(ສພຊ) ໃນລະຫວ່າງວັນທີ 10-16 ກັນຍາ 2023 ຄະນະນໍາກໍາມາທິການບັນດາເຜົ່າ ນໍາໂດຍທ່ານ ນາງ ທັດສະດາພອນ ຈັນທະມາດ ຮອງປະທານກຳມາທິການບັນດາເຜົ່າ ສະພາແຫ່ງຊາດ ພ້ອມດ້ວຍຄະນະວິຊາການຈາກກົມວຽກງານຊົນເຜົ່າ ແລະ ກົມວຽກງານສາສະໜາ ໄດ້ລົງຕິດຕາມ ກວດກາ ແລະ ເກັບກຳຂໍ້ມູນ ກ່ຽວກັບການຈັດຕັ້ງປະຕິບັດບັນດາຄາດໝາຍພັດທະນາຊົນນະບົດ ແລະ ແກ້ໄຂຄວາມທຸກຍາກ, ວຽກງານຊົນເຜົ່າ, ວຽກງານສາສະໜາ, ການປົກຄອງທ້ອງຖິ່ນ, ວຽກງານ 3 ສ້າງ, ໂຄງການລົງທຶນຂອງລັດ, ການພັດທະນາທີ່ມີຜົນກະທົບຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ຢູ່ 2 ເມືອງຄື: ເມືອງນອງ ແລະ ເມືອງອາດສະພັງທອງ. ການເຄື່ອນໄຫວຄັ້ງນີ້ ມີທ່ານ ຄຳປານ ເຄນວົງສັກ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ທັງເປັນຮອງປະທານຄະນະກຳມະການວັດທະນະທຳສັງຄົມ ແລະ ບັນດາເຜົ່າ ສະພາປະຊາຊົນແຂວງສະຫວັນນະເຂດ, ສະມາຊິກສະພາປະຊາຊົນແຂວງ ປະຈຳເມືອງນອງ ແລະ ເມືອງອາດສະພັງທອງ ພ້ອມດ້ວຍຄະນະ ເຂົ້າຮ່ວມລົງເຄື່ອນໄຫວຕິດຕາມ ກວດກາ ແລະ ເກັບກໍາຂໍ້ມູນໃນຄັ້ງນີ້ໄດ້ເຄື່ອນໄຫວລົງຈຸດສຸມຕັງອາໄລເກົ່າ ເມືອງນອງ ແລະ ຈຸດສຸມດົງນາຂາມ ເມືອງອາດສະພັງທອງ ຜ່ານການເຄື່ອນໄຫວ ແມ່ນໄດ້ຮັບໝາກຜົນຕາມລະດັບຄາດໝາຍທີ່ວາງໄວ້ ເປັນຕົ້ນ: ປະຊາຊົນທີ່ຢູ່ໃນບ້ານຈຸດສຸມຂອງລັດຖະບານ ແລະ ຂອງແຂວງ ໄດ້ເຂົ້າເຖິງການບໍລິການພື້ນຖານຂອງລັດ, ໄດ້ເຂົ້າເຖິງຕະຫຼາດ ແລະ ການພັດທະນາ ເຮັດໃຫ້ຊີວິດການເປັນຢູ່ຂອງປະຊາຊົນ ດີຂຶ້ນເທື່ອລະກ້າວ, ປະຊາຊົນລາວມີການເຊື່ອຖືສາສະໜາ ຕາມລັດຖະທຳມະນູນ, ກົດໝາຍ ແລະ ດຳລັດ 315/ລບ ໂດຍການຊີ້ນໍາ-ນໍາພາຂອງຄະນະພັກ ອໍານາດການປົກຄອງບ້ານ ແລະ ເຖົ້າແກ່ແນວໂຮມ ເຮັດໃຫ້ຈຸດສຸມດັ່ງກ່າວ ມີຄວາມສະຫງົບ, ຖືກຕ້ອງປອງດອງ ແລະ ພ້ອມກັນພັດທະນາ.

ພິເສດ ທ່ານ ຮອງປະທານກຳມາທິການບັນດາເຜົ່າ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ ຕໍ່ຄະນະນຳຂັ້ນເມືອງ, ຂັ້ນບ້ານ ແລະ ຄະນະນໍາຈຸດສຸມ, ອົງການຈັດຕັ້ງມະຫາຊົນ, ປະຊາຊົນລາວບັນດາເຜົ່າ ແລະ ຍ້ອງຍໍຊົມເຊີຍການປະກອບສ່ວນເຫື່ອແຮງໃນການປະຕິບັດໜ້າທີ່ວຽກງານລວມຂອງເມືອງ, ບ້ານ ຕາມແນວທາງນະໂຍບາຍທີ່ພັກ-ລັດວາງອອກ ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່ານັບມື້ ນັບດີຂຶ້ນເທື່ອລະກ້າວ.