(ສພຊ) ໃນຕອນບ່າຍວັນທີ 6 ມີນາ 2023 ທີ່ສະພາແຫ່ງຊາດ, ກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປລາວ ໄດ້ຈັດກອງປະຊຸມສຳມະນາແລກປ່ຽນບົດຮຽນ ລະຫວ່າງກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປ ລາວ ກັບ ສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ໂດຍການເຂົ້າຮ່ວມຂອງສະຫາຍ ພົນໂທ ສຸວອນ ເລືອງບຸນມີ ກໍາມະການສູນກາງພັກປະຊາຊົນປະຕິວັດລາວ, ຮອງປະທານສະພາແຫ່ງຊາດ ແຫ່ງ ສປປລາວ, ສະຫາຍ ອີ ແທັງ ຮ່າ ນຽກ ເກີດຳ ກໍາມະການສູນກາງພັກກອມມູນິດຫວຽດນາມ, ປະທານສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍຄະນະ ຝ່າຍຫວຽດນາມ ແລະ ສະຫາຍ ຄຳຈັນ ໂສຕາປະເສີດ ປະທານກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປລາວ, ມີບັນດາສະຫາຍ ປະທານ-ຮອງປະທານກໍາມາທິການ, ຄະນະກົມ, ຄະນະພະແນກ, ແຂກຖືກເຊີນພາກສ່ວນທີ່ກ່ຽວຂ້ອງ ແລະ ພະນັກງານວິຊາການ ພາຍໃນ ສະພາແຫ່ງຊາດເຂົ້າຮ່ວມຢ່າງພ້ອມພຽງ.

ສະຫາຍ ຄຳຈັນ ໂສຕາປະເສີດ ໄດ້ກ່າວເປີດກອງປະຊຸມສຳມະນາໃນຄັ້ງນີ້ວ່າ: ຕາງໜ້າຄະນະປະຈຳ ສະພາແຫ່ງຊາດລາວ ຂໍສະແດງຄວາມຍິນດີຕ້ອນຮັບ ສະຫາຍ ອີ ແທັງ ຮ່າ ນຽກ ເກີດຳ ພ້ອມດ້ວຍຄະນະ ດ້ວຍຄວາມອົບອຸ່ນ ບົນຈິດໃຈແຫ່ງຄວາມສາມັກຄີມິດຕະພາບ, ຕີລາຄາສູງ ຕໍ່ການມາຢ້ຽມຢາມ ສປປລາວ ແລະ ເປັນເຈົ້າພາບກອງປະຊຸມສຳມະນາຮ່ວມແລກປ່ຽນບົດຮຽນ ລະຫວ່າງ ກຳມາທິການບັນດາເຜົ່າ ສະພາແຫ່ງຊາດລາວ ກັບ ສະພາຊົນຊາດ ສະພາແຫ່ງຊາດ ສສ.ຫວຽດນາມ ເພື່ອສືບຕໍ່ແລກປ່ຽນບົດຮຽນທາງດ້ານວິຊາການ ໃນ 4 ຫົວຂໍ້ຄື: ຝ່າຍຫວຽດນາມ 3 ຫົວຂໍ້ ຄື: 1) ບົດຮຽນໃນການຕິດຕາມກວດກາການຜັນຂະຫຍາຍນະໂຍບາຍຊົນເຜົ່າ ເປັນກົດໝາຍ; 2) ການຈັດຕັ້ງປະຕິບັດນະໂຍບາຍຊົນເຜົ່າຕໍ່ກັບຊົນເຜົ່າສ່ວນໜ້ອຍ; 3) ປະສົບການໃນການກວດກາການປະຕິບັດນະໂຍບາຍ ແລະ ຝ່າຍລາວ ມີ 1 ຫົວຂໍ້ ຄື: 4) ບົດຮຽນໃນການຕິດຕາມ ກວດກາ ວຽກງານພັດທະນາຊົນນະບົດ, ແກ້ໄຂຄວາມທຸກຍາກ ແລະ ຜົນກະທົບຈາກໂຄງການພັດທະນາ.

ໂອກາດດັ່ງກ່າວ ສະຫາຍ ພົນໂທ ສຸວອນ ເລືອງບຸນມີ ໄດ້ມີຄຳເຫັນຕໍ່ກອງປະຊຸມວ່າ: ການລົງເລິກແລກປ່ຽນບົດຮຽນການຈັດຕັ້ງປະຕິບັດຕາມພາລະບົດບາດ ຂອງກຳມາທິການບັນດາເຜົ່າ ສະພາແຫ່ງຊາດລາວ ແລະ ສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ໃນການພິຈາລະນາ ແລະ ຮັບຮອງກົດໝາຍ, ການຕິດຕາມກວດກາ ໃນຂົງເຂດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ແລະ ບັນຫາອື່ນໆ ລ້ວນແຕ່ເປັນເນື້ອໃນທີ່ມີຄວາມສຳຄັນຫຼາຍ ເຊິ່ງພວກສະຫາຍສາມາດນຳເອົາບົດຮຽນຂອງກັນ ແລະ ກັນໄປໝູນໃຊ້ເຂົ້າໃນວຽກງານຂອງຕົນ; ໃນການສືບຕໍ່ພົວພັນຮ່ວມມື ແລະ ແລກປ່ຽນຄະນະຜູ້ແທນນຳກັນໃນຕໍ່ໜ້ານັ້ນ ສະເໜີໃຫ້ຄະນະຜູ້ແທນລົງໄປສຳຜັດຮາກຖານທ້ອງຖິ່ນເບິ່ງຜົນສຳເລັດ ຂອງວຽກງານພັດທະນາຊົນນະບົດ ການແກ້ໄຂຄວາມທຸກຍາກໃຫ້ພີ່ນ້ອງປະຊາຊົນບັນດາເຜົ່າຕື່ມ ໂດຍສະເພາະ ສະຫາຍຫວຽດນາມ ທີ່ມີຜົນສຳເລັດອັນໃຫຍ່ຫຼວງໃນວຽກງານການພັດທະນາຊົນນະບົດ ແລະ ແກ້ໄຂຄວາມທຸກຍາກແບບຍືນຍົງຢູ່ເຂດຊົນນະບົດພູດອຍ ເຊິ່ງຈະເປັນບົດຮຽນອັນສຳຄັນ ແລະ ຈຳເປັນຢ່າງຍິ່ງສຳລັບ ຄະນະກຳມາທິການບັນດາເຜົ່າ ຂອງສະພາແຫ່ງຊາດລາວ.

(ພາບ ແລະ ຂ່າວ: ອານຸສອນ ພູມມີທອນ)