ໃນໂອກາດປຶກສາຫາລືຄັ້ງນີ້, ພະນະທ່ານປະທານສະພາແຫ່ງຊາດລາວ ໄດ້​ສະ​ແດງ​ຄວາມປິຕິຍິນດີ ທີ່ໄດ້ພົບປະເຮັດວຽກນໍາກັນ; ພະນະທ່ານປະທານສະພາແຫ່ງຊາດຫວຽດນາມ ກໍ່ໄດ້ສະແດງຄວາມຂອບໃຈ ຕໍ່ການສະຫຼະເວລາພົບປະ ພ້ອມທັງສະແດງຄວາມຍ້ອງຍໍຊົມ​ເຊີຍ ຕໍ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ທີຫາກໍ່ປິດລົງ ແລະ ການພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານມາ.

ໃນໂອກາດພົບປະຄັ້ງນີ້, ສອງຝ່າຍ ໄດ້ປຶກສາຫາລື ກ່ຽວກັນການສືບຕໍ່ຮ່ວມມືກັນ ລະຫວ່າງ ສອງອົງການນິຕິບັນຍັດ ໂດຍສະເພາະແມ່ນການຈັດຕັ້ງປະຕິບັດບົດບັນທຶກຊ່ວຍຈໍາວ່າດ້ວຍການຮ່ວມມື ລະຫວ່າງ ສອງສະພາແຫ່ງຊາດ, ສືບຕໍ່ໃຫ້ການຊ່ວຍເຫຼືອໃນການຄຸ້ມຄອງ ແລະບົວລະບັດຮັກສາ ຫໍສະພາແຫ່ງຊາດ 2023-2025, ການໃຫ້ການຊ່ວຍເຫຼືອ ໃນການຍົກສູງທາງດ້ານເນື້ອໃນ-ດ້ານວິຊາການ ໃນການເປັນເຈົ້າພາບກອງປະຊຸມສຸດຍອດລັດຖະສະພາ 3 ປະເທດ ກໍາປູເຈຍ-ລາວ-ຫວຽດນາມ ຄັ້ງທີ 1 ຊຶ່ງຈະຈັດຂຶ້ນ ໃນເດືອນທັນວາ ປີ 2023 ແລະ ການເປັນເຈົ້າພາບກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໃນປີ 2024 ໃຫ້ບັນລຸຜົນສໍາເລັດຢ່າງຈົບງາມ.

​ສອງຝ່າຍ ເຫັນ​ດີຈະ​ສືບ​ຕໍ່ເພີ່ມ​ທະວີຈັດຕັ້ງປະຕິບັດ​ບັນດາ​ກົນ​ໄກ​ຮ່ວມ​ມື​ສອງ​ຝ່າຍ ແລະ ບັນດາ​ໂຄງການ​ຮ່ວມ​ມື​ຍຸດ​ທະ​ສາດ​ທີ່​ສຳຄັນ ຂອງສອງປະເທດ ໃນຂະແໜງ​ເສດຖະກິດ, ການ​ຄ້າ, ການ​ລົງທຶນ ແລະອື່ນໆ. ໃນນີ້, ທ່ານປະທານສະພາແຫ່ງຊາດລາວ ໄດ້ສະເໜີໃຫ້ຝ່າຍຫວຽດນາມ ພິຈາລະນາສ້າງເຂດຈຸດສຸມໃນການພັດທະນາ ແລະຮ່ວມມືເພື່ອການຜະລິດກະສິກໍາໃຫ້ເປັນສິນຄ້າ ໃນເຂດຊາຍແດນລາວ-ຫວຽດນາມ ໂດຍຄັດເລືອກເອົາສອງແຂວງ, ແຂວງກວາງຈິ ແລະ ແຂວງສະຫວັນນະເຂດ ເປັນຈຸດເລີ່ມຕົ້ນ ໃນການຜະລິດກະສິກໍາເປັນສິນຄ້າ, ແລກປ່ຽນບົດຮຽນ ແລະ ຖ່າຍທອດເທັກໂນໂລຊີ. ນອກຈາກນີ້, ທ່ານປະທານສະພາແຫ່ງຊາດຫວຽດນາມ ກໍ່ຍັງໄດ້ຢືນຢັນໃຫ້ການຊ່ວຍເຫຼືອ ແລະ ສະໜັບສະໜູນ ສະພາແຫ່ງຊາດລາວ ໃນການປະຕິບັດ ພັນທະສາກົນ ໃນການເປັນເຈົ້າພາບຈັດກອງປະຊຸມທີ່ກ່າວມາຂ້າງເທິງນັ້ນ.

​​ໃນ​ໂອກາດ​ນີ້, ທ່ານ​​ປະທານ​ສະພາ​ແຫ່ງ​ຊາດຫວຽດນາມ ​ໄດ້​ເຊື້ອ​ເຊີນ​ ສະມາຊິກສະພາໜຸ່ມ ຂອງສະພາ​ແຫ່ງ​ຊາດ​ລາວ ​ເຂົ້າ​ຮ່ວມ​ກອງ​ປະຊຸມ​ສະມາຊິກ​ສະພາ​ໜຸ່ມ​​ໂລກ ​ຄັ້ງ​ທີ 9 ທີ່​ ສະພາແຫ່ງຊາດຫວຽດນາມ ຮ່ວມກັບ ສະຫະພັນລັດຖະສະພາສາກົນ (IPU) ເຊິ່ງຈະ​ຈັດ​ຂຶ້ນ​ໃນ​ທ້າຍປີ 2023 ນີ້ ຢູ່ ນະຄອນຫຼວງຮ່າ​ໂນ້ຍ, ສສ ຫວຽດນາມ.