(ສພຊ) ໃນຕອນບ່າຍຂອງວັນທີ 16 ພຶດສະພາ 2022 ນີ້, ສອງຝ່າຍສືບຕໍ່ຈັດກອງປະຊຸມສໍາມະນາ ໃນຫົວຂໍ້: ກົນໄກ, ນະໂຍບາຍ ເພື່ອຟື້ນຟູ ແລະ ພັດທະນາເສດຖະກິດ-ສັງຄົມ ພາຍຫລັງການແຜ່ລະບາດຂອງພະຍາດ ໂຄວິດ-19 ຢູ່ ສປປລາວ ແລະ ສສ.ຫວຽດນາມ ເຊິ່ງເປັນໂອກາດອັນດີ ໃນການແລກປ່ຽນບົດຮຽນ, ປະສົບການ, ຄໍາຄິດຄໍາເຫັນ ກ່ຽວກັບການຈັດຕັ້ງປະຕິບັດພາລະບົດບາດ ຂອງອົງການຈັດຕັ້ງ ພັກ, ລັດ ກໍຄືສະພາແຫ່ງຊາດ ເພື່ອຟື້ນຟູ ແລະ ພັດທະນາເສດຖະກິດ-ສັງຄົມ ພາຍຫລັງທີ່ໄດ້ຮັບຜົນກະທົບຈາກ ການແຜ່ລະບາດ ຂອງພະຍາດ ໂຄວິດ-19.
ໂອກາດດຽວກັນ, ບັນດາກໍາມາທິການພາຍໃນສະພາແຫ່ງຊາດ, ສະພາປະຊາຊົນຂັ້ນແຂວງ, ບັນດາກະຊວງ ແລະ ອົງການຈໍານວນໜຶ່ງ ກໍສືບຕໍ່ພົບປະເຮັດວຽກຮ່ວມກັນ ເພື່ອຮ່ວມກັນຕີລາຄາຄືນການພົວພັນ ຮ່ວມມືໃນໄລຍະຜ່ານມາ ແລະ ກໍານົດທິດທາງໃນຕໍ່ໜ້າ ພ້ອມທັງແລກປ່ຽນບົດຮຽນ ໃນການປະຕິບັດພາລະບົດບາດ ແລະ ໜ້າທີ່ຂອງຕົນ ເປັນຕົ້ນແມ່ນ ສອງປະທານກໍາມາທິການການຕ່າງປະເທດ, ສອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ, ກໍາມາທິການບັນດາເຜົ່າຂອງສະພາແຫ່ງຊາດລາວ ແລະ ປະທານສະພາຊົນຊາດ ຂອງສະພາແຫ່ງຊາດຫວຽດນາມ, ຄະນະເລຂາທິການສະພາແຫ່ງຊາດລາວ ແລະ ຫົວໜ້າຫ້ອງວ່າການສະພາແຫ່ງຊາດຫວຽດນາມ, ສະພາປະຊາຊົນນະຄອນຫລວງວຽງຈັນ ແລະ ສະພາປະຊາຊົນນະຄອນຫລວງຮ່າໂນ້ຍ, ສະພາປະຊາຊົນແຂວງຫົວພັນ ແລະ ສະພາປະຊາຊົນແຂວງເຊິນລາ, ສະພາປະຊາຊົນແຂວງສະຫວັນນະເຂດ ແລະ ສະພາປະຊາຊົນແຂວງກວາງຈິ, ສູນກາງແນວລາວສ້າງຊາດ ແລະ ສູນກາງແນວໂຮມແຫ່ງຊາດຫວຽດນາມ.
ໃນໂອກາດເດີນທາງຢ້ຽມຢາມຄັ້ງນີ້, ຄະນະຜູ້ແທນຂັ້ນສູງຂອງສະພາແຫ່ງຊາດຫວຽດນາມ ຍັງໄດ້ ເຄື່ອນໄຫວຢ້ຽມຢາມພື້ນຖານທາງດ້ານເສດຖະກິດ-ສັງຄົມ ຢູ່ນະຄອນຫລວງວຽງຈັນ ແລະ ແຂວງຈໍາປາສັກ ອີກດ້ວຍ.