(ສພຊ) ໃນວັນທີ 10 ມີນາ 2021 ທີ່ສະພາແຫ່ງຊາດ, ທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ ທັງເປັນຫົວໜ້າຄະນະກໍາມະການຊີ້ນໍາໂຄງການປຸກສ້າງຫໍສະພາແຫ່ງຊາດລາວ ຫລັງໃໝ່ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຢາມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ພ້ອມດ້ວຍຄະນະ.

ໂອກາດດັ່ງກ່າວ, ໄດ້ຮັບຟັງການລາຍງານໂດຍຫຍໍ້ການປະຕິບັດໂຄງການຂອງຜູ້ຮັບເໝົາກໍ່ສ້າງແມ່ທັບນ້ອຍ 11 ແລະ ແຜນການປະຕິບັດໂຄງການກ່ອນເປີດກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ທີ່ຈະເປີດຂຶ້ນໃນມໍ່ໆ.

ທ່ານ ທອງລຸນ ສີສຸລິດ ໄດ້ມີຄໍາເຫັນຕໍ່ຄະນະຊີ້ນໍາການປຸກສ້າງ ໂດຍທ່ານໄດ້ກ່າວສະແດງຄວາມພູມໃຈທີ່ໄດ້ມີໂອກາດເຂົ້າຢ້ຽມຢາມໂຄງການໃນຄັ້ງນີ້ເປັນຄັ້ງທີ 2 ພ້ອມທັງຕີລາຄາສູງ ແລະ ສະແດງຄວາມຂອບໃຈນໍາຄະນະນໍາສະພາແຫ່ງຊາດ, ຄະນະຄຸ້ມຄອງໂຄງການສອງຝ່າຍ ແລະ ຜູ້ຮັບເໝົາກໍ່ສ້າງ ແມ່ທັບນ້ອຍ 11 ພ້ອມດ້ວຍຄະນະ ທີ່ໄດ້ມີຄວາມພະຍາຍາມສູງໃນການຊຸກຍູ້ ແລະ ຈັດຕັ້ງປະຕິບັດໂຄງການໃນໄລຍະຜ່ານມາ, ຍ້ອນພະຍາດໂຄວິດ-19 ການແຜ່ລະບາດກໍຍັງມີຢ່າງຕໍ່ເນື່ອງຢູ່ໃນພາກພື້ນ ແລະ ທົ່ວໂລກ ເຊິ່ງສົ່ງຜົນກະທົບຕໍ່ແຜນການດໍາເນີນການກໍ່ສ້າງ, ສ້າງຄວາມຫຍຸ້ງຍາກໃນການຈັດຕັ້ງປະຕິບັດໂຄງການເປັນຕົ້ນການນໍາເຂົ້າ, ຊອກຫາວັດສະດຸ-ອຸປະກອນ, ການນໍາເຂົ້າແຮງງານ ແລະ ທ່ານຍັງໄດ້ກ່າວອີກວ່າ: ຫໍສະພາແຫ່ງຊາດລາວຫລັງໃໝ່ນີ້ຈະເປັນສັນຍາລັກແຫ່ງຄວາມສາມັກຄີພິເສດລະຫວ່າງສອງຊາດລາວ-ຫວຽດນາມ ແລະ ມີຄວາມເຊື່ອໝັ້ນທີ່ສຸດວ່າໃນເດືອນມີນານີ້ ຈະສາມາດເປີດກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ໄດ້ ຍ້ອນຄວາມສາມາດໃນການປະຕິບັດໂຄງການຂອງຄະນະຮັບຜິດຊອບຄະນະຊີ້ນໍາໂຄງການກໍ່ສ້າງຂອງທັງສອງຝ່າຍ.

ແຫຼ່ງຂ່າວທີ່ມາ: ສະພາແຫ່ງຊາດ