ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

            (ສພຊ) ວັນທີ 31 ມັງກອນ 2022 ທີ່ສະພາແຫ່ງຊາດ, ກອງປະຊຸມຄົບຄະນະຂອງກຳມາທິການການຕ່າງປະເທດ (ກຕທ) ປະຈຳປີ 2021 ໄດ້ໄຂຂຶ້ນຢ່າງເປັນທາງການໃນຮູບແບບທາງໄກ ພາຍໃຕ້ການເປັນປະທານຂອງ ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ສະພາແຫ່ງຊາດ ໂດຍການເຂົ້າຮ່ວມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຜູ້ຊີ້ນຳວຽກງານການຕ່າງປະເທດ; ມີບັນດາທ່ານຮອງປະທານກຳມາທິການການຕ່າງປະເທດ, ບັນດາທ່ານຕາງໜ້າກຳມາທິການ ແລະ ຄະນະເລຂາທິການສະພາແຫ່ງຊາດ, ກະຊວງ, ຄະນະກຳມາທິການຮ່ວມມື, ສະພາປະຊາຊົນຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
              ກອງປະຊຸມໄດ້ຮັບຟັງການລາຍງານ ແລະ ສຸມໃສ່ຄົ້ນຄວ້າປະກອບຄຳຄິດຄຳເຫັນຕໍ່ບົດສະຫຼຸບການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດ ໃນໄລຍະ 1 ປີຜ່ານມາ (2021) ແລະ ທິດທາງແຜນການ ປະຈຳປີ 2022; ບົດລາຍງານກ່ຽວກັບການສະພາບການພົ້ນເດັ່ນຂອງໂລກ, ສະພາບການຄຸ້ມຄອງວຽກງານຊາຍແດນ, ບົດລາຍງານຂອງກະຊວງໂຍທາທິການ; ການຄຸ້ມຄອງການຊ່ວຍເຫຼືອລ້າ ເພື່ອການພັດທະນາ; ການເຄື່ອນໄຫວວຽກງານປະຈໍາປີ 2021 ແລະ ແຜນການປະຈໍາປີ 2022 ຂອງຄະນະກໍາມາທິການຮ່ວມມືລາວ-ຫວຽດນາມ ແລະ ຄະນະກໍາມາທິການຮ່ວມມືລາວ-ຈີນ.
ໃນໂອກາດນີ້, ທ່ານ ປອ. ນາງ ສູນທອນ ໄຊຍະຈັກ ໄດ້ຮັບຟັງຄຳເຫັນໂອ້ລົມ ແລະ ໃຫ້ທິດຊີ້ນຳ ເຊິ່ງທ່ານໄດ້ ຕີລາຄາສູງຕໍ່ຜົນສຳເລັດຂອງການເຄື່ອນໄຫວວຽກງານຂອງ ກຕທ, ຍົກໃຫ້ເຫັນບາງຂໍ້ຄົງຄ້າງທີ່ຄວນເອົາໃຈໃສ່ໃນການປັບປຸງ ແລະ ແກ້ໄຂໃນຕໍ່ໜ້າ, ທ່ານໄດ້ເນັ້ນໜັກໃຫ້ເອົາໃຈໃສ່ສຶກສາອົບຮົມການເມືອງແນວຄິດ, ຄຸນສົມບັນສິນທຳປະຕິວັດ, ເພີ່ມທະວີການປະຕິບັດພາລະບົດບາດຂອງອົງການນິຕິບັນຍັດ, ຍົກສູງຄວາມຮັບຜິດຊອບທາງດ້ານໜ້າທີ່ການເມືອງ ໃຫ້ແກ່ຄະນະນຳກຳມະການກຳມາທິການການຕ່າງປະເທດ ແລະ ຍົກສູງຄວາມຮູ້ຄວາມສາມາດດ້ານວິຊາສະເພາະ ແລະ ພາສາຕ່າງປະເທດ ໃຫ້ພະນັກງານວິຊາການຂອງກົມທີ່ເປັນເສນາທິການຂອງ ກຕທ ໃຫ້ມີປະສິດທິພາບກວ່າເກົ່າ.