ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

                      (ສ​ພ​ຊ) ເພື່ອເປັນການຄົ້ນຄວ້າ, ວິໄຈ ຜົນໄດ້ຮັບ, ຜົນເສຍ, ດ້ານຕັ້ງໜ້າ, ດ້ານຫຍໍ້ທໍ້ ແລະ ບົດຮຽນທີ່ໄດ້ຮັບຈາກການຍົກເວັ້ນການປະຕິບັດບາງມາດຕາຂອງກົດໝາຍໃນໄລຍະຜ່ານມາ ບົນພື້ນຖານການສະເໜີຢ່າງມີວິທະຍາສາດ ກ່ຽວກັບທິດທາງແກ້ໄຂ ແລະ ປັບປຸງໃນຕໍ່ໜ້າ; ແລກປ່ຽນບົດຮຽນ ແລະ ລະດົມແນວຄວາມຄິດ ເພື່ອຊອກຫາທາງອອກທີ່ດີທີ່ສຸດ ແນໃສ່ຮັບປະກັນໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ມີຄວາມສັກສິດ. ພ້ອມກັນນັ້ນ, ກໍເປັນການສ້າງຄວາມສະດວກ ແລະ ດຶງດູດການລົງທຶນ ໃຫ້ຫລາຍຂຶ້ນ. ສະນັ້ນ, ໃນ​ວັນ​ທີ 7 ມີ​ນາ 2022 ຢູ່​ທີ່​ຫໍ​ສະ​ພາ​ແຫ່ງ​ຊາດ ໄດ້​ມີ​ກອງ​ປະ​ຊຸມສຳ​ມະ​ນາ​ວິ​ທ​ະ​ຍາ​ສາດ ກ່ຽວ​ກັ​ບ​ການ​ຍົກ​ເວັ້ນ​ການ​ປະ​ຕິ​ບັດ​ບາງ​ມາດ​ຕາ​ຂອງ​ກົດ​ໝາຍ ໂດຍການ​ເປັນ​ປະ​ທານ​ຂອງ​ທ່ານ ຈ​ະ​ເລີນ ເຍຍ​ປາວ​ເຮີ ຮອງ​ປະ​ທານ​ສະ​ພາ​ແຫ່ງ​ຊາດ, ປະ​ທານ​ກຳ​ມາ​ທິ​ການ​ກົດ​ໝາຍ ທັງ​ເປັນ​ຫົວ​ໜ້າ​ຄະ​ນະ​ຮັບ​ຜິດ​ຊ​ອບ​ຈັດ​ກອງ​ປະ​ຊຸມ​ສຳ​ມະ​ນາ​ດັ່ງ​ກ່າວ; ເຂົ້າ​ຮ່ວມ​ມີທ່ານ ສົມ​ມາດ​ ພົ​ລ​ເສ​ນາ ຮອງ​ປະ​ທານ​ສະ​ພາ​ແຫ່ງ​ຊາດ, ​ບັນ​ດາ​ທ່ານ​ຮອງ​ປະ​ທານ​ກຳ​ມາ​ທິ​ການ, ບັນ​ດາ​ທ່ານ​ລັດ​ຖະ​ມົນ​ຕີ-ຮອງ​ລັດ​ຖະ​ມົນ​ຕ​ີ​ກະ​ຊວງ​ຕ່າງໆ ພ້ອມ​ດ້ວຍ​ພາກ​ສ່ວນ​ກ່ຽວ​ຂ້ອງ.
​           ໃນກອງປະຊຸມ, ໄດ້ຮັບຟັງການສະເໜີບົດພື້ນຖານທາງດ້ານນິຕິກຳໃຫ້ແກ່ການຍົກເວັ້ນການປະຕິບັດບາງມາດຕາຂອງກົດໝາຍ ແລະ ບາງບົດຮຽນຂອງປະເທດເພື່ອນມິດຍຸດທະສາດ; ການຍົກເວັ້ນການປະຕິບັດບາງມາດຕາຂອງກົດໝາຍໃນຂົງເຂດການລົງທຶນ ແລະ ເຂດເສດຖະກິດພິເສດ; ການຍົກເວັ້ນການປະຕິບັດບາງມາດຕາຂອງກົດໝາຍ ໃນຂົງເຂດການສ້າງເຂື່ອນໄຟຟ້າ; ການຍົກເວັ້ນການປະຕິບັດບາງມາດຕາຂອງກົດໝາຍໃນຂົງເຂດພື້ນຖານໂຄງລ່າງຄົມມະນາຄົມ; ການຍົກເວັ້ນການປະຕິບັດບາງມາດຕາຂອງກົດໝາຍໃນຂົງເຂດພາສີ, ອາກອນ (ນໍ້າມັນ, ພາຫະນະ) ແລະ ການຍົກເວັ້ນການປະຕິບັດບາງມາດຕາຂອງກົດໝາຍ ໃນຂົງເຂດທີ່ດິນ.
            ໂອ​ກາດ​ດັ່ງ​ກ່າວ, ຜູ້ເຂົ້າຮ່ວມ ໄດ້ສຸມສະຕິປັນຍາເພື່ອຄົ້ນຄວ້າປະກອບຄຳຄິດຄຳເຫັນ ຕໍ່ກັບບັນດາເນື້ອໃນບົດຕ່າງໆທີ່ຍົກຂຶ້ນມາສະເໜີໃນຄັ້ງນີ້ ເຮັດໃຫ້ມີເນື້ອໃນເລິກເຊິ່ງ ເພື່ອນຳໄປໃຊ້ໃນວຽກງານຕົວຈິງຕ່າງໆ.
            ໃນໄລຍະຜ່ານມາ, ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ແມ່ນມີຄວາມຈຳເປັນໃນການຍົກເວັ້ນການປະຕິບັດບາງມາດຕາຂອງກົດໝາຍ ເພື່ອຮັບໃຊ້ໃຫ້ແກ່ນະໂຍບາຍການພັດທະນາເສດຖະກິດ-ສັງຄົມ ຂອງປະເທດເຮົາ, ຕໍ່ກັບການຍົກເວັ້ນການປະຕິບັດບາງມາດຕາຂອງກົດໝາຍ ເຫັນວ່າ ມີດ້ານດີ ແລະ ດ້ານຫຍໍ້ທໍ້. ດ້ານດີກໍຄື ເປັນການສົ່ງເສີມທາງດ້ານການລົງທຶນ ໂດຍສະເພາະໂຄງການທີ່ມີຜົນປະໂຫຍດອັນໃຫຍ່ຫລວງ ແລະ ຍາວນານໃຫ້ແກ່ປະເທດຊາດ ແລະ ປະຊາຊົນ; ດ້ານຫຍໍ້ທໍ້ ກໍຄືເປັນຊ່ອງວ່າງທາງດ້ານກົດໝາຍ ແລະ ມີການສວຍໂອກາດໃນການຂໍຍົກເວັ້ນການປະຕິບັດບາງມາດຕາຂອງກົດໝາຍ. ສະນັ້ນ, ຈຶ່ງມີຄວາມຈໍາເປັນໃນການຈັດກອງປະຊຸມສໍາມະນາວິທະຍາສາດ ກ່ຽວກັບການຍົກເວັ້ນການປະຕິບັດບາງມາດຕາຂອງກົດໝາຍ ເພື່ອຄົ້ນຄວ້າ, ພິຈາລະນາ, ວິເຄາະ, ວິໄຈຕໍ່ກັບບັນຫາດັ່ງກ່າວ ໃຫ້ສອດຄ່ອງກັບການພັດທະນາເສດຖະກິດ-ສັງຄົມ ໃນໄລຍະໃໝ່.
(ພາບ ແລະ ຂ່າວ: ນາງ ປາກາລັກ ພົມມີໄຊ)