(ສພຊ) – ໃນລະຫວ່າງວັນທີ 24-25 ເມສາ 2024ທີ່ ນະຄອນຫຼວງວຽງຈັນ, ສະພາແຫ່ງຊາດ ແຫ່ງ ສປປ ລາວ ຮ່ວມກັບອົງການອາຫານ ແລະ ກະສິກຳ (FAO), ກອງເລຂາໄອປາ ແລະ ສະຖາບັນການພັດທະນາແບບຍືນຍົງສາ ກົນ (IISD) ໄດ້ຈັດກອງປະຊຸມສຳມະນາກ່ຽວກັບການຈັດຕັ້ງປະຕິບັດບົດແນະນໍາຂອງອາຊຽນສໍາລັບການລົງທຶນຢ່າງມີຄວາມຮັບຜິດຊອບໃນດ້ານສະບຽງອາຫານ, ກະສິກໍາ ແລະ ປ່າໄມ້ (ASEAN-RAI) ຄັ້ງທີ 1 ໂດຍມີຄະນະຜູ້ແທນຈາກສະມາຊິກສະມັດຊາລັດຖະສະພາລະຫວ່າງຊາດອາຊຽນ (AIPA) ເຊັ່ນ: ຫວຽດນາມ, ກຳປູເຈຍ, ບຣູໄນ ດາຣຸດສະລາມ, ມາເລເຊຍ ແລະ ຄະນະຜູ້ແທນສະພາແຫ່ງຊາດລາວ; ນອກນັ້ນ, ຍັງມີຄະນະຜູ້ແທນຈາກລັດຖະສະພາຕີມໍເລັດເຕ, ກອງເລຂາໄອປາ, ກອງເລຂາອາຊຽນ, ອົງການອາຫານ ແລະ ກະສິກໍາ, ຕາງໜ້າກະຊວງກະສິກໍາ ແລະ ປ່າໄມ້ ຂອງ ສປປລາວ ລວມທັງໝົດ 34 ທ່ານ ເຂົ້າຮ່ວມ.

ກອງປະຊຸມສຳມະນາຄັ້ງນີ້, ໄດ້ຮັບກຽດເຂົ້າຮ່ວມ ແລະ ກ່າວເປີດກອງປະຊຸມໂດຍທ່ານ ສົມມາດ ພົລເສນາ ຮອງປະທານສະພາແຫ່ງຊາດລາວ ໃນນາມຕາງໜ້າປະທານໄອປາຄັ້ງທີ 45, ທ່ານໄດ້ຍົກໃຫ້ເຫັນເຖິງຄວາມຫຍຸ້ງຍາກທາງດ້ານເສດຖະກິດ-ການເງິນ, ການປ່ຽນແປງດິນຟ້າອາກາດ, ປາກົດການແຫ້ງແລ້ງ, ໄພພິບັດທາງທຳມະຊາດ ທີ່ສົ່ງຜົນກະທົບໂດຍກົງຕໍ່ການຜະລິດກະສິກໍາ ແລະ ປ່າໄມ້ ກໍຄືການຄໍ້າປະກັນສະບຽງອາຫານ ເຮັດໃຫ້ຊີວິດການເປັນຢູ່ຂອງປະ ຊາຊົນໃນພາກພື້ນ ໄດ້ຮັບຜົນກະທົບຢ່າງຫຼີກລ່ຽງບໍ່ໄດ້; ດ້ວຍເຫດນັ້ນ, ມີຄວາມຈຳເປັນຫຼາຍທີ່ສະມາຊິກອາຊຽນຕ້ອງເພີ່ມທະວີການຮ່ວມມືຢ່າງສະໜິດແໜ້ນເພື່ອຊອກຫາວິທີແກ້ໄຂບັນຫາໃຫ້ແທດເໝາະທີ່ສຸດ ເພື່ອສາມາດຮັບມືກັບສິ່ງທ້າທາຍ ແລະ ຫັນເອົາສິ່ງທ້າທາຍເຫຼົ່ານັ້ນ ມາເປັນກາລະໂອກາດສ້າງຜົນປະໂຫຍດສູງສຸດໃຫ້ແກ່ປະຊາຊົນ, ເຊິ່ງສໍາລັບ ສປປລາວ ແມ່ນໄດ້ເນັ້ນໜັກການພັດທະນາ ແລະ ສົ່ງເສີມການຜະລິດກະສິກໍາ ແລະ ປ່າໄມ້ ໃຫ້ໄປຕາມທິດສີຂຽວ ແລະ ຍືນຍົງ, ປະກອບສ່ວນເຂົ້າໃນການຫຼຸດຜ່ອນອາຍພິດເຮືອນແກ້ວ-ຫຼຸດຜ່ອນໂລກຮ້ອນ ແລະ ສຸມໃສ່ດຶງດູດການລົງ ທຶນດ້ານເຕັກໂນໂລຊີ, ປັດໄຈການຜະລິດຕ່າງໆ ໃຫ້ແທດເໝາະກັບທ້ອງຖິ່ນ, ພ້ອມທັງຊອກຫາຊ່ອງທາງເພື່ອເຂົ້າເຖິງຕະຫຼາດຕ່າງປະເທດເພີ່ມຕື່ມ. ພ້ອມດຽວກັນນັ້ນ, ທ່ານໄດ້ຍົກໃຫ້ເຫັນວ່າ ກອງປະຊຸມຄັ້ງນີ້ ຈະເປັນໂອກາດອັນດີໃຫ້ແກ່ບັນດາສະມາຊິກລັດຖະສະພາອາຊຽນ ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ທີ່ປະຕິ ບັດໜ້າທີ່ດ້ານນິຕິບັນຍັດ, ຕິດຕາມກວດກາ ແລະ ຕົກລົງບັນຫາສໍາຄັນຂອງຊາດ ໄດ້ແລກປ່ຽນ ແລະ ຖອດຖອນບົດ ຮຽນທີ່ດີຮ່ວມກັນ ເພື່ອນໍາໄປຈັດຕັ້ງຜັນຂະຫຍາຍຢູ່ພາຍໃນປະເທດຂອງຕົນ ກ່ຽວກັບການຈັດຕັ້ງປະຕິບັດບົດແນະນໍາຂອງອາຊຽນສໍາລັບການລົງທຶນຢ່າງມີຄວາມຮັບຜິດຊອບໃນດ້ານສະບຽງອາຫານ, ກະສິກໍາ ແລະ ປ່າໄມ້ ໃຫ້ໄດ້ດີກວ່າເກົ່າ.

ນອກຈາກນັ້ນ, ໃນກອງປະຊຸມຍັງໄດ້ມີການປະກອບຄຳເຫັນ ແລະ ເປັນປະທານຮ່ວມໃນພິທີເປີດໂດຍ ທ່ານ ນາງ ຊິຕີ ໂຣໄຊເມຣີຍັນຕີ ດາໂຕະ ຫາຈິ ອັບດຸນ ຣາມັນ ເລຂາທິການໃຫຍ່ໄອປາ, ທ່ານ ນາງ ຄີຍັງ ມີ ກິມ ຜູ້ຕາງໜ້າອົງການອາຫານ ແລະ ກະສິກຳ ປະຈຳ ສປປລາວ ແລະ ທ່ານ ມະນີໂສ ຊາມຸນຕີ ຮອງປະທານກຳມາທິການເສດຖະ ກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດລາວ.

ໃນກອງປະຊຸມ, ຄະນະຜູ້ແທນໄດ້ຮັບຟັງການລາຍງານກ່ຽວກັບຄວາມຄືບໜ້າໃນການຈັດຕັ້ງປະຕິບັດບົດແນະນໍາຂອງອາຊຽນສໍາລັບການລົງທຶນຢ່າງມີຄວາມຮັບຜິດຊອບໃນດ້ານສະບຽງອາຫານ, ກະສິກໍາ ແລະ ປ່າໄມ້ ເຊິ່ງຄະນະຜູ້ແທນໄດ້ສຸມໃສ່ຄົ້ນຄວ້າ ແລະ ປຶກສາຫາລືກ່ຽວກັບການວາງແນວທາງນະໂຍບາຍ, ການປະເມີນຄວາມສອດຄ່ອງຂອງລະບຽບກົດໝາຍ, ການສະໜອງງົບປະມານ ແລະ ການຕິດຕາມກວດກາການຈັດຕັ້ງປະຕິບັດວຽກງານດັ່ງກ່າວ ໃນລະ ດັບຊາດ ແລະ ພາກພື້ນ ໃຫ້ມີປະສິດທິພາບ ແລະ ປະສິດທິຜົນສູງສຸດ. ໃນນັ້ນ, ທ່ານ ຈັນທະວົງ ແສນອາມາດມົນຕີ ຮອງປະທານກຳມາທິການການຕ່າງປະເທດ ຕາງໜ້າໃຫ້ແກ່ຄະນະຜູ້ແທນລາວ ມີຄຳເຫັນຕໍ່ກອງປະຊຸມ ເຊິ່ງໄດ້ຍົກໃຫ້ເຖິງຄວາມພະຍາຍາມຂອງ ສປປລາວ ໃນການປັບປຸງ ແລະ ພັດທະນານິຕິກຳ ເພື່ອຊຸກຍູ້ສົ່ງເສີມການລົງທຶນທາງດ້ານສະ ບຽງອາຫານ, ໂພຊະນາການ, ກະສິກໍາ ແລະ ປ່າໄມ້ ຢ່າງມີຄວາມຮັບຜິດຊອບ ເຊິ່ງມີຄວາມສອດຄ່ອງກັບບັນດາຄໍາແນະນໍາຂອງ ASEAN-RAI ເປັນຢ່າງດີ ເປັນຕົ້ນ: ກົດໝາຍວ່າດ້ວຍກະສິກຳ, ກົດໝາຍວ່າດ້ວຍການລ້ຽງສັດ, ກົດໝາຍວ່າດ້ວຍຊົນລະປະທານ, ກົດໝາຍວ່າດ້ວຍອາຫານ, ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍປ່າໄມ້ ແລະ ນິຕິກໍາອື່ນໆທີ່ກ່ຽວຂ້ອງ; ແຕ່ເຖິງຢ່າງໃດກໍຕາມ, ຍັງມີສິ່ງທ້າທາຍຈໍານວນໜຶ່ງທີ່ຕ້ອງໄດ້ເອົາໃຈໃສ່, ຕ້ອງໄດ້ມີການຮ່ວມມືກັນຢ່າງຈິງຈັງ ທັງພາກລັດ, ເອກະຊົນ ແລະ ຄູ່ຮ່ວມພັດທະນາ ໃນການຊຸກຍູ້, ສົ່ງເສີມ ແລະ ລົງທຶນເຂົ້າໃນການຈັດຕັ້ງປະຕິບັດວຽກງານການຄໍ້າປະກັນ ແລະ ຄວາມໝັ້ນຄົງດ້ານສະບຽງອາຫານ, ໂພຊະນາການ, ກະສິກໍາ ແລະ ປ່າໄມ້ ໃຫ້ໄປຕາມທິດການພັດທະນາສີຂຽວ ແລະ ຍືນຍົງ ໂດຍທ່ານໄດ້ສະເໜີບາງທັດສະນະກ່ຽວກັບການຈັດຕັ້ງປະຕິບັດຄໍາແນະນໍາຂອງ ASEAN -RAI ດ້ວຍການປູກຈິດສໍານຶກ, ເຝິກອົບຮົມ, ສໍາມະນາ, ທັດສະນະສຶກສາ ແລະ ຖອດຖອນບົດຮຽນ ລວມທັງເຜີຍແຜ່ໃຫ້ບຸກຄະລາກອນ, ປະຊາຊົນ, ຜູ້ປະກອບການ ແລະ ຂະແໜງການກ່ຽວຂ້ອງ ໃຫ້ຮັບຮູ້ ແລະ ເຂົ້າໃຈຄວາມສໍາຄັນຂອງວຽກງານດັ່ງກ່າວ; ແບ່ງປັນ ແລະ ແລກປ່ຽນຂໍ້ມູນ-ຂ່າວສານທາງດ້ານເຕັກນິກ, ເຕັກໂນໂລຊີ ເຊິ່ງກັນ ແລະກັນ; ຊຸກຍູ້ ແລະ ສົ່ງເສີມການລົງທຶນເຂົ້າໃສ່ວຽກງານດັ່ງກ່າວ ໃຫ້ເປັນຮູບປະທໍາຫຼາຍຂຶ້ນ ພ້ອມທັງເພີ່ມທະວີການຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດວຽກງານເປັນແຕ່ລະໄລຍະ ຢ່າງເປັນລະບົບ ແລະ ຕໍ່ເນື່ອງ.

ກອງປະຊຸມຄັ້ງຕໍ່ໄປ ຈະໄດ້ຈັດຂຶ້ນໃນກາງປີນີ້ ໂດຍຜົນຂອງກອງປະຊຸມຈະຖືກນຳໄປເຜີຍແຜ່ຜ່ານທາງເວັບໄຊຂອງກອງເລຂາໄອປາ ແລະ ຈະມີຮ່າງມະຕິຮັບຮອງເອົາຜົນຂອງກອງປະຊຸມດັ່ງກ່າວ ໃນກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ທີ່ສະພາແຫ່ງຊາດ ແຫ່ງ ສປປລາວ ຈະເປັນເຈົ້າພາບໃນເດືອນຕຸລາ 2024.