ການນໍາພັກ-ລັດ ເຂົ້າຮ່ວມຊົມຮູບເງົາ “ຝົນແດງ”

​(ສພຊ) – ເນື່ອງໃນໂອກາດສະເຫຼີມສະຫຼອງວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 49 ປີ (18 ກໍລະກົດ 1977 – 18 ກໍລະກົດ 2026), ສະຖານເອກອັກຄະລັດຖະທູດ ສສ.ຫວຽດນາມ ປະຈຳ ສປປລາວ ສົມທົບກັບສູນວັດທະນະທຳຫວຽດນາມ ແລະ ບໍລິສັດ Star Telecom (Unitel) ໄດ້ຈັດພິທີສາຍຮູບເງົາເລື່ອງ “ຝົນແດງ” (Mưa Đỏ) ໃນວັນທີ 16 ກໍລະກົດນີ້ ທີ່ນະຄອນຫຼວງວຽງຈັນ; ມີສະຫາຍ ນາງ ສຸນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ, ສະຫາຍ ຈັນສະໝອນ ຈັນຍາລາດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ອະດີດລັດຖະມົນຕີກະຊວງປ້ອງກັນປະເທດ, ບັນດາສະຫາຍອະດີດກຳມະການກົມການເມືອງສູນກາງພັກ, ກຳມະການສູນກາງພັກ, ອະດີດກຳມະການສູນກາງພັກ, ການນຳ ແລະ ຕາງໜ້າຈາກບັນດາຄະນະສູນກາງພັກ, ກະຊວງ, ຂະແໜງການຂອງລາວ ພ້ອມທັງບັນດາອົງການສື່ມວນຊົນຂອງ ລາວ ແລະ ຫວຽດນາມ ເຂົ້າຮ່ວມຢ່າງພ້ອມພຽງ.
​ ໃນພິທີ, ສະຫາຍ ຫງວຽນ ມິງ ເຕິມ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສ.ຫວຽດນາມ ປະຈໍາ ສປປລາວ ກ່າວວ່າ: ສົນທິສັນຍາສະບັບນີ້ ແມ່ນເອກະສານທີ່ມີເນື້ອໃນຮອບດ້ານ, ມີຄຸນຄ່າຍຸດທະສາດຍາວນານ ແລະ ເປັນພື້ນຖານທາງການເມືອງ ແລະ ນິຕິກຳໜັກແໜ້ນທີ່ສຸດ ເພື່ອປັບປຸງ ແລະ ເພີ່ມທະວີຄວາມສາມັກຄີ, ສາຍພົວພັນພິເສດ ຫວຽດນາມ-ລາວ ໃນຍຸກສະໄໝໃໝ່. ສົນທິສັນຍາປີ 1977 ບໍ່ພຽງເປັນຫຼັກການປະຫວັດສາດທີ່ສະທ້ອນໃຫ້ເຫັນການແລກປ່ຽນການພົວພັນລະຫວ່າງສອງພັກ ໄປສູ່ການຮ່ວມມືຢ່າງຮອບດ້ານລະຫວ່າງສອງລັດອະທິປະໄຕ, ມີເອກະລາດ ແຕ່ຍັງເປັນກົດເກນແຫ່ງການດຳລົງຢູ່ ແລະ ເປັນແຫຼ່ງພະລັງອັນສຳຄັນ ທີ່ຮັບປະກັນໄຊຊະນະໃຫ້ແກ່ພາລະກິດການກໍ່ສ້າງ ແລະ ປົກປັກຮັກສາປະເທດຊາດຂອງແຕ່ລະປະເທດ; ບົນພື້ນຖານຂອງຈິດໃຈສາກົນນິຍົມກຳມະຊີບ ແລະ ຫຼັກການສະເໝີພາບ, ເຄົາລົບເອກະລາດ ແລະ ອະທິປະໄຕຂອງກັນແລະກັນ, ສົນທິສັນຍາປີ 1977 ໄດ້ສ້າງພື້ນຖານທາງນິຕິກຳ ເພື່ອໃຫ້ສອງປະເທດສາມາດບັນລຸພາລະກິດປະຫວັດສາດອັນຍິ່ງໃຫຍ່ ຄືການວາງກຳນົດເຂດຊາຍແດນແຫ່ງຊາດ ແລະ ການຮ່ວມມືຮອບດ້ານໃນຂົງເຂດການເມືອງ, ປກຊ-ປກສ, ການຕ່າງປະເທດ, ເສດຖະກິດ, ວັດທະນະທຳ, ການສຶກສາ, ເຕັກນິກ.
ໃນສະພາບການຫັນເປັນໂລກາພິວັດ ແລະ ປ່ຽນແປງໃໝ່ໃນປັດຈຸບັນ, ສົນທິສັນຍາສະບັບນີ້ ຍັງຄົງຮັກສາຄຸນຄ່າອັນສົມບູນ, ເປັນເຂັມທິດນຳທາງໃຫ້ສອງປະເທດສາມາດເຊື່ອມໂຍງເຂົ້າກັບສາກົນຢ່າງຕັ້ງໜ້າ ພ້ອມກັບຮັກສາເອກະລັກຂອງຕົນ, ພ້ອມທັງກຳນົດຂໍ້ຮຽກຮ້ອງໃໝ່ໃນການປັບປຸງຮູບແບບການຮ່ວມມືຢ່າງບໍ່ຢຸດຢັ້ງ ເພື່ອຄວາມຍືນຍົງຂອງທັງສອງປະຊາຊາດ; ນີ້ແມ່ນຊັບສິນອັນລ້ຳຄ່າທີ່ຄົນຮຸ່ນຫຼັງມີໜ້າທີ່ຮ່ວມກັນຮັກສາ ແລະ ເສີມຂະຫຍາຍ. ຫວນຄືນເສັ້ນທາງເກືອບເຄິ່ງສະຕະວັດ ນັບແຕ່ສົນທິສັນຍາປະຫວັດສາດໄດ້ລົງນາມ, ພວກເຮົາພາກພູມໃຈທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ, ຫຸ້ນສ່ວນຍຸດທະສາດ ລາວ-ຫວຽດນາມ ນັບມື້ນັບປັບປຸງ ແລະ ພັດທະນາເຂົ້າສູ່ລວງເລິກ, ແທດຈິງ ແລະ ມີປະສິດທິຜົນໃນທຸກໆຂົງເຂດ.
ສະຫາຍ ຫງວຽນ ມິງ ເຕິມ ກ່າວຕື່ມວ່າ: ຮູບເງົາ “ຝົນແດງ” (Mưa Đỏ) ຜະລິດໂດຍກອງທັບປະຊາຊົນຫວຽດນາມ ຈະນຳພາພວກເຮົາຢ້ອນຄືນໄປສູ່ໄລຍະເວລາອັນອົງອາດໃນປີ 1972 ໂດຍສະທ້ອນໃຫ້ເຫັນຢ່າງແທດຈິງເຫດການຕໍ່ສູ້ໃນຕະຫຼອດ 81 ທັງເວັນທັງຄືນ ເພື່ອປົກປ້ອງກຳແພງບູຮານກວາງຈິ (Thành cổ Quảng Trị); ໃນໄລຍະເວລາບໍ່ເຖິງ 3 ເດືອນ, ດິນແດນແຫ່ງນັ້ນຕ້ອງຮັບເອົາລູກລະເບີດກວ່າ 328,000 ໂຕນ, ມີອຳນາດທຳລາຍທຽບເທົ່າລະເບີດນິວເຄລຍ 7 ລູກ, ກາຍເປັນ “ທະເລໄຟ” ອັນດຸເດືອດ ທີ່ສະແດງໃຫ້ເຫັນການທຳລາຍອັນໂຫດຮ້າຍຂອງສົງຄາມ. ຮູບເງົາເລື່ອງນີ້ ບໍ່ພຽງເປັນບົດນິພົນສິລະປະອັນໂດດເດັ່ນທີ່ເຄີຍໄດ້ຮັບລາງວັນ ບົວຄຳ (Bông Sen Vàng) ແລະ ປີກວ່າວຄຳ (Cánh Diều Vàng) ເທົ່ານັ້ນ, ແຕ່ຍັງເປັນບົດກອນຍາວກ່ຽວກັບນ້ຳໃຈສະຫາຍ, ອຸດົມການຂອງບັນດານັກຮົບ “ທະຫານລຸງໂຮ່” ແລະ ນັກສຶກສາດີເດັ່ນທີ່ຍອມວາງປຶ້ມຮຽນໄວ້ເບື້ອງຫຼັງ ເພື່ອເຂົ້າຮ່ວມສົງຄາມປົກປັກຮັກສາເອກະລາດຂອງຊາດ. ຜ່ານຮູບເງົາອັນຊາບຊຶ້ງເຫຼົ່ານີ້, ທ່ານທູດຫວັງວ່າ ຄົນຮຸ່ນໃໝ່ຈະຍິ່ງເຫັນຄຸນຄ່າຂອງການເສຍສະຫຼະຂອງຮຸ່ນປູ່, ຮຸ່ນພໍ່ ແລະ ຮັບຮູ້ຢ່າງເລິກເຊິ່ງເຖິງຄວາມຮັບຜິດຊອບໃນການຮັກສາສັນຕິພາບ ກໍຄືຄວາມສາມັກຄີສະໜິດສະໜົມລະຫວ່າງສອງປະເທດຂອງພວກເຮົາ.
ໃນສະພາບການຫວຽດນາມ ກຳລັງຈັດຕັ້ງປະຕິບັດມະຕິເລກທີ 80-NQ/TW ວ່າດ້ວຍການພັດທະນາວັດທະນະທຳຢ່າງຕັ້ງໜ້າ, ຢັ້ງຢືນວ່າວັດທະນະທຳເປັນພື້ນຖານດ້ານຈິດໃຈ ແລະ ເປັນແຫຼ່ງກຳລັງພະລັງງານພາຍໃນອັນສຳຄັນໃຫ້ແກ່ການພັດທະນາຢ່າງຍືນຍົງ; ພ້ອມທັງຍູ້ແຮງການຈັດຕັ້ງປະຕິບັດມະຕິເລກທີ 57-NQ/TW ວ່າດ້ວຍການບຸກທະລຸໃນການພັດທະນາວິທະຍາສາດ, ເຕັກໂນໂລຊີ, ປ່ຽນແປ່ງໃໝ່ປະດິດຄິດສ້າງ ແລະ ການຫັນເປັນດິຈິຕອນ ໃນນັ້ນ ການນຳໃຊ້ວິທະຍາສາດ-ເຕັກໂນໂລຊີ ແລະ ການຫັນເປັນດິຈິຕອນເຂົ້າໃນວຽກງານວັດທະນະທຳ ເປັນໜຶ່ງໃນຂໍ້ກຳນົດສຳຄັນ ແລະ ຖືເປັນກຳລັງໜູນກຸນແຈໃນການເຜີຍແຜ່ພາບຂອງຫວຽດນາມສູ່ເວທີສາກົນ. ຈາກບັນດາທິດທາງຍຸດທະສາດນີ້, ທ່ານທູດເຊື່ອວ່າ ທັງສອງຝ່າຍຈະສືບຕໍ່ເສີມຂະຫຍາຍການຮ່ວມມືໃຫ້ເລິກເຊິ່ງກວ່າອີກ ໃນຂົງເຂດຂ່າວສານ ແລະ ວຽກງານໂຄສະນາແຜີຍແຜ່ຕ່າງປະເທດ; ພວກເຮົາຄວນປະສານງານຢ່າງໃກ້ຊິດ ເພື່ອເຜີຍແຜ່ພາບພົດຂອງປະເທດ, ປະຊາຊົນ ແລະ ຜົນສຳເລັດຂອງແຕ່ລະປະເທດ, ພ້ອມທັງກະກຽມຢ່າງດີທີ່ສຸດໃຫ້ບັນດາກິດຈະກຳໃນປີສາມັກຄີມິດຕະພາບ ແລະ ການຫຸ້ນສ່ວນ ຫວຽດນາມ-ລາວ 2027 ທີ່ຈະມາເຖິງ.
ໂອກາດດັ່ງກ່າວ, ສະຫາຍ ຫງວຽນ ມິງ ເຕິມ ໄດ້ສະແດງຄວາມຂອບໃຈຕໍ່ການເຂົ້າຮ່ວມຂອງບັນດາສະຫາຍການນຳ ແລະ ພະນັກງານຈາກບັນດາກະຊວງ, ຂະແໜງການ ແລະ ອົງການຂອງ ສປປລາວ ໃນພິທີມື້ນີ້; ການເຂົ້າຮ່ວມຂອງບັນດາສະຫາຍ ແມ່ນຫຼັກຖານອັນຈະແຈ້ງທີ່ສຸດສະແດງເຖິງຄວາມເອົາໃຈໃສ່ຢ່າງເລິກເຊິ່ງຕໍ່ວຽກງານແລກປ່ຽນວັດທະນະທຳ, ປະກອບສ່ວນບຳລຸງສ້າງສາຍພົວພັນ ຫວຽດນາມ-ລາວ ໝັ້ນຄົງຖະໜົງແກ່ນຊົ່ວກາລະນານ.