(ສພຊ) ເພື່ອສະຫຼຸບການຈັດຕັ້ງປະຕິບັດວຽກງານສ້າງ ແລະ ປັບປຸງກົດໝາຍ ໃນໄລຍະຜ່ານມາ ພ້ອມທັງປຶກສາຫາລືແຜນການສ້າງ ແລະ ປັບປຸງກົດໝາຍ ແຕ່ປີ 2023-2025 ຂອງສະພາແຫ່ງຊາດ ຊຸດທີ IX, ແຜນການສ້າງ ແລະ ປັບປຸງກົດໝາຍ 5 ປີ (2026-2030) ຂອງສະພາແຫ່ງຊາດ ຊຸດທີ X ແລະ ການກະກຽມສະຫຼຸບຕີລາຄາວຽກງານໂຄສະນາ ເຜີຍແຜ່ ກົດໝາຍ ແລະ ສ້າງສະຕິເຄົາລົບກົດໝາຍໃນທົ່ວສັງຄົມ. ສະນັ້ນ, ໃນວັນທີ 20 ກຸມພາ 2023 ກໍາມາທິການກົດໝາຍ ໄດ້ສົມທົບກັບບັນດາກໍາມາທິການ ສະພາແຫ່ງຊາດ ແລະ ທຸກພາກສ່ວນທີ່ກ່ຽວຂ້ອງ ຈັດກອງປະຊຸມປຶກສາຫາລືວຽກງານກົດໝາຍ ທີ່ສະພາແຫ່ງຊາດ ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍ, ເຂົ້າຮ່ວມມີ ປະທານ-ຮອງປະທານ ກໍາມາທິການສະພາແຫ່ງຊາດ, ລັດຖະມົນຕີ-ຮອງລັດຖະມົນຕີ, ຫົວໜ້າ-ຮອງຫົວໜ້າອົງການທີ່ກ່ຽວຂ້ອງ.
ກອງປະຊຸມໄດ້ຮັບຟັງຜູ້ຕາງໜ້າກໍາມາທິການກົດໝາຍ ລາຍງານກ່ຽວກັບ 4 ເນື້ອໃນສໍາຄັນຄື: ບົດສະຫຼຸບວຽກງານສ້າງ ແລະ ປັບປຸງກົດໝາຍ, ແຜນການສ້າງ ແລະ ປັບປຸງກົດໝາຍ ປີ 2023-2025 ຂອງສະພາແຫ່ງຊາດ ຊຸດທີ IX, ແຜນການສ້າງ ແລະ ປັບປຸງກົດໝາຍ 5 ປີ (2026-2030) ຂອງສະພາແຫ່ງຊາດ ຊຸດທີ X ແລະ ແຜນການປະເມີນການໂຄສະນາ ເຜີຍແຜ່ ກົດໝາຍ ແລະ ສ້າງສະຕິເຄົາລົບກົດໝາຍໃນທົ່ວສັງຄົມ. ພ້ອມກັນນີ້, ກອງປະຊຸມໄດ້ຮັບຟັງການປະກອບຄໍາເຫັນທີ່ເປັນປະໂຫຍດ ໃຫ້ແກ່ກອງປະຊຸມ.
ໃນຕອນທ້າຍ ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນ ທ່ານໄດ້ກ່າວສະແດງຄວາມຊົມເຊີຍ ແລະ ຂອບອົກຂອບໃຈ ຢ່າງເລິກເຊິ່ງຕໍ່ບັນດາທ່ານທີ່ໄດ້ເຂົ້າຮ່ວມ ແຕ່ຕົ້ນຕະຫຼອດປາຍ ໂດຍສະເພາະ ຕໍ່ຄໍາເຫັນຂອງບັນດາທ່ານ ເຊິ່ງໄດ້ເປັນເອກະພາບໂດຍພື້ນຖານ ຕໍ່ບັນດາເນື້ອໃນ ແລະ ສະເໜີໃຫ້ບັນດາທ່ານ ຈົ່ງນໍາເອົາຈິດໃຈ, ເນື້ອໃນ ຂອງກອງປະຊຸມຄັ້ງນີ້ ລາຍງານໃຫ້ຄະນະນໍາຂອງຕົນຮັບຊາບ ແລ້ວຂໍທິດຊີ້ນໍາ ເພື່ອຈັດຕັ້ງຜັນຂະຫຍາຍ ໃນຂອບເຂດຄວາມຮັບຜິດຊອບຂອງແຕ່ລະກະຊວງ, ອົງການ ໃຫ້ທັນກໍານົດເວລາ; ໃຫ້ທຸກພາກສ່ວນຮີບຮ້ອນ ຫັນເປັນແຜນການລະອຽດ ແລະ ແຕ່ງຕັ້ງຜູ້ຮັບຜິດຊອບ, ມອບໝາຍໜ້າທີ່ໃຫ້ລະອຽດຈະແຈ້ງ, ຂຶ້ນແຜນງົບປະມານ, ກໍານົດໜ້າວຽກ ແລະ ເວລາໃຫ້ສໍາເລັດ ເພື່ອຮັບປະກັນປະສິດທິພາບ, ປະສິດທິຜົນ ໃນການຈັດຕັ້ງປະຕິບັດ. ທ່ານຍັງໄດ້ເນັ້ນຕື່ມວ່າ: ໃຫ້ແຕ່ລະກະຊວງ, ອົງການ ຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ ແຕ່ປີ 2026-2030 ໃຫ້ຖືເອົາຄຸນນະພາບເປັນສໍາຄັນ, ປະລິມານເປັນສໍາຮອງ, ຄັດເລືອກເອົາກົດໝາຍທີ່ມີຄວາມຈໍາເປັນ ແລະ ຮີບດ່ວນ ຖ້າຫາກເຫັນວ່າກົດໝາຍໃດ ທີ່ບໍ່ທັນມີຄວາມຈໍາເປັນ ແມ່ນໃຫ້ສ້າງເປັນດໍາລັດ, ຖ້າວ່າກົດໝາຍໃດບໍ່ຜ່ານຕາມຂັ້ນຕອນ ແລະ ບໍ່ທັນຕາມກໍານົດເວລາ ທີ່ໄດ້ກໍານົດໄວ້ໃນກົດໝາຍວ່າດ້ວຍການສ້າງນິຕິກໍາ ກໍຈະຕົກໄປ ຫຼື ບໍ່ໄດ້ຮັບການພິຈາລະນາອີກ. ສໍາລັບທິດທາງແຜນການປະເມີນການໂຄສະນາ ເຜີຍແຜ່ກົດໝາຍ ແລະ ການສ້າງສະຕິເຄົາລົບກົດໝາຍນັ້ນ ຈະໄດ້ມີຄໍາແນະນໍາແຈ້ງການເປັນລາຍລັກອັກສອນຕ່າງຫາກ. ສະເໜີໃຫ້ກະຊວງ, ອົງການ ທີ່ເປັນເຈົ້າຂອງກົດໝາຍ ເປັນເຈົ້າການດໍາເນີນການປະເມີນການໂຄສະນາ ເຜີຍແຜ່ ກົດໝາຍ ແລະ ນິຕິກໍາໃຕ້ກົດໝາຍ ທີ່ຢູ່ໃນຄວາມຮັບຜິດຊອບ ໄດ້ກວດກາຄືນກົດໝາຍ ແມ່ນມີການໂຄສະນາ ເຜີຍແຜ່ ທົ່ວເຖິງແລ້ວຫຼືບໍ່? ພະນັກງານ-ລັດຖະກອນ ໃນຄວາມຮັບຜິດຊອບ ແຕ່ຂັ້ນສູນກາງຮອດຂັ້ນເມືອງ, ອົງການອື່ນ, ປະຊາຊົນ, ນັກທຸລະກິດ ໄດ້ຮັບການເຜີຍແຜ່ແລ້ວບໍ່? ການໂຄສະນາ ເຜີຍແຜ່ ແມ່ນໄດ້ຈັກຄັ້ງ? ແລະ ມີຜູ້ເຂົ້າຮ່ວມຈັກຄົນ? ແລ້ວສະຫຼຸບຕີລາຄາການປະເມີນຫາລັດຖະບານ ເພື່ອສະຫຼຸບສັງລວມຜົນການປະເມີນຕາມ 5 ຂົງເຂດຄື: 1) ກົດໝາຍຂົງເຂດເສດຖະກິດ, 2) ກົດໝາຍຂົງເຂດວັດທະນະທໍາສັງຄົມ, 3) ກົດໝາຍຂົງເຂດການປົກຄອງ ແລະ ຍຸຕິທໍາ, 4) ກົດໝາຍຂົງເຂດປ້ອງກັນຊາດ-ປ້ອງກັນຄວາມສະຫງົບ, 5) ກົດໝາຍຂົງເຂດຕ່າງປະເທດ ລາຍງານຫາສະພາແຫ່ງຊາດ.
