(ສພຊ) ເພື່ອປຶກສາຫາລື ກ່ຽວກັບຮ່າງແຜນ​ພັດທະນາ​ວຽກງານການຕ່າງປະເທດຂອງສະພາ​ແຫ່ງ​ຊາດ ໄລຍະ 5 ປີ 2021-2025; ແຜນການຈັດກິດຈະກຳ ຕິດພັນກັບການສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ-ລາວ ປີ 2022 ລະຫວ່າງສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ແລະ ປຶກສາຫາລື ການປະສານງານກັນ ລະຫວ່າງບັນດາກຳມະການຂອງກຳມາທິການການຕ່າງປະເທດ, ຄະນະນຳກຳມາທິການການຕ່າງປະເທດຂອງສະພາແຫ່ງຊາດ ກັບກຳມະການຂອງກຳມາທິການການຕ່າງປະເທດປະຈຳຢູ່ເຂດເລືອກຕັ້ງ ໃນທົ່ວປະເທດ ແລະ ສະພາປະຊາຊົນຂັ້ນແຂວງ ແລະ ບັນຫາອື່ນໆ.

ຜ່ານການຮັບຟັງບັນດາບົດລາຍງານຕໍ່ກັບກອງ​ປະຊຸມປຶກສາຫາລືເນື້ອໃນສໍາຄັນຕ່າງໆຂອງກໍາມາທິການການຕ່າງປະເທດ, ບັນດາສະມາຊິກສະພາແຫ່ງຊາດ, ກໍາມະການຂອງກໍາມາທິການການຕ່າງປະເທດ ໄດ້​ປະກອບຄຳຄິດຄຳເຫັນ, ຂໍ້ສະເໜີ ແລະ ຂໍ້ຄິດເຫັນການແກ້ໄຂບັນຫາຄົງຄ້າງຕ່າງໆ ​ຢ່າງກົງໄປກົງມາ ແນໃສ່ຈັດຕັ້ງປະຕິບັດວຽກງານການຕ່າງປະເທດໃຫ້​ມີ​ປະສິດທິ​ພາບ ແລະ ປະສິດທິຜົນ.

ກອງປະຊຸມໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳຈາກທ່ານ ປອ. ນາງ ສູນທອນ ໄຊຍະຈັກ ເຊິ່ງທ່ານໄດ້ມີຄໍາເຫັນຊີ້ນໍາວ່າ: ປັບປຸງແບບແຜນວິທີການເຮັດວຽກຂອງກໍາມາທິການການຕ່າງປະເທດ, ເພີ່ມຂອດການປະສານງານ ລະຫວ່າງກຳມາທິການ ກັບສະມາຊິກສະພາແຫ່ງຊາດ ແລະ ພ້ອມກັບການປະສານງານສົມທົບກັບຝ່າຍ ສະພາແຫ່ງຊາດຫວຽດນາມ ເພື່ອກຳນົດທິດທາງການສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ 2022.

ກອງປະຊຸມດັ່ງກ່າວ ດໍາເນີນໃນຕອນບ່າຍວັນທີ 30 ມິຖຸນາ 2022, ທີ່ຫໍສະພາແຫ່ງຊາດ ຈັດໂດຍກໍາມາທິການການຕ່າງປະເທດ ເຊິ່ງໄດ້ປຶກສາຫາລືເນື້ອໃນສຳຄັນຂອງກຳມາທິການການຕ່າງປະເທດ ໂດຍປະຕິບັດຕາມກົດໝາຍ ວ່າດ້ວຍສະພາແຫ່ງຊາດ ແລະ ມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກໍາມາທິການການຕ່າງປະເທດ ໂດຍການເປັນປະທານຂອງທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ, ໂດຍການເຂົ້າຮ່ວມຂອງທ່ານ ປອ. ນາງ ສູນທອນ ໄຊຍະຈັກ ຮອງ​ປະທານ​ສະພາ​ແຫ່ງ​ຊາດ, ຜູ້​ຊີ້​ນໍາ​ວຽກ​ງານ​ການ​ຕ່າງປະ​ເທດ; ມີສະມາຊິກສະພາແຫ່ງຊາດ ທີ່ເປັນກໍາມະການຂອງກຳມາທິການການຕ່າງປະເທດ ປະຈໍາແຕ່ລະເຂດເລືອກຕັ້ງໃນຂອບເຂດທົ່ວປະເທດ ແລະ ບັນດາກົມທີ່ເປັນເສນາທິການໃຫ້ແກ່ກຳມາທິການການຕ່າງປະເທດ.