ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນ​ລະຫວ່າງ​ວັນ​ທີ 4-5 ມິຖຸນາຜ່ານ​ມາ, ທີ່​ເມືອງ​ວັງ​ວຽງ ​ແຂວງ​ວຽງ​ຈັນ, ​ໄດ້​ຈັດ​ກອງ​ປະຊຸມ​ສຳ​ມະ​ນາ​ການ​ຮັບ​ມື​ກັບ​ສະພາບ​ການ​ປ່ຽນ​ແປງ​ເສດຖະກິດ​ມະຫາ​ພາກ ​ແລະ ການ​ເງິນ-​ເງິນຕາ ​ແລະ ການກວດ​ແກ້​ປຶ້​ມຄູ່​ມື ​ໃນ​ຂົງ​ເຂດ​ກຳມາ​ທິການ​​ແຜນການ, ການ​ເງິນ ​ແລະ ການກວດ​ສອບ ​ໂດຍການ​​ເປັນ​ປະທານ​ຂອງ​ທ່ານ ປອ. ລີ​ເບີ ລີ​ບົວ​ປາວ ປະທານ​ກຳມາ​ທິການ​ແຜນການ, ການ​ເງິນ ​ແລະ ການກວດ​ສອບ, ​ເຂົ້າ​ຮ່ວມ​ມີ​ບັນດາ​ທ່ານ​ຮອງ​ປະທານ​ກຳມາ​ທິການ, ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ຕາງໜ້າ​ສູນ​ກາງ​ສະຫະພັນ​ແມ​່ຍິງ​ລາວ, ຕາງໜ້າ​ສະ​ຖາ​ບັນ​ຄົ້ນຄວ້າ​ເສດຖະກິດ​ມະຫາ​ພາກ, ວິທະຍາສາດ​ເສດຖະກິດ ​​ແລະ ສັງຄົມ​ແຫ່ງ​ຊາດ, ຊ່ຽວຊານ​ຕ່າງປະ​ເທດ (PCASIA), ວິທະຍາກອນ​ຊ່ຽວຊານ​ມູນ​ນິທິ​ອາຊີ (TAF) ​ແລະ ພະນັກງານ​ລັດຖະກອນ​ທີ່​ເປັນ​ເສນາ​ທິການ​ໃຫ້​ແກ່ກຳມາ​ທິການ​​ແຜນການ, ການ​ເງິນ ​ແລະ ການກວດ​ສອບ.
​​ ເນື້ອ​ໃນ​ຂອງກອງ​ປະຊຸມຄັ້ງນີ້, ປະກອບມີ​ການ​ຮັບ​ມື​ກັບ​ສະພາບ​ການ​ປ່ຽນ​ແປງ​ເສ​ດຖະກິດ​ມະຫາ​ພາກ ​ແລະ​ ການ​ເງິນ-​ເງິ​ນຕາ; ການ​ຕິດຕາມ​ກວດກາ​ການ​ສ້າງ​ແຜນ​ງົບປະມານ; ການ​ຕິດຕາມ​ກວດກາ​ການ​ຄຸ້ມ​ຄອງ​ໂຄງການ​ລົງທຶນ​ຂອງ​ລັດ​ຂະໜາດ​ໃຫຍ່; ການ​ຕິດຕາມກວດກາ​ການກວດ​ສອບ ​ແລະ ​ເຕັກ​ນິກການ​ຮັບ​ຟັງ​ຄຳ​ຄິດ​ຄຳ​ເຫັນ​ສາ​ທາ​ລະນະ. ນອກ​ນັ້ນ, ກອງ​ປະຊຸມ​ຍັງ​ໄດ້​ຮັບ​ຟັງ​ການສະ​ເໜີ​ບົດ ການ​ຕິດຕາມ​ກວດກາ​ການຈັດ​ຕັ້ງປະຕິບັດ​ມະຕິ​ກອງ​ປະຊຸມ​ສະພາ​ແຫ່ງ​ຊາດ ວ່າດ້ວຍ​ການ​ຮັບຮອງ​ເອົາ​ວາລະ​ແຫ່ງ​ຊາດ​ ກ່ຽວ​ກັບ​ການ​ແກ້​ໄຂ​ຄວາມ​ຫຍຸ້ງຍາກ​ດ້ານ​ເສດຖະກິດ-ການ​ເງິນ ຈາກ​ທ່ານ ທັນ​ຕາ ກອງ​ຜາ​ລີ ຮອງ​ປະທານ​ກຳມາ​ທິການ​ແຜນການ, ການ​ເງິນ ​ແລະ ການກວດສອບ; ຮັບຟັງການລາຍງານຈາກທ່ານ ສົມຫວັງ ກ່ຽວກັບບົດຮຽນ​ສາກົນ​ການ​ຮັບ​ມື ​ແລະ ການ​ແກ້​ໄຂ​ຄວາມ​ບໍ່​ມີ​ສະຖຽນ​ລະ​ພາບດ້ານ​ເສ​ດຖະກິດ​ມະຫາ​ພາກ, ການ​ເງິນ ​ແລະ ​ເງິນຕາ, ສະ​ເໜີ​ບົດ​ ສະພາບ​ເສດຖະກິດ​ມະຫາ​ພາກ​ປັດຈຸບັນ ​ແລະ ຄວາມ​ສ່ຽງ ​ໄລຍະ​ສັ້ນ ຈາກ​ທ່າ​ນ ນາງ ຄຳ​​ເມິງ ບັນນະ​ລາດ ຕາງ​ໜ້າສະ​ຖາບັນ​ຄົ້ນຄວ້າ​ເສດຖະກິດ​ມະຫາ​ພາກ, ສະຖາບັນ​ວິທະຍາ​ສາດ​ເສດຖະກິດ ​ແລະ ສັງຄົມ​ແຫ່ງ​ຊາດ; ​ແລະ, ລາຍ​ງານ​ແຜນການ​ຄົ້ນ​ຄວ້າ, ການຄົ້ນຄວ້າການ​ສ້າງ​ປຶ້​ມຄູ່​ມື ​ແລະ ປຶ້ມປະທາ​ນາ​ນຸກົມ​ຂອງກຳມາ​ທິການ​ແຜນການ, ການ​ເງິນ ​ແລະ ການກວດ​ສອບ.
​ ກອງ​ປະຊຸມ​ຄັ້ງ​ນີ້ ​​ໄດ້​ຮັບ​ການ​ສະ​ໜັກ​ສະ​ໜູນ​ຈາກ​ໂຄງການມູນິທິ​ເອ​ເຊຍ (TAF)
(ພາບ ແລະ ຂ່າວ: ນາງ ກຸກກິກ ບຸດດາໄຊ)