(ສພຊ) ເພື່ອເປັນການສະຫຼຸບຕີລາຄາ ແລະ ທົບທວນການຈັດຕັ້ງປະຕິບັດວຽກງານການແກ້ໄຂຄໍາຮ້ອງທຸກໃນໄລຍະຜ່ານມາ, ຕິດຕາມກວດກາ ແລະ ຊຸກຍູ້ອົງການທີ່ຮັບຜິດຊອບໃນການແກ້ໄຂຄໍາຮ້ອງທຸກ ແລະ ພາກສ່ວນກ່ຽວຂ້ອງ ໃນການຈັດຕັ້ງປະຕິບັດວຽກງານການແກ້ໄຂຄໍາຮ້ອງທຸກ ທັງເປັນການປະກອບຄຳຄິດຄໍາເຫັນ ແລະ ຖອດຖອນບົດຮຽນ ເພື່ອປັບປຸງການຈັດຕັ້ງປະຕິບັດວຽກງານການແກ້ໄຂຄໍາຮ້ອງທຸກ; ໃນລະຫວ່າງວັນທີ 13-14 ທັນວາ 2023 ກໍາມາທິການຍຸຕິທໍາສະພາແຫ່ງຊາດ ໄດ້ຈັດກອງປະຊຸມຍົກສູງຄຸນນະພາບໃນການແກ້ໄຂຄໍາຮ້ອງທຸກ ຢູ່ໂຮງແຮມເມືອງແທັງ, ນະຄອນຫຼວງວຽງຈັນ ໂດຍການເປັນປະທານກ່າວເປີດຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍ; ມີທ່ານ ຄໍາແພງ ວິລະພັນ ປະທານກໍາມາທິການຍຸຕິທໍາ, ບັນດາທ່ານຮອງປະທານກຳມາທິການ, ປະທານ-ຮອງປະທານຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ ແລະ ຕາງໜ້າ ສສຊ ຈາກ 18 ເຂດເລືອກຕັ້ງທົ່ວປະເທດ, ຮອງປະທານສານປະຊາຊົນສູງສຸດ, ຮອງຫົວໜ້າອົງການໄອຍະການປະຊາຊົນສູງສຸດ, ຮອງລັດຖະມົນຕີກະຊວງປ້ອງກັນຄວາມສະຫງົບ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຄະນະກົມ, ຄະນະພະແນກ ພ້ອມດ້ວຍພະ ນັກງານວິຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງການສະເໜີບົດລາຍງານກ່ຽວກັບການຈັດຕັ້ງປະຕິບັດວຽກງານການແກ້ໄຂຄໍາສະເໜີຂອງລັດຖະບານໃນໄລຍະຜ່ານມາ ແລະ ທິດທາງໃນຕໍ່ໜ້າ, ບົດລາຍງານກ່ຽວກັບການຈັດຕັ້ງປະຕິບັດວຽກງານການແກ້ໄຂຄໍາຮ້ອງຟ້ອງຂອງອົງການສືບສວນ-ສອບສວນ ໃນໄລຍະຜ່ານມາ ແລະ ທິດທາງໃນຕໍ່ໜ້າ, ບົດລາຍງານກ່ຽວກັບການຈັດຕັ້ງປະຕິບັດວຽກງານການແກ້ໄຂຄໍາຮ້ອງຟ້ອງຂອງອົງການໄອຍະການປະຊາຊົນສູງສຸດ ໃນໄລຍະຜ່ານມາ ແລະ ທິດທາງໃນຕໍ່ໜ້າ, ບົດລາຍງານການແກ້ໄຂຄໍາສະເໜີ ແລະ ຄໍາຮ້ອງຂໍຄວາມເປັນທໍາທີ່ພົວພັນກັບການປະຕິບັດຄໍາຕັດສິນຂອງສານໃນໄລຍະຜ່ານມາ ແລະທິດທາງໃນຕໍ່ໜ້າ, ບົດລາຍງານກ່ຽວກັບການແກ້ໄຂຄໍາສະເໜີຂອງອົງການກວດກາແຫ່ງລັດ ໃນໄລຍະຜ່ານມາ ແລະ ທິດທາງໃນຕໍ່ໜ້າ ແລະ ບົດລາຍງານກ່ຽວກັບການແກ້ໄຂຄໍາສະເໜີຂອງສູນກາງແນວລາວສ້າງຊາດ (ຕາງໜ້າອົງການຈັດຕັ້ງມະຫາຊົນ) ໃນໄລຍະຜ່ານມາ ແລະ ທິດທາງໃນຕໍ່ໜ້າ; ຈາກນັ້ນ, ຜູ້ແທນກອງປະຊຸມ ໄດ້ຜັດປ່ຽນກັນຂຶ້ນປະກອບຄໍາຄິດຄໍາເຫັນໃສ່ບົດລາຍງານຕ່າງໆ ເພື່ອແລກປ່ຽນບົດຮຽນ ເຊິ່ງກັນ ແລະກັນ ຕາມຄໍາເຈາະຈີ້ມຂອງປະທານກອງປະຊຸມ ພ້ອມທັງຮັບຟັງຄໍາຊີ້ແຈງຈາກບັນດາທ່ານຜູ້ຕາງໜ້າຈາກກໍາມາທິການຍຸຕິທໍາ, ກະຊວງ ແລະ ອົງການຕ່າງໆ ທີ່ໄດ້ຂຶ້ນສະເໜີບົດລາຍງານດັ່ງກ່າວ.

ໃນໂອກາດນີ້, ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດຂອງກອງປະຊຸມໃນຄັ້ງນີ້ ພ້ອມທັງຕີລາຄາສູງຕໍ່ການດໍາເນີນກອງປະຊຸມ ເຖິງວ່າເປັນຄັ້ງທໍາອິດ ແຕ່ກໍສາມາດຄົ້ນຄວ້າ ແລະ ປຶກສາຫາລືກັນຫຼາຍບັນຫາທີ່ສໍາຄັນ ແລະ ຈໍາເປັນ ແນໃສ່ແກ້ໄຂສິ່ງອຸດຕັນ ແລະສິ່ງທ້າທາຍຢູ່ໃນແຕ່ລະອົງການ, ກະຊວງຂອງຕົນ; ສະນັ້ນ, ຕໍ່ກັບບັນດາຂໍ້ສະເໜີ ແລະທິດທາງ ທີ່ແຕ່ລະອົງການໄດ້ສະເໜີມາ ລ້ວນແລ້ວແຕ່ແມ່ນຄວາມຮັບຜິດຊອບລວມຂອງອົງການລັດ ເຊິ່ງຈະຕ້ອງໄດ້ພ້ອມກັນຮີບຮ້ອນປັບປຸງ, ແກ້ໄຂໃຫ້ທັນການ, ເດັດຂາດ ແລະ ເຂັ້ມງວດຕາມກົດໝາຍ; ຮຽກຮ້ອງມາຍັງບັນດາທ່ານການນໍາທຸກພາກສ່ວນ ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກພັກ, ພະນັກງານ ໂດຍສະເພາະພະນັກງານ-ລັດຖະກອນ ຜູ້ຮັບຜິດຊອບຄົ້ນຄວ້າວຽກງານຄໍາຮ້ອງທຸກໂດຍກົງ ເພື່ອເສີມຂະຫຍາຍດ້ານດີຜົນງານທີ່ຍາດມາໄດ້ໃນໄລຍະຜ່ານມາ ແລະເພີ່ມທະວີບົດບາດເປັນໃຈກາງໃນການຮັກສາຄວາມຍຸຕິທໍາ, ຕັດສິນໃຈຜ່ານຜ່າບັນຫາຫຍຸ້ງຍາກ, ສິ່ງທ້າທາຍຕ່າງໆ ແລະ ເປັນເຈົ້າການຄົ້ນຄວ້າ, ປັບປຸງແກ້ໄຂຂອດຂັ້ນທີ່ເປັນສິ່ງອຸດຕັນ ເພື່ອຮັບປະກັນໃຫ້ການປະຕິບັດພາລະບົດບາດຂອງແຕ່ລະພາກສ່ວນ ມີປະສິດທິພາບ ແລະ ໄດ້ຮັບປະສິດທິຜົນສູງຂຶ້ນກວ່າເກົ່າ.

(ພາບ ແລະ ຂ່າວ: ສອນສັກ ວັນວິໄຊ)