(ສພຊ) ໃນຕອນເຊົ້າຂອງວັນທີ 27 ກຸມພາ 2024, ສະຫະພັນກໍາມະບານສະພາແຫ່ງຊາດ ໄດ້ຈັດກອງປະ ຊຸມເຜີຍແຜ່ມູນເຊື້ອວັນສ້າງຕັ້ງອົງການຈັດຕັ້ງກໍາມະບານລາວ ຄົບຮອບ 68 ປີ (1 ກຸມພາ 1956-1 ກຸມພາ 2024) ແລະ ສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈໍາປີ 2023 ແລະ ທິດທາງແຜນການປະຈໍາປີ 2024 ໂດຍການເປັນປະທານຮ່ວມຂອງສະຫາຍ ຮສ. ປອ. ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ຄະນະປະຈໍາພັກ, ຜູ້ຊີ້ນໍາອົງການຈັດຕັ້ງມະຫາຊົນສະພາແຫ່ງຊາດ; ສະຫາຍ ພອນສານ ວິໄລເມັ້ງ ຮອງປະທານຄະນະບໍລິ ຫານງານສູນກາງສະຫະພັນກໍາມະບານລາວ (ສກລ) ແລະ ສະຫາຍ ອໍາໄພ ຈິດມານົນ ຄະນະບໍລິຫານງານສກລ, ປະ ທານຄະນະບໍລິຫານງານສະຫະພັນກໍາມະບານສະພາແຫ່ງຊາດ.
ກອງປະຊຸມໄດ້ເຜີຍແຜ່ມູນເຊື້ອວັນສ້າງຕັ້ງກໍາມະບານລາວ ຄົບຮອບ 68 ປີ, ເຊື່ອມຊຶມເອກະສານແນວຄິດຊີ້ນຳຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ ກ່ຽວກັບ “ເສດຖະກິດເອກະລາດເປັນເຈົ້າຕົນເອງ”, ຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ປະຈໍາປີ 2023 ແລະ ທິດທາງແຜນການເຄື່ອນໄຫວປະຈໍາປີ 2024 ຂອງສະຫະພັນກໍາມະບານສະພາແຫ່ງຊາດ, ຜ່ານຂໍ້ຕົກລົງຂອງສູນກາງສະຫະພັນກໍາມະບານລາວ ກ່ຽວກັບການຢັ້ງຢືນ 5 ເປັນເຈົ້າ ແລະ ຂໍ້ຕົກລົງຂອງຄະນະພັກສະພາແຫ່ງຊາດ ກ່ຽວກັບການຢັ້ງຢືນ 5 ເປັນເຈົ້າ; ຫຼັງຈາກນັ້ນ, ໄດ້ມອບໃບຢັ້ງຢືນ 5 ເປັນເຈົ້າ ຂອງ ສກລ ໃຫ້ແກ່ສະຫະພັນກໍາມະບານສະພາແຫ່ງຊາດ ແລະ ໃບຢັ້ງຢືນ 5 ເປັນເຈົ້າ ຂອງຄະນະພັກສະພາແຫ່ງຊາດໃຫ້ແກ່ບັນດາຮາກຖານກໍາມະບານສະພາແຫ່ງຊາດ.
ໂອກາດດັ່ງກ່າວ ສະຫາຍ ຮສ. ປອ. ລິນຄໍາ ດວງສະຫວັນ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ຄະນະພັກສະພາແຫ່ງຊາດ ເວລາໃດກໍຖືອົງການຈັດຕັ້ງມະຫາຊົນ ເວົ້າລວມ, ເວົ້າສະເພາະອົງການຈັດຕັ້ງກໍາມະບານ ເປັນກໍາລັງແຮງສັງລວມເຂັ້ມແຂງຂອງພັກ ໃນການສ້າງຂະບວນການແຂ່ງຂັນ ຕິດພັນກັບການປະຕິບັດໜ້າທີ່ດ້ານວິຊາສະເພາະ. ເພື່ອບ່ອນອີງໃຫ້ແກ່ສະຫະພັນກໍາມະບານສະພາແຫ່ງຊາດ ສືບຕໍ່ເຄື່ອນໄຫວຕາມພາລະບົດບາດຂອງຕົນ, ສະຫາຍໄດ້ທິດຊີ້ນຳດັ່ງນີ້: ສືບຕໍ່ເອົາໃຈໃສ່ຍົກສູງທາງດ້ານການເມືອງ-ແນວຄິດ, ຄຸນທາດການເມືອງຄຸນສົມບັດສິນທໍາປະຕິວັດ; ເຊື່ອມຊຶມກໍາແໜ້ນມູນເຊື້ອ ແລະ ທາດແທ້ຂອງພັກ, ມູນເຊື້ອກໍາມະບານລາວ ໃນຖານະເປັນການຈັດຕັ້ງໃນລະບົບການເມືອງຂອງພັກ ໃນລະບອບປະຊາທິປະໄຕປະຊາຊົນ;ຍົກສູງນໍ້າໃຈຮັກຊາດ, ຮັກລະບອບໃໝ່, ຮີດຄອງປະເພນີ, ພາສາປາກເວົ້າ;ປົກປັກຮັກສາ ແລະ ເສີມຂະຫຍາຍມູນເຊື້ອຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າ; ຖືຄັນທຸງຂອງພັກ ແລະ ເດີນຕາມເສັ້ນທາງຂອງພັກ ຢ່າງເດັດດ່ຽວໜຽວແໜ້ນສະເໝີຕົ້ນສະເໝີປາຍ. ເພີ່ມທະວີການປັບປຸງການຈັດຕັ້ງ, ແບບແຜນໃນການເຄື່ອນໄຫວ ຕາມພາລະບົດບາດຂອງຕົນ; ຍຶດໝັ້ນທັດສະນະຊົນຊັ້ນຜູ້ອອກແຮງງານ, ມີຄວາມດຸໝັ່ນຂະຫຍັນພຽນ; ນັບຖື ແລະ ປະຕິບັດກົດລະບຽບກໍາມະບານຢ່າງເຂັ້ມງວດ, ມີລະບຽບວິ ໄນໃນການປະຕິບັດໜ້າທີ່ຄວາມຮັບຜິດຊອບ; ເພີ່ມທະວີຄວາມບຸກບືນສູ້ຊົນ, ກ້າຫານ, ສະດຸ້ງໄວ ແລະ ປະດິດສ້າງຫຼາຍກວ່າເກົ່າ ໃນການເປັນເສນາທິການໃຫ້ແກ່ສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ ປະຕິບັດພາລະບົດ ບາດທີ່ກໍານົດໄວ້ໃນກົດໝາຍ ໃຫ້ມີປະສິດທິພາບ ແລະ ປະສິດທິຜົນສູງຍິ່ງໆຂຶ້ນ. ເອົາໃຈໃສ່ຄົ້ນຄວ້າ ແລະ ຜັນຂະ ຫຍາຍແນວຄິດຊີ້ນໍາຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ ກ່ຽວກັບ “ເສດຖະກິດເອກະລາດເປັນເຈົ້າຕົນເອງ” ໃຫ້ສອດຫ້ອຍເຂົ້າໃນຂົງເຂດວຽກງານຕົວຈິງ ໃນໄລຍະທີ່ປະເທດຊາດຂອງພວກເຮົາ ພວມຢູ່ໃນສະພາບຫຍຸ້ງຍາກທາງດ້ານເສດຖະກິດ-ການເງິນ ສະມາຊິກກໍາມະບານ ແລະ ພະນັກງານ-ລັດຖະກອນ ຕ້ອງຍົກສູງບົດບາດ, ຄວາມເປັນເຈົ້າຕົນເອງ, ປັບປຸງກໍາລັງແຮງສັງລວມໃຫ້ເຂັ້ມແຂງ ພ້ອມກັນບຸກທະລຸຜ່ານຜ່າຄວາມຫຍຸ້ງຍາກດັ່ງກ່າວ ໃຫ້ສໍາເລັດຢ່າງແທ້ຈິງ. ສືບຕໍ່ຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຂອງສູນກາງສະຫະພັນກໍາມະບານລາວ ກໍຄືການຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າ ປະຈໍາປີ 2024 ຂອງສະຫະພັນກໍາມະບານສະພາແຫ່ງຊາດ ຕິດພັນກັບຂະ ບວນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ແລະ ຂະບວນການແຂ່ງຂັນ “ຮັກຊາດ ແລະ ພັດທະນາ” ໂດຍຮັບປະກັນໃຫ້ສະມາຊິກກໍາມະບານ ປະກອບສ່ວນເຂົ້າໃນວຽກງານຂະບວນການ ບົນພື້ນຖານຄວາມເອົາໃຈໃສ່ເຕົ້າໂຮມຄວາມສາມັກຄີ, ສ້າງກໍາລັງແຮງສັງລວມທີ່ເປັນປຶກແຜ່ນ, ຊ່ວຍເຫຼືອກັນແກ້ໄຂຊີວິດການເປັນຢູ່, ປົກປ້ອງຜົນປະ ໂຫຍດອັນຊອບທໍາຂອງສະມາຊິກກໍາມະບານ ແລະ ພະນັກງານລັດຖະກອນ; ແຂ່ງຂັນກັນສ້າງຜົນງານ ເພື່ອກາຍເປັນສະ ມາຊິກກໍາມະບານດີເດັ່ນ, ປະກອບສ່ວນສ້າງຮາກຖານກໍາມະບານດີເດັ່ນ ແລະ ສະຫະພັນກໍາມະບານດີເດັ່ນ, ຮັກສາມູນ ເຊື້ອ 5 ເປັນເຈົ້າໄວ້ໄດ້ຕາມຄາດໝາຍ. ເອົາໃຈໃສ່ສົມທົບແໜ້ນກັບໄຕຣພາຄີ ເປັນຕົ້ນກັບສູນກາງສະຫະພັນກໍາມະບານລາວ, ກໍາມະບານກະຊວງແຮງງານ ແລະ ສະຫວັດດີການ-ສັງຄົມ, ກໍາມະບານສະພາການຄ້າ ແລະ ອຸດສາຫະກໍາແຫ່ງຊາດພ້ອມທັງສົມທົບແໜ້ນກັບພາຄີຂອງຕົນ ເປັນຕົ້ນແນວລາວສ້າງຊາດ, ຊາວໜຸ່ມ, ແມ່ຍິງ ແລະ ນັກຮົບເກົ່າ ເພື່ອປະ ກອບສ່ວນໃນການປົກປ້ອງກໍາມະກອນ, ຊາວຜູ້ອອກແຮງງານລາວ ແລະ ປະກອບສ່ວນໃນການປົກປ້ອງແຮງງານສາກົນ ຕາມຖະແຫຼງການໃນແຕ່ລະໄລຍະ.
ສະຫະພັນກໍາມະບານສະພາແຫ່ງຊາດ ປະກອບມີ 10 ກໍາມະບານຮາກຖານ, ມີຄະນະບໍລິຫານງານ 11 ສະຫາຍ ຍິງ 4 ສະຫາຍ, ມີສະມາຊິກກໍາມະບານທັງໝົດ 394 ສະຫາຍ ຍິງ 158 ສະຫາຍ.
(ພາບ ແລະ ຂ່າວ: ນາງ ສຸມົນທາ ງາໄຊ)