ຕອນເຊົ້າຂອງວັນພະຫັດ, ວັນທີ 6 ເມສາ 2023, ຢູ່ທີ່ຫ້ອງປະຊຸມສະພາປະຊາຊົນແຂວງ ກໍາມະບານຮາກຖານສະພາປະຊາຊົນແຂວງອຸດົມໄຊ, ໄດ້ຮ່ວມຊີວິດປະຈໍາເດືອນ ກຸມພາ-ມີນາ 2023, ໂດຍການເປັນປະທານຂອງສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກຳມະບານແຂວງ, ຮອງປະທານສະພາປະຊາຊົນແຂວງ, ເປັນກຽດເຂົ້າຮ່ວມມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີຮອງປະທານສະພາປະຊາຊົນແຂວງ, ບັນດາທ່ານໃນຄະນະປະຈໍາ, ຄະນະກຳມະບານ ແລະ ສະມາຊິກກໍາມະບານພາຍໃນຮາກຖານສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ຄະນະຮັບຜິດຊອບໄດ້ຜ່ານຮ່າງບົດສະຫລຸບປະຈໍາເດືອນ ກຸມພາ-ມີນາ ແລະ ທິດທາງແຜນການປະຈໍາ ເດືອນ ເມສາ ປີ 2023, ຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບບັນຊີ ແລະ ຄັງເງິນ ກອງທຶນ 3 ອົງການຈັດຕັ້ງມະຫາຊົນ ແລະ ແຈ້ງການຂອງສະຫະພັນກໍາມະບານແຂວງ, ເລກທີ 237/ສກຂ, ວ່າດ້ວຍການ ເກັບກໍາຂໍ້ມູນສະຖິຕິສະມາຊິກກໍາມະບານ, ເກັບເງິນບໍາລຸງ, ເງິນກອງທຶນປະຈໍາ 6 ເດືອນຕົ້ນປີ ແລະ 6 ເດືອນທ້າຍປີ 2023 ຂອງສະມາຊິກກໍາມະບານໃນຂອບເຂດທົ່ວແຂວງອຸດົມໄຊ. ພ້ອມນັ້ນ, ບັນດາສະຫາຍສະມາຊິກກຳມະບານ ໄດ້ປະກອບຄໍາຄິດຄໍາເຫັນຢ່າງກົງໄປກົງມາ ຕໍ່ຮ່າງບົດສະຫຼຸບ, ເພື່ອເຮັດໃຫ້ມີເນື້ອໃນຄົບຖ້ວມ, ສົມບູນ, ຖືກຕ້ອງຕາມແນວທາງນະໂຍບາຍຂອງພັກ, ກົດໝາຍຂອງລັດ.

ຫລັງຈາກນັ້ນ, ສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ ໄດ້ມີຄໍາເຫັນຕໍ່ການນໍາພາ-ຊີ້ນໍາ ການຈັດຕັ້ງປະຕິບັດວຽກງານຂອງສະພາປະຊາຊົນແຂວງອຸດົມໄຊ ໃນໄລຍະ 2 ປີກວ່າ, ເຊິ່ງສະພາປະຊາຊົນແຂວງ ໄດ້ປະຕິບັດສິດ ແລະ ໜ້າທີ່ຂອງຕົນຢ່າງຕັ້ງໜ້າ ຕາມກົດໝາຍກໍານົດ, ເຮັດສໍາເລັດວຽກງານຫຼາຍດ້ານຕາມຈຸດປະສົງ ແລະ ຄາດໝາຍທີ່ວາງໄວ້ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າໃນທົ່ວແຂວງອຸດົມໄຊ, ພ້ອມທັງເນັ້ນໜັກໃຫ້ພະນັກງານ-ລັດຖະກອນພາຍໃນສະພາປະຊາຊົນແຂວງ ສືບຕໍ່ສຶກສາອົບຮົມການເມືອງ-ແນວຄິດ, ເຊື່ອມຊຶມແນວທາງນະໂຍບາຍຂອງພັກ, ກົດໝາຍ, ມະຕິ, ຄໍາສັ່ງ ແລະ ເອກະສານຕ່າງໆ, ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ, ຕີຖອຍແນວຄິດປຽບທຽບຊັງຊາ; ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານວິຊາສະເພາະທີ່ຕົນຮັບຜິດຊອບໃຫ້ດີຂຶ້ນກວ່າເກົ່າ, ເປັນເຈົ້າການໃນການຈັດຕັ້ງປະຕິບັດກົດໝາຍ ແລະ ລະບຽບການຕ່າງໆ.

ປະຕິບັດຕາມວະລາ, ກອງປະຊຸມຫຍັງໄດ້ຮັບຟັງການເຜີຍແຜ່ເອກະສານໂຄສະນາ-ປາຖະກະຖາ ເສີມຂະ ຫຍາຍທາດແທ້ມູນເຊື້ອປະຕິວັດ ຂອງກໍາລັງປ້ອງກັນຄວາມສະຫງົບປະຊາຊົນ ຄົບຮອບ 62 ປີ(05 ເມສາ 1961-05 ເມສາ 2023), ບົດປາຖະກະຖາ 61 ປີ ແຫ່ງການກໍາເນີດ, ເຕີບໃຫຍ່ຂະຫຍາຍຕົວ ແລະ ຜົນງານໄຊຊະນະຂອງກໍາລັງປ້ອງກັນຄວາມສະຫງົບແຂວງອຸດົມໄຊ(04 ເມສາ 1962-04 ເມສາ 2023) ສະເໜີໂດຍສະຫາຍ ທອງຄານ ວັດສະດາກອນ ເລຂາໜ່ວຍພັກສະພາປະຊາຊົນແຂວງ ແລະ ໄດ້ຮັບຟັງການເຜີຍແຜ່ເອກະສານສໍາຄັນອື່ນໆອີກຈໍານວນໜຶ່ງ. ພາບ/ຂ່າວ: ແສງພອນ ອິນນະລົງ.