ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR
             (ສ​ພ​ຊ) ໃນ​ວັນ​ທີ 28 ທັນ​ວາ 2021 ທີ່​ສະ​ພາ​ແຫ່ງ​ຊາດ, ກອງ​ທຶ​ນ​ຊ່ວຍ​ເຫລືອ​ສັງ​ຄົມ​​ຂອງ​ສະ​ພາ​ແຫ່ງ​ຊາດ ໄດ້​ມອ​ບ​ວັດ​ຖຸ​ປັດ​ໄຈ​ໃຫ້​ແກ່​ແພດ-ໝໍ​ທີ່​ປະ​ຕິ​ບັດ​ໜ້າ​ທີ່​ຕິດພັນ​ກັບ​ການ​ປ້ອງ​ກັນ, ສະ​ກັດ​ກັ້ນ ແລະ ແກ້​ໄຂ​ການ​ແຜ່​ລະ​ບາດ ​ຂ​ອງ​ພະ​ຍາດ​ໂຄວິດ-19 ລວມ​ມູນ​ຄ່າ​ທັງ​ໝົດ 132 ລ້ານ​ກີບ ໃຫ​້​ແກ່​ແພດ-ໝໍ ຂອງ 6 ພ​າກ​ສ່ວນ ​ຄື: ໂຮງ​ໝໍ​ມ​ະ​ໂຫ​ສົດ, ໂຮງ​ໝໍ​ເສດ​ຖາ​ທິ​ລາດ, ໂຮງ​ໝໍ​ມິດ​ຕະ​ພາບ, ໂຮງ​ໝໍ​ແມ່ ແລະ ເດັກ​ເກີດ​ໃໝ່, ໂຮງ​ໝໍ 103 ແລະ ສູນ​ວິ​ເຄາະ ແລະ ລະ​ບາດ​ວິ​ທະ​ຍ​າ.
ເປັນ​ກຽດ​ຜັດ​ປ່ຽນ​ກັນ​​ຂຶ້ນມອບ​​ໂດຍທ່ານ ຄຳ​ໃບ ດຳ​ລັດ ຮອງ​ປະ​ທານ​ສະ​ພາ​ແຫ່ງ​ຊາດ, ທ່ານ ດ​ຣ. ນາງ ວິ​ພາ​ວັນ ພົມ​ວິ​ຫານ ປະ​ທານກອງ​ທຶນ​ຊ່ວຍ​ເຫລືອ​ສັງ​ຄົ​ມ​ຂ​ອງ​ສະ​ພາ​ແຫ່ງ​ຊ​າດ ແລະ ທ່ານ ນາງ ມະ​ນີ​ວັນ ເຍຍ​ປາວ​ເຮີ ຮອງ​ປະ​ທານ​ກຳ​ມາ​ທິ​ການ​ວັດ​ທະ​ນະ​ທຳ-ສັງ​ຄົມ ສະ​ພາ​ແຫ່ງ​ຊາດ; ເຂົ້າ​ຮ່ວມ​ພິ​ທີ​ມີ​ຮອງ​ເລ​ຂາ​ທິ​ການ​ສະ​ພາ​ແຫ່ງ​ຊາດ, ຜູ້​ຕາງ​ໜ້​າ​ຈາກກະ​ຊວງ​ສາ​ທາ​ລະ​ນະ​ສ​ຸກ, ຜູ້​ຕາງ​ໜ້າ​ຈາກ​ອົງ​ການ​ຈັດ​ຕັ້ງ​ມະ​ຫາ​ຊົນ​ຂອງ​ສະ​ພາ​ແຫ່ງ​ຊາ​ດ ແລະ ແຂກ​ຖືກ​ເຊ​ີນ​ເຂົ້າ​ຮ່ວມ.
               ກອງທຶນຊ່ວຍເຫລືອສັງຄົມຂອງສະພາແຫ່ງຊາດ ໄດ້ສ້າງຕັ້ງຂຶ້ນພາຍໃຕ້ການຕົກລົງເຫັນດີຂອງຄະນະພັກ, ຄະນະປະຈຳສະພາແຫ່ງຊາດ ໃນວັນທີ 20 ສິງຫາ 2021 ມີຊື່ວ່າ “ກອງທຶນຊ່ວຍເຫລືອສັງຄົມຂອງຄອບຄົວຄະນະປະຈຳສະພາແຫ່ງຊາດ ຮ່ວມກັບສະຫະພັນແມ່ຍິງສະພາແຫ່ງຊາດ” ເຊິ່ງການລິເລີ່ມຂອງກອງທຶນເບື້ອງຕົ້ນແມ່ນໄດ້ຈາກການປະກອບສ່ວນທຶນຈາກຄອບຄົວຂອງຄະນະປະຈຳສະພາແຫ່ງຊາດ; ບັນດາຄະນະຮັບຜິດຊອບກອງທຶນໄດ້ລະດົມຂົນຂວາຍທຶນ, ວັດຖຸອຸປະກອນ ຈາກບຸກຄົນ, ນິຕິບຸກຄົນ, ການຈັດຕັ້ງ ທັງຢູ່ພາຍໃນ ແລະ ຕ່າງປະເທດ ຕາມແນວທາງນະໂຍບາຍພັກ-ລັດ ແລະ ຖືກຕ້ອງຕາມລະບຽບກົດໝາຍ.
(ພາ​ບ ແລະ ຂ່າວ: ປາ​ກາ​ລັກ ພົມ​ມີ​ໄຊ)