ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 25 ພະຈິກຜ່ານມາ, ຢູ່ທີ່ສະພາແຫ່ງຊາດ ໃນນາມຕາງໜ້າໃຫ້ສະພາແຫ່ງຊາດ ແຫ່ງ ສປປລາວ ໂດຍທ່ານ ປອ. ສຸລາພອນ ອິນ​ທະ​ວົງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ແລະ ທ່ານ ຄຳຕັນ ທາດາວົງ ຫົວໜ້າກົມເສດຖະກິດການຜະລິດ, ກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ຂອງສະພາແຫ່ງຊາດລາວ ພ້ອມດ້ວຍພາກສ່ວນກ່ຽວຂ້ອງ ໄດ້ເຂົ້າຮ່ວມກອງປະຊຸມສຳມະນາແບບອອນລາຍ ພາຍໃຕ້ຫົວຂໍ້ ‘‘ການລົງທຶນຢ່າງມີຄວາມຮັບຜິດຊອບຕໍ່ວຽກງານກະສິກຳ ແລະ ລະບົບສະບຽງອາຫານ’’(Responsible investment in Agriculture and food Systems, RAI) ໃຫ້ກຽດເປີດພິທີໂດຍ ປອ. ຈີມ ຢີບ ປະທານໄອປາ, ຜູ້ຕາງໜ້າສະພາແຫ່ງຊາດ ແຫ່ງລາຊະອານາຈັກກໍາປູເຈຍ ແລະ ດໍາເນີນກອງປະຊຸມໂດຍ ທ່ານ ນາງ ຫວຽນ ຖຸງ ວັນ ເລຂາທິການໃຫຍ່ໄອປາ. ນອກຈາກນັ້ນ, ຍັງມີຜູ້ຕາງໜ້າ ຈາກບັນດາປະເທດສະມາຊິກລັດຖະສະພາອາຊຽນ, ບັນດາຄູ່ຮ່ວມເຈລະຈາ ຈາກລັດຖະສະພາພາກພື້ນ, ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

              ໃນກອງປະຊຸມ, ບັນດາຜູ້ເຂົ້າຮ່ວມໄດ້ຮັບຟັງການນຳສະເໜີກ່ຽວກັບຄູ່ມືແນະນໍາຂອງອາຊຽນດ້ານການສົ່ງເສີມການລົງທຶນຢ່າງມີຄວາມຮັບຜິດຊອບຕໍ່ວຽກງານສະບຽງອາຫານ, ກະສິກໍາ ແລະ ປ່າໄມ້ (The ASEAN guideline on Promoting Responsible Investment in Food, Agriculture and Forestry) ເຊິ່ງນໍາສະເໜີໂດຍຜູ້ຕາງໜ້າຈາກສະຖາບັນສາກົນ ເພື່ອການພັດທະນາແບບຍືນຍົງ (International Institute for Sustainable Development, IISD) ແລະ ຄູ່ມືແນະນໍາຈັດຕັ້ງປະຕິບັດສໍາຫຼັບສະມາຊິກລັດຖະສະພາ ແລະ ທີ່ປຶກສາລັດຖະສະພາ (A Practical Handbook for Parliamentarians and Parliamentary Advisors) ຊຶ່ງນໍາສະເໜີໂດຍ ອົງການອາຫານ ແລະ ການກະເສດ ແຫ່ງສະຫະປະຊາຊາດ (Food and Agriculture Organization of the United Nation, FAO).ຈາກນັ້ນ, ບັນດາຜູ້ແທນສະມາຊິກລັດຖະສະພາໄອປາ ໄດ້ຜັດ​ປ່ຽນ​ກັນ​ປະກອບຄໍາເຫັນໃສ່ການນໍາສະເໜີດັ່ງກ່າວ ແລະ ໄດ້ລາຍ​ງານ​ສະ​ພາບ​ການ​ໂດຍ​ຫຍໍ້​ ກ່ຽວ​ກັບ​ ການຈັດຕັ້ງປະຕິບັດວຽກງານການລົງທຶນ ໃນຂົງເຂດ​ກະ​ສິ​ກຳ ແລະ ລະບົບສະບຽງອາ​ຫານ​ ລວມທັງ ບັນຫາ, ຂໍ້ຈໍາກັດ ແລະ ສິ່ງທ້າທາຍຕ່າງໆ ເປັນຕົ້ນການລະບາດຂອງພະຍາດໂຄວິດ-19, ສະພາບການປ່ຽນແປງຂອງດິນຟ້າອາກາດ ເຊິ່ງມີຜົນກະທົບໂດຍກົງຕໍ່ການພັດທະນາເສດຖະກິດ-ສັງຄົມ ແລະ ຕ່ອງໂສ້ການຜະລິດກະສິກຳ ພາຍໃນ​ປະ​ເທດ ແລະ ພາກພື້ນ​. ໃນວາລະສຸດທ້າຍ, ບັນດາຜູ້ແທນສະມາຊິກລັດຖະສະພາໄອປາ ໄດ້ເຫັນດີເປັນເອກະພາບ ແລະ ສະໜັບສະໜູນ ຄູ່ມືແນະນຳດັ່ງກ່າວ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດເຂົ້າໃນວຽກງານຕົວຈິງ.

ກອງປະຊຸມສໍາມະນາຄັ້ງນີ້, ເປັນກອງປະຊຸມຄັ້ງທຳອິດທີ່ໄດ້ນຳສະເໜີຄູ່ມືແນະນຳ ກ່ຽວກັບການປະຕິບັດງານຂອງສະມາຊິກລັດຖະສະພາ ເພື່ອສ້າງເງື່ອນໄຂສະພາບແວດລ້ອມ ແລະ ສິ່ງອໍານວຍຄວາມສະດວກ ໃຫ້ແກ່ການລົງທຶນຢ່າງມີຄວາມຮັບຜິດຊອບ ຕໍ່ຂົງເຂດວຽກງານກະສິກຳ ແລະ ລະບົບສະບຽງອາຫານ ພາຍໃຕ້ການສະໜັບສະໜູນຈາກອົງການ FAO ແລະ IISD ເຊິ່ງເລີ່ມແຕ່ປີ 2020 ເປັນຕົ້ນມາ; ພ້ອມດຽວກັນນີ້, ຖື​ໄດ້​ວ່າເປັນໂອກາດອັນດີໃຫ້ແ​ກ່ຄະນະຜູ້​ແທນຂອງສະພາແຫ່ງຊາດລາວ ທີ່ໄດ້ມີສວ່ນຮ່ວມປຶກສາຫາລື ແລະ ແລກປ່ຽນບົດຮຽນກັບບັນດາຜູ້ແທນ ແລະ ຄະນະຊ່ຽວຊານ ທີ່ເຂົ້າຮ່ວມກອງປະຊຸມສໍາມະນາ ໃນຄັ້ງນີ້.

(ໂດຍ: ນາງ ປາ​ກາ​ລັກ ພົມ​ມີ​ໄຊ)