​(ສພຊ) ປະຕິບັດຕາມກົດໝາຍວ່າດ້ວຍສະພາແຫ່ງຊາດ ແລະ ມະຕິວ່າດ້ວຍການເຄື່ອນໄຫວວຽກງານຂອງຄະນະປະຈໍາສະພາແຫ່ງຊາດ ກ່ຽວກັບການດໍາເນີນກອງປະຊຸມຄະນະປະຈໍາສະພາແຫ່ງຊາດ. ໃນລະຫວ່າງວັນທີ 25-26 ເມສາ 2023 ຄະນະປະຈໍາສະພາແຫ່ງຊາດ ໄດ້ດໍາເນີນກອງປະຊຸມປະຈໍາເດືອນເມສາ 2023 ເພື່ອພິຈາລະນາຕົກລົງບັນຫາສໍາຄັນພື້ນຖານຂອງປະເທດຊາດ ຕາມຂອບເຂດສິດ ແລະ ໜ້າທີ່ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ. ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນ ເມສາ 2023 ໄດ້ດໍາເນີນ ໂດຍການເປັນປະທານນໍາພາກອງປະຊຸມຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ,​ປະທານຄະນະປະຈໍາສະພາແຫ່ງຊາດ, ເຂົ້າຮ່ວມກອງປະຊຸມມີບັນດາທ່ານ ຮອງປະທານຄະນະປະຈໍາສະພາແຫ່ງຊາດ, ກຳມະການຄະນະປະຈໍາສະພາແຫ່ງຊາດ ແລະ ແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງ.
ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນ ເມສາ 2023 ໄດ້ດໍາເນີນໃນສະພາບເງື່ອນໄຂທີ່ ສະພາແຫ່ງຊາດ, ຄະນະປະຈໍາສະພາແຫ່ງຊາດ ກໍາລັງສຸມໃສ່ຕິດຕາມ, ​ຊຸກຍູ້ການຈັດຕັ້ງຜັນຂະຫຍາຍ ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 4 ຂອງສະພາແແຫ່ງຊາດ ຊຸດທີ IX, ບັນດາກົງຈັກເສນາທິການ ກໍາລັງປະສານສົມທົບກັບບັນດາກະຊວງ, ອົງການ ໃນການກະກຽມຮ່າງກົດໝາຍ ແລະ ບັນດາເນື້ອໃນຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX, ການກະກຽມໃຫ້ແກ່ ການດໍາເນີນກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ແລະ ຄະນະລັດຖະບານ; ຫຼາຍພາກສ່ວນກໍາລັງນໍາເອົາຜົນສໍາເລັດຂອງກອງປະຊຸມ ໄປເຜີຍແຜ່ໃຫ້ພໍ່ແມ່ປະຊາຊົນໄດ້ຮັບຊາບ ຕິດພັນກັບການລົງພົບປະກັບ ປະຊາຊົນຜູ້ມີສິດເລືອກຕັ້ງ, ຮັບຟັງຄວາມຄິດຄວາມເຫັນ, ຄໍາສະເໜີຕ່າງໆຂອງປະຊາຊົນ ຕໍ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ເພື່ອເປັນຂໍ້ມູນໃນການປະສານສົມທົບກັບ ພາກສ່ວນກ່ຽວຂ້ອງຄົ້ນຄວ້າແກ້ໄຂ.
​ກອງປະຊຸມໃນຄັ້ງນີ້ ໄດ້ຮັບຟັງການລາຍງານ ແລະ ພິຈາລະນາ, ຕົກລົງບັນຫາວຽກງານສໍາຄັນ ເປັນຕົ້ນ ບົດລາຍງານກ່ຽວກັບຄວາມຄືບໜ້າ ຂອງການກະກຽມປັບປຸງກົດໝາຍຂົງເຂດສະພາແຫ່ງຊາດ ຈໍານວນ 4 ສະບັບ; ບົດລາຍງານກ່ຽວກັບການສະເໜີແຕ່ງຕັ້ງຜູ້ພິພາກສາ ຊັ້ນໜຶ່ງ ຂອງສານປະຊາຊົນສູງສຸດ, ສານປະຊາຊົນທ້ອງຖິ່ນ, ສານທະຫານ; ການສະເໜີແຕ່ງຕັ້ງປະທານ, ຮອງປະທານສານປະຊາຊົນທ້ອງຖິ່ນ ແລະ ການສະເໜີແຕ່ງຕັ້ງຫົວໜ້າຄະນະສານປົກຄອງຂອງ ສານປະຊາຊົນສູງສຸດ; ບົດລາຍງານ ກ່ຽວກັບແຜນການດໍາເນີນກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ແລະ ຄະນະລັດຖະບານ; ແຜນການດໍາເນີນກອງປະຊຸມສະຫຼຸບຕີລາຄາ ການເຄື່ອນໄຫວວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ກາງສະໄໝ ແລະ ທິດທາງແຜນການຮອດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X; ບົດລາຍງານການກະກຽມເປັນເຈົ້າພາບຈັດກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ CLV ຄັ້ງທີ 1 ຢູ່ທີ່ນະຄອນຫຼວງວຽງຈັນ ສປປ ລາວ; ບົດລາຍງານການແຕ່ງຕັ້ງຄະນະຮັບຜິດຊອບລະດັບຊາດ ກອງປະຊຸມໄອປາ AIPA; ລາຍງານການຢ້ຽມຢາມ ແລະ ເຮັດວຽກຮ່ວມກັນ ລະຫວ່າງສອງກໍາມາທິການການຕ່າງປະເທດ ສະພາແຫ່ງຊາດ ລາວ-ຫວຽດນາມ ຢູ່ແຂວງຮ່າຕິ່ງ ສສ. ຫວຽດນາມ; ບົດລາຍງານຜົນການຢ້ຽມຢາມ, ເຮັດວຽກ ແລະ ການຮ່ວມມືສອງຝ່າຍ ລາວ-ເບລາຣຸດ; ບົດລາຍງານແຜນການຕິດຕາມກວດກາ ແລະ ການລົງນາມຂໍ້ຕົກລົງຮ່ວມ ວ່າດ້ວຍການປະສານງານ ລະຫວ່າງ ກໍາມາທິການວັດທະນະທໍາ-ສັງຄົມ ກັບກະຊວງສາທາລະນະສຸກ; ລາຍງານກ່ຽວກັບເນື້ອໃນການແກ້ໄຂຜົນການກວດສອບ ແລະ ກວດກາ ຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດ ທີ່ຈະນໍາເຂົ້າລາຍງານໃນກອງປະຊຸມຮ່ວມລະຫວ່າງ ຄະນະປະຈໍາສະພາແຫ່ງຊາດ ແລະ ຄະນະລັດຖະບານ, ອົງການກວດສອບແຫ່ງລັດ ແລະ ອົງການແຫ່ງລັດ; ບົດລາຍງານກ່ຽວກັບການຈັດຕັ້ງຜັນຂະຫຍາຍຕົວເລກ 9 ຄາດໝາຍ ຕາມມະຕິສະພາແຫ່ງຊາດ ສະບັບເລກທີ 082/ສພຊ, ລົງວັນທີ 30/12/2023; ບົດລາຍງານ ກ່ຽວກັບການແກ້ໄຂຜົນກະທົບຈາກໂຄງການທາງລົດໄຟ; ບົດລາຍງານການແກ້ໄຂບັນຫາໄຟໄໝ້ລາມປ່າ; ບົດລາຍງານກ່ຽວກັບການຈັດຕັ້ງປະຕິບັດ ວຽກງານສື່ມວນຊົນຂອງສະພາແຫ່ງຊາດ ແລະ ການຍ້ອງຍໍຜູ້ມີຜົນງານດີເດັ່ນ ໃນການສ້າງຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2022 ຂອງ ພະນັກງານ-ລັດຖະກອນ ພາຍໃນສະພາແຫ່ງຊາດ.
​ ການດໍາເນີນກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນ ເມສາ 2023 ໄດ້ຮັບຜົນສໍາເລັດຕາມແຜນການທີ່ວາງໄວ້, ບັນຫາສໍາຄັນຕ່າງໆ ທີ່ນໍາມາພິຈາລະນາຢູ່ກອງປະຊຸມ ໄດ້ຜ່ານການຮັບຮອງ, ກາຍເປັນນິຕິກໍາ ແລະ ເປັນບ່ອນອີງໃຫ້ພາກສ່ວນກ່ຽວຂ້ອງ ນໍາໄປຈັດຕັ້ງປະຕິບັດ, ເຮັດໃຫ້ບັນຫາຕ່າງໆ ໄດ້ຮັບການປັບປຸແກ້ໄຂໃຫ້ດີຂຶ້ນ.