ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນໂອກາດເຂົ້າຮ່ວມພິທີເຊັນບົດບັນທຶກການຮ່ວມມື ແລະ ການປະສານງານ ລະຫວ່າງກໍາມາທິການການຕ່າງປະເທດ ສະພາແຫ່ງຊາດ ແລະ ກະຊວງການຕ່າງປະເທດ ໃນວັນທີ 23 ສິງຫາ 2022 ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ສະເໜີກໍາມາທິການການຕ່າງປະເທດ ສະພາແຫ່ງຊາດ ແລະ ກະຊວງການຕ່າງປະເທດ ເອົາໃຈໃສ່ 8 ບັນຫາສຳຄັນດັ່ງນີ້:
1. ການນຳຂອງທັງ 2 ອົງການສືບຕໍ່ເອົາໃຈໃສ່ຊີ້ນໍາ-ນໍາພາຢ່າງໃກ້ຊິດວຽກງານການເຄື່ອນໄຫວຕ່າງປະເທດ, ຖືສຳຄັນການພົວພັນປະສານງານກັນ ລະຫວ່າງ ກໍາມາທິການການຕ່າງປະເທດ ສະພາແຫ່ງຊາດ ແລະ ກະຊວງການຕ່າງປະເທດ ໂດຍການສ້າງ ແລະ ປັບປຸງກົນໄກ, ລະບອບແບບແຜນວິທີ​ເຮັດ​ວຽກ ໃຫ້ສອດຄ່ອງກັບເງື່ອນໄຂ ແລະ ສະພາບຕົວຈິງຂອງປະເທດເຮົາໃນປັດຈຸບັນ ເພື່ອຮັບປະກັນໃຫ້ການເຄື່ອນໄຫວວຽກງານການຕ່າງປະເທດໃນໄລຍະໃໝ່ ສອດຄ່ອງກັບແນວທາງນະໂຍບາຍການຕ່າງປະເທດຂອງພັກ, ພ້ອມກັນສ້າງເງື່ອນໄຂສາກົນທີ່ສະດວກແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ;
2. ສືບຕໍ່ປະສານສົມທົບກັນໃນ​ການ​ຄົ້ນຄວ້າ ສ້າງກົດໝາຍ ແລະ​ ນິຕິກຳໃຕ້ກົດໝາຍໃນ​ຂົງ​ເຂດ​ການ​ຕ່າງປະ​ເທດ ທີ່ຍັງຄົງຄ້າງຈຳນວນໜຶ່ງ ເປັນຕົ້ນແມ່ນການສ້າງຮ່າງກົດໝາຍວ່າດ້ວຍໜັງສືຜ່ານແດນ, ການສ້າງສັນຍາ, ສົນທິສັນຍາສາກົນ, ບົດບັນທຶກຊ່ວຍຈໍາ ແລະ ຂໍ້ຕົກລົງຕ່າງໆ ລະຫ່ວາງສະພາແຫ່ງຊາດ, ສະພາປະຊາຊົນທ້ອງຖິ່ນ ກັບ ລັດຖະສະພາຂອງບັນດາປະເທດເພື່ອນມິດເປັນຕົ້ນ ເພື່ອນມິດຍຸດທະສາດ ໃຫ້​ມີ​ເນື້ອ​ໃນ​ຄົບ​ຖ້ວນ, ຈະ​ແຈ້ງ ​ແລະ ຮັດກຸມ​ ຮັບປະກັນ​ຄວາມຖືກຕ້ອງ, ສອດຄ່ອງ​ກັບ​ແນວທາງນະໂຍບາຍ​ຂອງ​ພັກ, ນຳມາ​ຜົນ​ປະ​ໂຫຍ​ດໃຫ້ແກ່ປະເທດຊາດເຮົາ;
3. ສອງອົງການ ສືບຕໍ່ປະສານງານ ແລະ ໃຫ້ການຮ່ວມມືໃນວຽກງານຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍໃນຂົງເຂດວຽກງານການຕ່າງປະເທດ, ການຈັດຕັ້ງປະຕິບັດຂໍ້ຕົກລົງ, ສັນຍາ ແລະ ສົນທິສັນຍາສາກົນ ທີ່ ສປປລາວ ໄດ້ເປັນພາຄີ; ການຕິດຕາມກວດກາ ວຽກງານຊາຍແດນແຫ່ງຊາດ, ວຽກງານກົງສຸນ, ການເຄື່ອນໄຫວຂອງອົງການຈັດຕັ້ງສາກົນທີ່ຂຶ້ນກັບລັດຖະບານ, ວຽກງານສິດທິມະນຸດ ແລະ ບັນຫາອື່ນໆຕາມທິດຊີ້ນໍາຂອງຂັ້ນເທິງ;
4. ເປັນເຈົ້າການ ໃນການກະກຽມ ແລະ ສະໜອງຂໍ້ມູນໃຫ້ແກ່ຄະນະຜູ້ແທນຂອງທັງສອງອົງການ ໃນການໄປເຄື່ອນໄຫວຢ້ຽມຢາມ, ແລກປ່ຽນບົດຮຽນ ກັບຕ່າງປະເທດ, ການເຂົ້າຮ່ວມກອງປະຊຸມລັດຖະສະພາພາກພື້ນ ແລະ ສາກົນ, ການ​ຕ້ອນຮັບ​ຄະນະ​ຜູ້​ແທນ​ຕ່າງປະ​ເທດ ທີ່​ມາ​ເຄື່ອນ​ໄຫວ​ຢ້ຽມຢາມ ​ສປປລາວ ແລະ ກະກຽມການເປັນເຈົ້າພາບຈັດກອງປະຊຸມອົງການລັດຖະສະພາພາກພື້ນ ແລະ ສາກົນ ແຕ່ຫົວທີ;
5. ເພີ່ມທະວີການປະກອບສ່ວນໃນການເຂົ້າຮ່ວມເຄື່ອນໄຫວວຽກງານການຕ່າງປະເທດ ຢ່າງຕັ້ງໜ້າ ເພື່ອຍົກສູງຖານະບົດບາດຂອງ ສປປລາວ ກໍຄືສະພາແຫ່ງຊາດ ໃນເວທີພາກພື້ນ ແລະ ສາກົນ;
6. ທັງສອງອົງການສືບຕໍ່ປະສານສົມທົບໃນການຄົ້ນຄວ້າ ແລະ ສະໜອງຂໍ້ມູນ-ຂ່າວສານດ້ານວິຊາການໃນການເຄື່ອນໄຫວວຽກງານການຕ່າງປະເທດ ເປັນຕົ້ນແມ່ນການແລກປ່ຽນຂໍ້ມູນກ່ຽວກັບການພົວພັນຮ່ວມມືໃນຂອບສອງຝ່າຍ ແລະ ຫຼາຍຝ່າຍ, ສະພາບການພົ້ນເດັ່ນ ຂອງພາກພື້ນ ແລະ ສາກົນ ເພື່ອຄວາມເປັນເອກະພາບໃນການຕີລາຄາສະພາບການໃນແຕ່ລະໄລຍະ;
7. ສືບຕໍ່ໃຫ້ການສະໜັບສະໜູນເຊິ່ງກັນ ແລະ ກັນ ໃນການພັດທະນາດ້ານຊັບພະຍາກອນມະນຸດ ແລະ ສ້າງຄວາມເຂັ້ມແຂງທາງດ້ານວິຊາການ ເປັນຕົ້ນແມ່ນຄວາມຮູ້ກ່ຽວກັບສົນທິສັນຍາ ແລະ ກົດໝາຍສາກົນ, ວຽກງານດ້ານສິດທິມະນຸດ, ວຽກງານດ້ານພິທີການທູດ, ວຽກງານກົງສຸນ, ການສ້າງພະນັກງານແປພາສາມືອາຊີບ, ການຍົກລະດັບພາສາຕ່າງປະເທດ ແລະ ວຽກງານອື່ນໆ ທີ່ມີຄວາມຈຳເປັນໃນການເຄື່ອນໄຫວວຽກງານການຕ່າງປະເທດໃນໄລຍະໃໝ່;
8. ສະເໜີໃຫ້ການນໍາຂອງສອງອົງການເອົາໃຈໃສ່ໃນການສຶກສາອົບຮົມການເມືອງ-ແນວຄິດ, ຍົກສູງຄວາມຮັບຜິດຊອບໃນການປະຕິບັດໜ້າທີ່ການເມືອງ ແລະ ເພີ່ມທະວີການພົວພັນປະສານງານໃຫ້ມີປະສິດທິຜົນ ໃນຖັນແຖວພະນັກງານຂອງຕົນ ເພື່ອຮັບປະກັນການຈັດຕັ້ງປະຕິບັດ ບົດບັນທຶກສະບັບນີ້ເປັນຢ່າງດີ.