ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນລະຫວ່າງວັນທີ 30 ສິງຫາ-2 ກັນຍາ 2022, ຄະນະວິຊາການກົມວຽກງານຊົນເຜົ່າ ຂອງກໍາມາທິການບັນດາເຜົ່າ ສະພາແຫ່ງຊາດ ນໍາໂດຍທ່ານ ສິງ ເລືອງວິຫານ ຫົວໜ້າກົມວຽກງານຊົນເຜົ່າ ພ້ອມດ້ວຍຄະນະວິຊາການຈາກກົມວຽກງານຊົນເຜົ່າ ແລະ ກົມວຽກງານສາສະໜາ ໄດ້ລົງເກັບກຳຂໍ້ມູນເຊີງປຽບທຽບການຍົກຍ້າຍ, ເວນຄືນ ແລະ ຊົດເຊີຍປະຊາຊົນ 16 ບ້ານ ທີ່ໄດ້ຮັບຜົນກະທົບຈາກໂຄງການສ້າງເຂື່ອນໄຟຟ້ານໍ້າງື່ມ II ຢູ່ບ້ານຈັດສັນໂພນສະຫວາດ, ເກັບກໍາຂໍ້ມູນຊົນເຜົ່າ ແລະ ສາສະໜາຢູ່ບ້ານຜາສັງ, ບ້ານປາກຮາງ ແລະ ວັດສິນໄຊຍະຣາມ.
ການເຄື່ອນໄຫວຄັ້ງນີ້ ຍັງມີທ່ານ ນາງ ຈັນທະຄອນ ສີອຳພອນ ປະທານຄະນະກຳມະການວັດທະນະທຳສັງຄົມ ແລະ ບັນດາເຜົ່າ ສະພາປະຊາຊົນແຂວງວຽງຈັນ, ທ່ານ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງເຟືອງ ພ້ອມດ້ວຍຄະນະ; ຜ່ານການເຄື່ອນໄຫວເກັບກໍາຂໍ້ມູນ ເຫັນວ່າເປັນປະໂຫຍດ ແລະ ໄດ້ຕາມລະດັບຄາດໝາຍ ເປັນຕົ້ນ: ປະຊາຊົນ 16 ບ້ານທີ່ມາເຕົ້າໂຮມເປັນບ້ານຈັດສັນ ໄດ້ເຂົ້າເຖິງການບໍລິການພື້ນຖານຂອງລັດ, ໄດ້ເຂົ້າເຖິງຕະຫລາດ ແລະ ການພັດທະນາ ເຮັດໃຫ້ຊີວິດການເປັນຢູ່ຂອງປະຊາຊົນ ໂດຍພື້ນຖານແມ່ນດີກວ່າເວລາທີ່ຍັງຢູ່ບ້ານເດີມ, ບັນຫາລະຫວ່າງເຜົ່າ ແລະ ສາສະໜາ ມີຄວາມສະຫງົບດີ ເປັນຕົ້ນ ແມ່ນ ປະຊາຊົນ 3 ຊົນເຜົ່າ ທີ່ເຊື່ອຖືສາສະໜາເຢຊູຄຣິດ, ຜູ້ເຊື່ອຖືສາສະໜາພຸດ ແລະ ຜູ້ເຊື່ອຖືບັນພະບູລຸດຢູ່ບ້ານຜາສັງແມ່ນຢູ່ພາຍໃຕ້ການຊີ້ນໍາ-ນໍາພາຂອງຄະນະພັກ ອໍານາດການປົກຄອງບ້ານ ແລະ ເຖົ້າແກ່ແນວໂຮມ ເຮັດໃຫ້ທັງ 3 ຊົນເຜົ່າ ແລະ 3 ຄວາມເຊື່ອຢູ່ບ້ານດັ່ງກ່າວ ມີຄວາມສະຫງົບ, ຖືກຕ້ອງປອງດອງ ແລະ ພ້ອມກັນພັດທະນາ.
ໂອກາດດັ່ງກ່າວ ຄະນະ ຍັງໄດ້ນໍາເອົາການຢື້ຢາມຖາມຂ່າວຂອງຄະນະນຳກຳມາທິການບັນດາເຜົ່າ ກໍຄືຂອງສະພາແຫ່ງຊາດ ຝາກເຖິງການຈັດຕັ້ງຕ່າງໆຂອງເມືອງ, ຄະນະນຳຂອງບ້ານ ເຖົ້າແກ່ແນວໂຮມ ທີ່ເສຍສະຫຼະຄວາມສຸກສ່ວນຕົວ ປະກອບສ່ວນເຫື່ອແຮງໃນການປະຕິບັດວຽກງານ ເຮັດໃຫ້ປະຊາຊົນມີຊີວິດທີ່ດີຂຶ້ນເທື່ອລະກ້າວຢ່າງໜັກແໜ້ນຕາມແນວທາງນະໂຍບາຍທີ່ພັກ-ລັດວາງອອກ ໃຫ້ນັບມື້ ນັບດີຂຶ້ນເທື່ອລະກ້າວ.