ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ເພື່ອເປັນການປະຕິບັດ ຕາມຄໍາແນະນໍາ ຂອງຄະນະປະຈຳສະພາແຫ່ງຊາດ, ເລກທີ 15 /ຄປຈ, ລົງວັນທີ 03 ທັນວາ 2021 ກ່ຽວກັບການຈັດຕັ້ງຜັນຂະຫຍາຍ ຜົນສໍາເລັດກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃຫ້ສຳເລັດຕາມຈຸດປະສົງ ແລະ ຄາດໝາຍ ທີ່ວາງໄວ້. ສະນັ້ນ, ໃນລະຫວ່າງວັນທີ 1 ຫາ 7 ມີນາ ປີ 2022, ທ່ານ ສົມພອນ ສີອຸດົມພັນ ກໍາມະການພັກແຂວງ, ຮອງປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6, ຮອງປະທານ ສະພາປະຊາຊົນແຂວງ ທັງເປັນປະທານ ຄະນະກຳມະການ ເສດຖະກິດ, ແຜນການ ແລະ ການເງິນ ຂອງສະພາປະຊາຊົນແຂວງ ໄດ້ລົງເຄື່ອນໄຫວໂຄສະນາເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ2 ຂອງສະພາແຫ່ງຊາດທີ IXແລະ ສະພາປະຊາຊົນແຂວງ ຊຸດທີ II ຢູ່ທີ່ເມືອງໂພນທອງ ແລ ເມືອງງອຍ. ລະອຽດມີດັ່ງນີ້: ສຳລັບເມືອງໂພນທອງ ປະກອບມີ 5 ຈຸດຄື: ສໍານັກເມືອງ, ກອງບັນຊາການທະຫານເມືອງ, ບ້ານວັງແນກ, ບ້ານທອງສີ ແລະ ບ້ານທອງໃຕ້; ສຳລັບເມືອງງອຍ ປະກອບມີ 5 ຈຸດຄື: ສໍານັກເມືອງ, ບ້ານເມືອງງອຍ, ບ້ານຫວ້ຍແສນ, ບ້ານນາກາງ ແລະ ບ້ານຫ້ວຍບໍ່; ຊຶ່ງເປົ້າໝາຍຂອງຜູ້ເຂົ້າຮ່ວມ ຮັບຟັງການເຜີຍແຜ່ຜົນສຳເລັດກອງປະຊຸມໃນຄັ້ງນີ້ ປະກອບມີ ທ່ານ ເຈົ້າເມືອງ, ຮອງເຈົ້າເມືອງ, ບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ພະນັກງານ-ລັດຖະກອນ, ອົງການປົກຄອງບ້ານ ແລະ ຜູ້ມີສິດເລືອກຕັ້ງ ໃນສອງເມືອງດັ່ງກ່າວ ລວມທັງໝົດມີ 728 ທ່ານ, ຍິງ 271 ທ່ານ.

ການລົງເຄື່ອນໄຫວວຽກງານໃນຄັ້ງນີ້, ແມ່ນໄດ້ຮັບຟັງການລາຍງານສະພາບໂດຍຫຍໍ້ ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ໃນໄລຍະ 1 ປີຜ່ານມາ ແລະ ທິດທາງແຜນການ 1 ປີຕໍ່ໜ້າ ຈາກຕາງໜ້າຂອງອົງການປົກຄອງເມືອງ ແລະ ບ້ານ ຊຶ່ງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸງຍາກ ແລະ ສິ່ງທ້າທາຍຫຼາຍບັນຫາ. ຈາກນັ້ນ ທ່ານ ສົມພອນ ສີອຸດົມພັນ ກໍາມະການພັກແຂວງ, ຮອງປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6, ຮອງປະທານ ສະພາປະຊາຊົນແຂວງ ກໍ່ໄດ້ໃຫ້ກຽດເຜີຍແຜ່ເນື້ອໃນຈິດໃຈ ຜົນສຳເລັດ ກອງປະຊຸມສະໄໝສາມັນ ເທື່ອທີ2 ຂອງສະພາແຫ່ງຊາດທີ IX ແລະ ສະພາປະຊາຊົນແຂວງ ຊຸດທີ IIຕິດພັນກັບ ການເຜີຍແຜ່ ທີ່ຕັ້ງ, ພາລະບົດບາດ, ສິດ ແລະ ໜ້າທີ່ຂອງ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ 2 ວາລະແຫ່ງຊາດໃນການແກ້ໄຂບັນຫາເສດຖະກິດການເງິນ ແລະ ບັນຫາຢາເສບຕິດ ໃຫ້ບັນດາຜູ້ມີສິດເລືອກຕັ້ງ ໄດ້ຮັບຮູ້ ແລະ ເຂົ້າໃຈ ຕໍ່ບັນຫາສຳຄັນຕ່າງໆ ທີ່ໄດ້ພິຈາລະນາ ແລະ ຮັບຮອງເອົາຢູ່ໃນກອງປະຊຸມ ຂອງສະພາແຫ່ງຊາດ ແລະ ສະພາປະຊາຊົນແຂວງ. ພ້ອມນີ້ ຍັງໄດ້ຮັບຟັງຄຳຄິດຄຳເຫັນ, ຂໍ້ຂັດຂ້ອງໝອງໃຈຂອງຜູ້ມີສິດເລືອກຕັ້ງ ເຊິ່ງເຫັນໄດ້ຫລາຍບັນຫາ ທີ່ຕິດພັນກັບວຽກງານການພັດທະນາເສດຖະກິດ-ສັງຄົມ ແລະ ວຽກງານອື່ນໆ.

ຈາກນັ້ນ, ທ່ານ ຮອງປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6 ກໍໄດ້ອະທິບາຍ, ຊີ້ແຈງ ຕໍ່ກັບບັນດາຄຳສະເໜີຕ່າງໆ ໃຫ້ຜູ້ມີສິດເລືອກຕັ້ງ ເຂົ້າໃຈກັບທີ່ ແລະ ຮັບເອົາບາງຄຳສະເໜີ ເພື່ອນຳໄປຊຸກຍູ້ ໃຫ້ພາກສ່ວນທີ່ກ່ຽວຂ້ອງ ຄົ້ນຄວ້ພິຈາລະນາ ແລະ ແກ້ໄຂຕາມພາລະບົດບາດ ພ້ອມທັງໄດ້ຮຽກຮ້ອງໃຫ້ ອົງການປົກຄອງເມືອງ ແລະ ອົງການປົກຄອງບ້ານດັ່ງກ່າວ ສືບຕໍ່ເອົາໃຈໃສ່ ຍົກສູງສິດເປັນເຈົ້າໃນການຈັດຕັ້ງປະຕິບັດ ບັນດານະໂຍບາຍຂອງພັກ, ລະບຽບກົດໝາຍ, ແຜນພັດທະນາເສດຖະກິດ-ສັງຄົມ ກໍຄືມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນແຂວງ ໂດຍສະເພາະແມ່ນ 2 ວາລະແຫ່ງຊາດ ໃຫ້ບຸນລຸຕາມຈຸດປະສົງ ແລະ ຄາດໝາຍທີ່ວາງໄວ້. ໃນໂອກາດລົງເຄືອນໄຫວຄັ້ງນີ້ ທ່ານຍັງໄດ້ນຳເອົາຊຸດກິລາ ຈຳນວນ 25 ຊຸດ ມອບໃຫ້ ຫ້ອງການສະະພັນແມ່ນຍິງ ເມືອງໂພນທອງ ລວມມູນຄ່າ 1,875,000 ກີບ.​​​                                                                                                                                                                                

9 ມີນາ 2022                                                                          

                ຂ່າວ ແລະ ພາບ: ວິສະນຸ ເພັດສຸພັນ