກໍາມາທິການວັດທະນະທໍາ-ສັງຄົມ ປະຈໍາປີ 2022 ໄດ້ໄຂຂຶ້ນໃນວັນທີ 7 ພະຈິກ 2022 ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ, ເຂົ້າຮ່ວມມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການດັ່ງກ່າວ, ມີບັນດາທ່ານລັດຖະມົນຕີທີ່ກ່ຽວຂ້ອງ, ບັນດາທ່ານຮອງປະທານກຳມາທິການພາຍໃນສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງກຳມາທິການດັ່ງກ່າວ ຈາກ 18 ເຂດເລືອກຕັ້ງທົ່ວປະເທດ ພ້ອມດ້ວຍແຂກຖືກເຊີນ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສະຫຼຸບຕີລາຄາ ແລະ ຖອດຖອນບົດຮຽນກ່ຽວກັບການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງກຳມາທິການ ປະຈໍາປີ 2022 ແລະ ກໍານົດທິດທາງແຜນການເຄື່ອນໄຫວວຽກງານ ປະຈໍາປີ 2023 ພ້ອມທັງເປັນການປຶກສາຫາລື ແລະ ສ້າງຄວາມເປັນເອກະພາບຕໍ່ບັນດາເນື້ອໃນທີ່ຈະນຳເຂົ້າຜ່ານໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ເພື່ອເຜີຍແຜ່ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການແຕ່ງຕັ້ງຄະນະສະມາຊິກສະພາແຫ່ງຊາດ ເພດຍິງ ຊຸດທີ IX.

ກອງປະຊຸມໄດ້ຮັບຟັງ ບົດສະຫຼຸບຕີລາຄາການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວ ປີ 2023 ຂອງກຳມາທິການ; ບົດສັງລວມສະພາບການຈັດຕັ້ງປະຕິບັດບັນດາຄາດໝາຍ ປະຈຳປີ 2022 ແລະ ແຜນຄາດຄະເນ ປະຈຳປີ 2023 ໃນຂົງເຂດວັດທະນະທຳ-ສັງຄົມ; ພ້ອມນັ້ນ ຍັງໄດ້ຮັບຟັງການປະກອບຄຳເຫັນຂອງບັນດາພາກສ່ວນຕ່າງໆຂັ້ນສູນກາງ ເປັນຕົ້ນ: ກະຊວງສາທາລະນະສຸກ, ກະຊວງສຶກສາທິການ ແລະ ກິລາ, ກະຊວງແຮງງານ ແລະ ສະຫວັດດີການສັງຄົມ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ອົງການກາແດງແຫ່ງຊາດ. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາ.

ກອງປະຊຸມຄັ້ງນີ້, ຈະດໍາເນີນເປັນເວລາ 2 ວັນ ຈົນຮອດວັນທີ 8 ພະຈິກ ຈຶ່ງຈະສໍາເລັດ.

(ພາບ ແລະ ຂ່າວ: ກົງທະນູຄໍາ ພິພັດເສລີ)