ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນເຊົ້າຂອງວັນທີ 12 ຕຸລາ 2022 ນີ້  ຢູ່ທີ່ຫ້ອງປະຊຸມ ສະພາປະຊາຊົນ ແຂວງ  (ສພຂ) ສາລະວັນ ໄດ້ຈັດພິທີສະຫຼຸບ ຂະບວນການແຂ່ງຂັນ 5 ເປັນເຈົ້າຂອງກຳມະບານຮາກຖານ ສພຂ ສາລະວັນ ປະຈໍາປີ 2022 ໂດຍການເຂົ້າຮ່ວມເປັນປະທານຂອງທ່ານ ພັທ ນາງ ທອງເຫຼືອງ ໂຄດປັນຍາ ປະທານກຳມະບານຮາກຖານ ສພຂ ຮອງປະທານຄະນະກຳມະການຍຸຕິທຳ ແລະ ປກຊ-ປກສ, ທ່ານ ບຸນທະວີ ພິມມະສານ ປະທານຄະນະບໍລິຫານງານສະຫະພັນກຳມະບານແຂວງ, ທ່ານ ສົມພອນ ແສງສຸລິຈັນ ຮອງເລຂາຄະນະພັກຮາກຖານ ສພຂ ຄະນະບໍລິຫານງານກຳມະບານແຂວງ ເລຂາທິການ ສພຂ, ມີບັນດາຄະນະພັກ, ຄະນະກໍາມະບານຮາກຖານ ພ້ອມດ້ວຍສະມາຊິກກຳມະບານ ແລະ ແຂກທີ່ຖືກເຊີນ ເຂົ້າຮ່ວມ.

ໃນພິທີ ທ່ານ ນາງ ອິນທະນົງສອນ ຈັນທະລືໄຊ ໄດ້ຂຶ້ນຜ່ານ ບົດສະຫຼຸບຕີລາຄາຄືນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງກຳມະບານຮາກຖານ ສພຂ ປະຈຳປີ 2022 ແລະ ທິດທາງ ແຜນການ ປີ 2023 ເຊິ່ງປະຈຸບັນກຳມະບານຮາກຖານ ສພຂ ມີສະມາຊິກກຳມະບານທັງໝົດ 47 ສະຫາຍ, ຍິງ 26 ສະຫາຍ; ໄລຍະຜ່ານມາກຳມະບານຮາກຖານ ສພຂ ໄດ້ຖືເອົາວຽກງານໂຄສະນາສຶກສາອົບຮົມການເມືອງ-ແນວຄິດເປັນກົກ ດ້ວຍການເຜີຍແຜ່, ເຊື່ອມຊຶມບັນດາມະຕິ, ຄໍາສັ່ງ, ກົດລະບຽບຂອງພັກ, ກົດໝາຍຂອງລັດ, ໂດຍສະເພາະແມ່ນ ນິຕິກຳຕ່າງໆຂອງສູນກາງສະຫະພັນກຳມະບານວາງອອກແຕ່ລະໄລຍະໃຫ້ສະມາຊິກກຳມະບານ, ພະນັກງານ-ລັດຖະກອນພາຍໃນ ສພຂ ໄດ້ຮັບຮູ້ ແລະ ເຂົ້າໃຈ ເຊິ່ງພາລະບົດບາດ, ສິດ, ໜ້າທີ່ຂອງຕົນ ໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຕິດພັນກັບການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຕິດພັນກັບການປະຕິບັດວຽກງານວິຊາສະເພາະຢູ່ໃນກົມກອງຂອງຕົນ; ເຊິ່ງແຕ່ລະເນື້ອໃນຂໍ້ແຂ່ງຂັນ 5 ເປັນເຈົ້າ ເຫັນວ່າສາມາດປະຕິບັດໄດ້ 95% ຂຶ້ນໄປ ພ້ອມນັ້ນ, ຍັງໄດ້ຮັບຟັງກ່ຽວກັບແຜນການສູ້ຊົນຂະບວນການແຂ່ງຂັນ 5 ເປັນເຈົ້າ ໃນປີ 2023; ຈາກນັ້ນ, ກໍ່ໄດ້ມີພິທີມອບ-ຮັບ ໃບຢັ້ງຢືນກຳມະບານ 5 ເປັນເຈົ້າ ໃຫ້ສະມາຊິກກຳມະບານ ແລະ ຄະນະກຳມະຮາກຖານ ສພຂ ຕື່ມອີກ.

ໃນຕອນທ້າຍກອງປະຊຸມ ກໍໄດ້ຮັບຟັງການໂອ້ລົມ ຂອງທ່ານ ບຸນທະວີ ພິມມະສານ ເຊິ່ງທ່ານໄດ້ສະແດງຄວາມຍ້ອງຍໍ ແລະ ຊົມເຊີຍຕໍ່ຜົນງານທີ່ກຳມະບານຮາກຖານ ສພຂ ຍາດມາໄດ້ໃນໄລຍະຜ່ານມາ, ພ້ອມດຽວກັນທ່ານໄດ້ເນັ້ນໃຫ້ຄະນະກຳມະບານຮາກຖານ ສພຂ ສືບຕໍ່ໂຄສະນາສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານ, ພະນັກງານ-ລັດຖະກອນ ພາຍໃນຮາກຖານ, ສືບຕໍ່ຮັກສາມູນເຊື້ອ ພ້ອມທັງຍູ້ແຮງແຜນການຈັດຕັ້ງປະຕິບັດຂະບວນການແຂ່ງຂັນເນື້ອໃນ 5 ເປັນເຈົ້າ ປະຈໍາປີ 2023 ຂອງກຳມະບານຮາກຖານ ສພຂ ໃຫ້ບັນລຸຕາມຄາດໝາຍທີ່ວາງໄວ.

 

ພາບ-ຂ່າວ: ດີລຳພົນ ພົມມະຈັນ