ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

       (ສພຊ) ວັນທີ 30 ພຶດສະພາຜ່ານມາ, ທີ່ສະພາແຫ່ງຊາດ ກຳມະບານສະພາແຫ່ງຊາດ ໄດ້ມີກອງປະຊຸມສະຫລຸບຕີລາຄາການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2021 ແລະ ພິທີປາຖະກະຖາ ວັນກຳມະກອນສາກົນ ຄົບຮອບ 136 ປີ (1 ພຶດສະພາ 1886-1 ພຶດສະພາ 2022) ໂດຍການເປັນປະທານຂອງສະຫາຍ ອຳໄພ ຈິດມານົນ ຄະນະພັກສະພາແຫ່ງຊາດ, ປະທານຄະນະບໍລິຫານງານສະຫະພັນກຳມະບານ ສະພາແຫ່ງຊາດ ເຂົ້າຮ່ວມມີສະຫາຍ ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ຄະນະປະຈຳພັກສະພາແຫ່ງຊາດ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ; ມີສະຫາຍຜູ້ຕາງໜ້າສູນກາງສະຫະພັນກຳມະບານລາວ; ບັນດາສະຫາຍຮອງປະທານ, ຄະນະກຳມະບານຮາກຖານ ແລະ ສະມາຊິກກຳມະບານທົ່ວສະພາແຫ່ງຊາດເຂົ້າຮ່ວມ.

ໃນກອງປະຊຸມ, ໄດ້ຮັບຟັງການຜ່ານບົດສະຫລຸບການຈັດຕັ້ງປະຕິບັດຂະບວນການຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ ປະຈຳປີ 2021 ແລະ ວາງທິດທາງແຜນການປີ 2022, ຜ່ານຂໍ້ຕົກລົງມອບໃບຢັ້ງຢືນ 5 ເປັນເຈົ້າ ໃຫ້ແກ່ກຳມະບານຮາກຖານ ພາຍໃນສະພາແຫ່ງຊາດ; ພ້ອມນັ້ນ, ໄດ້ມີພິທີມອບໃບຢັ້ງຢືນ 5 ເປັນເຈົ້າ ໃຫ້ແກ່ກຳມະບານຮາກຖານ ພາຍໃນສະພາແຫ່ງຊາດ ແລະ ຕາງໜ້າບັນດາຮາກຖານທັງ 10 ຮາກຖານກໍໄດ້ຂຶ້ນຈັບມືແຂ່ງຂັນດັ່ງກ່າວ; ຈາກນັ້ນ, ສະຫາຍປະທານຄະນະບໍລິຫານງານສະຫະພັນກຳມະບານ ສະພາແຫ່ງຊາດ ໄດ້ມີຄຳເຫັນໂອ້ລົມ ແລະ ປາຖະກະຖາວັນກຳມະກອນສາກົນ.

ສະຫາຍ ປອ. ລິນຄຳ ດວງສະຫວັນ ໄດ້ມີຄຳເຫັນໂອ້ລົມວ່າ: ຜ່ານການຮັບຟັງບົດລາຍງານດັ່ງກ່າວ  ເຫັນວ່າແຕ່ລະຮາກຖານກຳມະບານ ມີຜົນງານພົ້ນເດັ່ນຫລາຍດ້ານ, ສິ່ງທີ່ຢັ້ງຢືນໄດ້ແມ່ນມີເຖິງ 8 ກຳມະບານຮາກຖານພາຍໃນສະພາແຫ່ງຊາດ ໄດ້ຖືກຮັບຮອງເປັນຮາກຖານກຳມະບານ 5 ເປັນເຈົ້າ ປະຈຳປີ 2021; ນອກຈາກນັ້ນ, ຍັງເຫັນວ່າສະມາຊິກກໍາມະບານ ຢູ່ແຕ່ລະຮາກຖານ ໄດ້ຕັ້ງໜ້າປະກອບສ່ວນ ແລະ ເຂົ້າຮ່ວມຢ່າງຫ້າວຫັນ ໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະ ໃນນາມເປັນເສນາທິການໃຫ້ແກ່ຄະນະພັກ, ຄະນະປະຈໍາສະພາແຫ່ງຊາດ ຕາມ 3 ພາລະບົດບາດຕົ້ນຕໍຄື: ດ້ານນິຕິບັນຍັດ, ດ້ານການຕົກລົງບັນຫາສຳຄັນພື້ນຖານຂອງປະເທດຊາດ ແລະ ດ້ານການຕິດຕາມກວດກາ ເຊິ່ງເຮັດໃຫ້ສະມາຊິກກຳມະບານຫລາຍສະຫາຍ ໄດ້ຮັບໃບຍ້ອງຍໍຄະນະປະຈຳສະພາແຫ່ງຊາດ ແລະ ໃບຍ້ອງຍໍຄະນະເລຂາທິການສະພາແຫ່ງຊາດ ໃນຊຸມປີຜ່ານມາ.

ພ້ອມນີ້, ສະຫາຍຍັງໄດ້ເນັ້ນຕື່ມວ່າ: ໃຫ້ສືບຕໍ່ຕັ້ງໜ້າສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານ ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ຮູ້ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຊົນຊັ້ນກຳມະກອນ ກໍຄືຊາວຜູ້ອອກແຮງງານ; ເພີ່ມທະວີຍົກສູງຄວາມຮັບຜິດຊອບໜ້າທີ່ການເມືອງ ຂອງສະມາຊິກກຳມະບານ ຕາມກົດໝາຍວ່າດ້ວຍກຳມະບານລາວ ກຳນົດໄວ້; ຕັ້ງໜ້າຊຸກຍູ້ ແລະ ສູ້ຊົນຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າ ໃຫ້ສະຫະພັນກຳມະບານສະພາແຫ່ງຊາດ ໄດ້ຮັບການຢັ້ງຢືນຈາກສູນກາງສະຫະພັນກຳມະບານລາວ ໃນປີ 2022 ໂດຍການເສີມຂະຫຍາຍດ້ານດີຜົນງານ ແລະ ແກ້ໄຂບາງຂໍ້ຄົງຄ້າງຕ່າງໆ ຢູ່ແຕ່ລະຮາກຖານກຳມະບານສະພາແຫ່ງຊາດ ໃຫ້ດີຂຶ້ນ, ການສ້າງຂະບວນການຕ້ອງໃຫ້ມີຄວາມຟົດຟື້ນ ຕິດພັນກັບຂະບວນການສ້າງພັກປອດໃສ, ເຂັ້ມແຂງ, ໜັກແໜ້ນ ແລະ ຂະບວນການແຂ່ງຂັນ “ຮັກຊາດ ແລະ ພັດທະນາ” ຕ້ອງສ້າງໃຫ້ສະມາຊິກກຳມະບານມີການແຂ່ງຂັນກັນເຝິກຝົນຫລໍ່ຫລອມຕົນເອງ, ແຂ່ງຂັນກັນປະຕິບັດລະບຽບວິໄນ, ກົດໝາຍ, ແຂ່ງຂັນກັນປະຕິບັດວຽກງານໃຫ້ດີ, ໃຫ້ໄວ ແລະ ມີປະສິດທິຜົນສູງ, ມີຫົວຄິດປະດິດສ້າງ ແລະ ພັດທະນາຕົນເອງ, ກົມກອງ, ໜ່ວຍງານທີ່ຕົນສັງກັດ; ການສ້າງຂະບວນການແມ່ນຈຸດປະສົງເພື່ອປຸກລະດົມກົມກອງ, ບຸກຄົນໃຫ້ມີຄວາມຫ້າວຫັນ, ຊອກໄດ້ຜູ້ດີເດັ່ນ, ສ້າງໃຫ້ມີຄົນດີ, ຄົນເກັ່ງ ແລະ ກ້າວໜ້າ, ຕີຖອຍປາກົດການຫຍໍ້ທໍ້ຕ່າງໆ ເປັນຕົ້ນຄວາມຂີ້ຄ້ານມັກງ່າຍ ເຮັດວຽກພໍແລ້ວ ລໍຖ້າແຕ່ການຊີ້ນຳ ຫລື ຄຳສັ່ງຈາກຂັ້ນເທິງ, ຂາດຄວາມຮັບຜິດຊອບ ແລະ ອື່ນໆ.

ສຳລັບຄະນະບໍລິຫານງານສະຫະພັນກຳມະບານສະພາແຫ່ງຊາດ ກໍຄືຄະນະກຳມະບານຮາກຖານ ໃຫ້ສືບຕໍ່ຊີ້ນຳ-ນຳພາ ວຽກງານຂອງກຳມະບານ ຕາມພາລະບົດບາດຂອງຕົນ ໂດຍການປັບປຸງລະບອບແບບແຜນວິທີເຮັດວຽກໃຫ້ສອດຄ່ອງ ແລະ ມີປະສິດທິພາບ ໃນແຕ່ລະໄລຍະ. ດ້ານດີ ກໍຄວນເສີມຂະຫຍາຍ, ດ້ານຂໍ້ຄົງຄ້າງ ກໍນຳມາສຶກສາເປັນບົດຮຽນ ຫາວິທີແກ້ໄຂ ເພື່ອປັບປຸງຄຸນນະພາບການຊີ້ນຳ-ນຳພາ ແລະ ບັນຫາສຳຄັນ ຕ້ອງໃຫ້ມີຄວາມສາມັກຄີພາຍໃນຢ່າງໜັກແໜ້ນ, ປະຕິບັດແບບແຜນວິທີເຮັດວຽກ ຕາມຫລັກການລວມສູນປະຊາທິປະໄຕ, ນຳພາເປັນໝູ່ຄະນະ, ແບ່ງງານໃຫ້ບຸກຄົນຮັບຜິດຊອບ, ມີລະບອບປະຊຸມຕາມລະບຽບການກຳນົດ ແລະ ເພີ່ມທະວີການປະສານສົມທົບແໜ້ນກັບອົງການຈັດຕັ້ງມະຫາຊົນທີ່ເປັນພາຄີ (ສະຫະພັນແມ່ຍິງ ແລະ ອົງການຈັດຕັ້ງຊາວໜຸ່ມ) ເພື່ອພ້ອມກັນເຮັດສຳເລັດໜ້າທີ່ການເມືອງຂອງຕົນ ໃນການຜັນຂະຫຍາຍ ແລະ ຈັດຕັ້ງປະຕິບັດວຽກງານ ຂອງຄະນະພັກ, ຄະນະປະຈຳສະພາແຫ່ງຊາດ ວາງອອກ ໃນແຕ່ລະໄລຍະ ໃຫ້ສາມາດບັນລຸຕາມຄາດໝາຍທີ່ວາງໄວ້.

(ຂ່າວ ແລະ ພາບ: ສຸພາວັນ ຫອມສະນິດ)