(ສພຊ) ພິທີລົງນາມຂໍ້ຕົກລົງຮ່ວມມື ວ່າດ້ວຍການປະສານງານ ລະຫວ່າງກຳມາທິການວັດທະນະທຳ-ສັງຄົມ ກັບກະຊວງສາທາລະນະສຸກ ໄດ້ຈັດຂຶ້ນໃນວັນທີ 29 ພະຈິກ 2023 ທີ່ສະພາແຫ່ງຊາດ ໂດຍການເຂົ້າຮ່ວມເປັນສັກຂີພິຍານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຜູ້ຊີ້ນຳວຽກງານກຳມາທິການວັດທະນະທຳ-ສັງຄົມ, ມີບັນດາທ່ານປະທານກຳມາທິການ, ຄະນະນຳຂອງກະຊວງສາທາລະນະສຸກ, ບັນດາທ່ານຮອງປະທານກຳມາທິການ, ຄະນະກົມ ພ້ອມດ້ວຍພະນັກງານວິຊາການທີ່ກ່ຽວຂ້ອງ.

ຕາງໜ້າລົງນາມຂໍ້ຕົກລົງໃນຄັ້ງນີ້ ຝ່າຍກຳມາທິການວັດທະນະທຳ-ສັງຄົມ ສະພາແຫ່ງຊາດ ໂດຍແມ່ນທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ, ຝ່າຍກະຊວງສາທາລະນະສຸກ ໂດຍແມ່ນທ່ານ ປອ. ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ.

ຈຸດປະສົງຂອງ ຂໍ້ຕົກລົງຮ່ວມສະບັບນີ້ ແມ່ນເພື່ອກຳນົດຫຼັກການ, ລະບຽບການ, ເນື້ອໃນ, ຮູບແບບ, ວິທີການ, ຂັ້ນຕອນ ປະສານງານ ລະຫວ່າງ ກຳມາທິການວັດທະນະທຳ-ສັງຄົມ ສະພາແຫ່ງຊາດ ກັບ ກະຊວງສາທາລະນະສຸກ ໃນການເປັນໃຈກາງປະສານງານ ເພື່ອອໍານວຍຄວາມສະດວກ ໃຫ້ແກ່ການເຄື່ອນໄຫວວຽກງານ ຂອງສະພາແຫ່ງຊາດ ແລະ ລັດຖະບານ ຕາມພາລະບົດບາດ, ໜ້າທີ່ ແລະ ຂອບເຂດສິດຂອງຕົນ ແນໃສ່ຮັບປະກັນການເປັນເສນາທິການທີ່ດີໃຫ້ແກ່ຄະນະປະຈໍາສະພາແຫ່ງຊາດ ແລະ ຄະນະລັດຖະບານ ໃນການປະຕິບັດໜ້າທີ່ໃຫ້ມີປະສິດທິພາບ, ວ່ອງໄວ, ຮັດກຸມ ແລະ ທັນເວລາ.