ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 22 ສິງຫາ 2022 ກໍາມາທິການບັນດາເຜົ່າ ສະພາແຫ່ງຊາດ ໄດ້ລົງເຄື່ອນໄຫວຕິດຕາມ, ກວດກາ ແລະ ເກັບກຳຂໍ້ມູນວຽກງານບັນດາເຜົ່າ ປະຈຳປີ 2022 ຢູ່ແຂວງຫລວງນໍ້າທາ ນໍາໂດຍທ່ານ ຄໍາຈັນ ໂສຕາປະເສີດ ຄະນະປະຈໍາສະພາແຫ່ງຊາດ ປະທານກຳມາທິການທິການບັນດາເຜົ່າ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 4 ແຂວງອຸດົມໄຊ ພ້ອມດ້ວຍຄະນະ, ໂອກາດນນີ້ໄດ້ເຂົ້າຢ້ຽມຢາມພົບປະທ່ານ ຄຳໄຫລ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງຫລວງນ້ຳທາ ແລະ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ເພື່ອລາຍງານຈຸດປະສົງໃນການລົງເຄື່ອນໄຫວໃນຄັ້ງນີ້ ພ້ອມນັ້ນ ຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານພົ້ນເດັ່ນໂດຍຫຍໍ້ຂອງແຂວງຫລວງນ້ຳທາ ແລະ ສະພາປະຊາຊົນແຂວງ.

            ຕອນແລງວັນດຽວກັນ ໄດ້ເປີດກອງປະຊຸມຮ່ວມບັນດາພະແນກການທີ່ກ່ຽວຂ້ອງ ແລະ ຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ຢູ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ຄຳຈັນ ໂສຕາປະເສີດ ຄະນະປະຈຳສະພາແຫ່ງຊາດ ປະທານກຳມາທິການທິການບັນດາເຜົ່າ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 4 ແຂວງອຸດົມໄຊ ໃຫ້ກຽດເຂົ້າຮ່ວມຂອງທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ,ຫົວໜ້າ, ຮອງຫົວໜ້າອົງການ, ພະການທີ່ກ່ຽວຂ້ອງຂອງແຂວງ ຫົວໜ້າ, ຮອງຫົວໜ້າຂະແໜງເຂົ້າຮ່ວມ 25 ຄົນ, ຍິງ 8 ຄົນ.

ກອງປະຊຸມໄດ້ຮັບຟັງການລາຍງານຂອງອົງການແນວລາວສ້າງຊາດແຂວງ ຕາມຄຳຖາມເຈາະຈິ້ມຂອງ ກຳມາທິການບັນດາເຜົ່າ ຂອງສະພາແຫ່ງຊາດ ເປັນຕົ້ນ ກ່ຽວກັບການແກ້ໄຂປະກົດການຫຍໍ້ທໍ້ທາງສາສະໜາ ແລະ ບັນດາເຜົ່າ ຢູ່ພາຍໃນແຂວງ; ຮັບຟັງການລາຍງານຂອງພະແນກພາຍໃນແຂວງ ໃນການຈັດຕັ້ງປະຕິບັດດຳລັດ ວ່າດ້ວຍການຄຸ້ມຄອງ ແລະ ການປົກປ້ອງການເຄື່ອນໄຫວຂອງສາສະໜາ ສະບັບເລກທີ 315/ລບ, ລົງວັນທີ 16/8/2016, ວຽກງານການປົກຄອງທ້ອງຖິ່ນ ແລະ ວຽກງານ 3 ສ້າງ ແລະ ຮັບຟັງວຽກງານພັດທະນາຊົນນະບົດ – ແກ້ໄຂຄວາມທຸກຍາກ, ການຈັດສັນພູມລຳເນົາ ແລະ ອາຊີບຄົງທີ; ການສ້າງບ້ານພັດທະນາ ທີ່ຕິດພັນກັບຜົນກະທົບຈາກໂຄງການພັດທະນາ ແລະ ການແກ້ໄຂບັນຫາຂອງປະຊາຊົນທີ່ຖຶກຜົນກະທົບຈາກໂຄງການພັດທະນາດັ່ງກ່າວຕໍ່ປະຊາຊົນລາວບັນດາເຜົ່າ, ພ້ອມດຽວກັນ ຜູ້ແທນກອງປະຊຸມໄດ້ແລກປ່ຽນປະກອບຄຳຄິດເຫັນຕໍ່ກັບວຽກງານບັນດາເຜົ່າພາຍໃນແຂວງ ຢ່າງມີຈຸດສຸມ ເພື່ອເຮັດໃຫ້ການຈັດຕັ້ງປະຕິບັດວຽກງານບັນດາເຜົ່າພາຍໃນແຂວງ, ເມືອງ ຂອງແຂວງຫລວງນ້ຳທາ ຖຶກຕ້ອງຕາມແນວທາງຂອງພັກ ແລະ ລະບຽບກົດໝາຍຂອງລັດ.

 

ຕອນທ້າຍ ຍັງໄດ້ຮັບຟັງຄຳເຫັນໂອ້ລົມຂອງ ທ່ານ ຄຳຈັນ ໂສຕາປະເສີດ ຄະນະປະຈຳສະພາແຫ່ງຊາດ ປະທານກຳມາທິການທິການບັນດາເຜົ່າ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງາມອັນພົ້ນເດັ່ນຫລາຍດ້ານທີ່ຍາດມາໄດ້ ພ້ອມທັງ ຮຽກຮ້ອງໃຫ້ພາກສ່ວນທີ່ກ່ຽວຂ້ອງຍົກສູງໃນການຕິດຕາມ, ກວດກາ ກ່ຽວກັບວຽກງານເຜົ່າ ແລະ ສາສະໜາ ຢູ່ພາຍໃນແຂວງ ແລະ ລົງໃກ້ຊິດຕິດແທດກັບພໍ່ແມ່ປະຊາຊົນບັນດາເຜົ່າໃຫ້ຫລາຍຂຶ້ນກວ່າເກົ່າ ເພື່ອນຳເອົາວຽກງານເຜົ່າ ແລະ ສາສະໜານຳເອົາແນວທາງຂອງພັກ, ລະບຽບກົດໝາຍຂອງລັດ ລົງໃຫ້ປະຊາຊົນຮັບຮູ້ເຊື່ອມຊຶມ ແລະ ເຂົ້າໃຈ.